發佈時間：19:39 2025-05-29
不少港人假日都會北上按摩，緩解一下工作和生活帶來的疲勞，不過選擇按摩店宜謹慎。近日有港女在facebook專頁「深圳大陸吃喝玩樂交流」發帖，講述了自己和家人朋友一行4人在蓮塘口岸誤入按摩黑店的遭遇，提醒網民進店前必須留意一件事，以免淪為水魚！
按摩半小時即推銷3千元套票
女事主周一（26日）發帖時直言：「我都估唔到有黑店，點知真係有。」據她指，當日因為「泊咗車喺蓮塘，趕時間返去」，「諗住近近哋」，便到蓮塘口岸一間裝潢「企理」、標榜中醫按摩的按摩店光顧。她選擇的按摩時間為70分鐘，主要按身，但按摩了30分鐘後，技師「話放啲中藥喺我背脊度，話幫我驅寒」，並向她推銷三千多元的套票。
女事主「話唔需要」拒絕買套票，並要求技師拿走放在她背脊的中藥：「（我話）好熱皮膚敏感唔可以放中藥喺背脊。」該技師拿開中藥後便「自己行咗出房」。女事主當時「冇著衫」，隔了十分鐘後，仍未見技師返回，遂致電身處隔壁房間的家人查問「個師傅去咗邊」。
出口術埋單收費突變貴：真係估唔到仲有呢啲黑店
家人告知原來按摩已完結，原定70分鐘的按摩只做了30分鐘。她無奈付款走人，但又被「坐地起價」。她表示，進店時店方表示可免費試按，她不貪小宜便拒絕了，隨後問明職員「按身」收費為每位138元才光顧，結果結帳時職員卻改口收每人300多元，一行4人要價逾千元。她未料「咁都中伏」：「真係估唔到而家都仲有呢啲黑店。」
女事主最後無奈付款：「唔畀，點知佢會唔會無啦啦搵人揼我。」「算啦埋單四個人一千蚊畀佢，呢間舖頭都唔係做回頭客生意。」但她亦坦言﹕「係條氣有啲唔順，因為佢講嗰個價錢，同佢收個價錢唔係一樣。」
女事主特別指出，當日她「直接上去問」店家價錢，是由於該店水牌「冇顯示幾多錢」，「佢（店家）話我哋呢度冇價錢牌」。她質疑道：「講真如果唔係呃，點解佢冇個價錢牌，總知冇價錢牌既店唔好入，佢話幾多就幾多。」她呼籲「大家小心」：「去按摩都係先睇下間嘢有冇價錢牌先好入去」，否則最後變成價錢「任佢講」而被劏。
網民：可電12315熱線投訴
事件引發關注，不少網民指該店評價不太好：「其實果間嘢都好多負評。」「這間出名黑店。」部分網民建議樓主，可在內地知名消費平台給該店負評，以提醒其他人免中伏。有人還建議事主致電內地消費者投訴電話「12315熱線」：「如果情況屬實，你只要報警，再打12315，佢就玩完。」
有網民認同光顧水牌有標明價錢的按摩店，另有人提醒不要貪小便宜，「就算是免費，我一一拒絕，因為到最後佢哋有一千個理由要收費，重收得好貴。」
