發佈時間：12:00 2026-03-10
現年53歲的古巨基（基仔），與57歲的太太陳韻晴（Lorraine），繼5年前誕下大兒子古晉匡（Kuson）後，今年元旦再投下驚喜彈，宣布家庭再添新成員，迎來第二名兒子Kuderson。Lorraine以57歲超高齡再次順利誕子，她的無比勇氣與偉大的母愛，獲得外界無數的祝福。
日前，本刊拍到Lorraine產後的最新狀況。現場所見，她極速修身，身形零走樣。至於靜悄悄做第二任爸爸的基仔，就繼續發揮「廿四孝老竇」的本色，湊完大仔Kuson放學，又親自護送他去補習，事事親力親為，絕不假手於人。據悉，基仔兩公婆現時已經「全副武裝」，幫6歲的大仔展開升學大作戰，目標是香港頂級的國際學校。
喜歡湊仔
向來將家庭事收得密實的基仔，早前與老婆Lorraine低調地迎來第二名兒子Kuderson。日前出席音樂會時，他便在台上開心地分享再做老竇的喜悅，更自封是「喜歡湊仔的男人」，好鍾意幫手餵奶同換尿片，樂在其中！日前，基仔飛到新加坡表演，亦帶埋大仔Kuson同行；期間，兩父子還一齊去海洋館享受親子時光。事後，他晒出一張照片，相中Kuson伏在爸爸的心口，而他則一臉冧樣，認真有仔萬事足！
自大仔出世後，基仔本來已經逐步減產，不過現時變成一家四口，一闊三大，這位「廿四孝老竇」即刻要撻着賺錢mode，頻頻北上吸金，幾乎逢job必接。密友爆料：「基仔話𠵱家唔止要養一個，係要養兩個仔，第時讀書、興趣班，甚至買樓，樣樣都係錢，佢話自己唔搏啲點得呢？」
日前，本刊就發現，坐完月無耐的Lorraine，與基仔現身天后，貼地幫襯街邊檔買雞蛋仔。當日所見，產後的Lorraine極速修身，零水腫之餘，一身全黑打扮配西裝褸，十分型格！雖然身材冇走樣，但可能一湊二長期作戰，素顏上陣的她，面色略顯憔悴，眼肚位置更出現大大個黑眼圈，看來湊初生B真係唔容易。
在街上，Lorraine一邊等雞蛋仔，一邊傾電話，期間更傾到七情上面，相當肉緊，而基仔就一直留守在7人車內。終於等到新鮮滾熱辣雞蛋仔出爐，她拎着返回7人車，但沒有即時走人，10分鐘後再次落車，原來仲有第二底。明顯，這兩底雞蛋仔，就是用來𠱁她生命中兩個最重要的男人，認真係「廿四孝老婆兼阿媽」。
買完雞蛋仔，7人車直駛學校門口，Lorraine落車親自接大仔放學。現場所見，Kuson精靈活潑、眼仔睩睩，一見到有雞蛋仔食，開心得笑到見牙唔見眼。之後，Kuson去銅鑼灣上興趣班，今次輪到穿上綠色恤衫內襯比卡超T恤，佩戴紅色帽的基仔，sharp醒登場！兩公婆齊齊護送Kuson上一棟商業大廈，基仔全程「緊張大師」上身，拖到大仔實一實，睇得出他對呢粒「心肝椗」非常着緊；而有爸爸陪伴的Kuson，全程蹦蹦跳，心情靚爆！
延伸內容 : 古巨基毫無預警再做爸爸 57歲太太高齡再誕B
延伸內容 : 古巨基太太超高齡再次順利誕子 娛圈「高齡產婦」逐個睇
甜蜜拍拖
安頓好大仔之後，兩公婆即刻把握「me time」拍拖，歎番杯咖啡之餘，Lorraine更蹺實老公隻手，幸福地在附近閒逛，畫面甜蜜。享受完一小時浪漫時光後，他們又準時返去接大仔放學，基仔再次發揮「緊張大師」的本色，即刻幫手孭書包；另等車期間，這位「廿四孝老竇」竟然童心未泯，同大仔在商場追逐玩耍，場面溫馨，他確實好享受湊仔的每一刻。
其實，基仔對兩子的關懷，絕對唔止接放學、買雞蛋仔咁簡單，他曾分享陪伴兒子去面試：「我都幾開心，可以陪個仔經歷新鮮嘅嘢，而且感覺佢好需要我哋支持。」早前，有網民就巧遇基仔親自帶Kuson出席加拿大國際學校的open day，為升讀小一「攞料」。據密友透露：「呢間學校地方開揚，有個超大戶外遊樂場，基仔對環境同教學理念都好滿意，Lorraine仲參觀咗幾次，兩夫婦已經鎖定目標，開行turbo 力谷Kuson入呢間學校。」
眾所周知，加拿大國際學校是香港頂級國際學校之一，專收星二代同名人子女，李克勤的兩名兒子、林青霞的兩名女兒、張學友的細女等都是校友。該校的留位費索價8萬元，小學全年學費約為21萬元，認真唔嘢少。不過，為兒子的未來，這位「廿四孝老竇」幾貴都肯投資！所以無論係open day或是面試，基仔都堅持親自帶隊，全程緊貼，絕不假手於人，認真做足一百分！
