發佈時間：08:00 2026-03-10
周永恒（Roy）接受東周網獨家訪問，逐點反擊舊愛周曉彤（Ivy），力言情已逝不會復合，浪子回頭，囝囝大過天的他，對前妻陳薇仍心存愛意，坦言希望破鏡重圓，給囝囝一個美滿幸福的家！
幾乎絕跡娛樂圈的周永恒，因「世紀賤男」之名，超過十年已沒有做娛樂圈相關的工作，但不時成為新聞人物，單單都是負面，出軌、家暴、被捕等，如其所名，永恒不變。就是早前因被網民野生捕獲，令周永恒的「賤男」封號再次被傳頌！
早前網民發現周永恒在港鐵車廂攬女，即被指死性不改，背着第二任太太陳薇風流偷食。未幾陳薇發文表明，「港鐵攬女」女主角正正是她本人，她稱去年雖已跟周永恒辦離婚手續，因周永恒喪父，當日陪伴奔喪的她，施以擁抱安慰。
Ivy數臭
周永恒和陳薇一幕港鐵相擁，觸動前女子組合MVG成員周曉彤（Ivy）的神經，發文數臭周永恒：「你都呃得我透，呃我話離咗婚，千萬個大話」與周永恒的情侶關係因而公開。周曉彤多次爆料，指跟周永恒於去年9月拍拖，稱因對方熱烈追求，一時同情心下，答應交往及照顧其兒子「熙仔」，她更爆周永恒與陳薇爭撫養權，以兒子做籌碼向女方家人索錢。
易請難送，Ivy說很快發現周永恒的恐怖一面，快刀斬亂麻，聲稱拍了一日拖後即提出分手，又指自己因個人信仰關係，從未跟周永恒同居及發生性行為。提出分手後，Ivy說常遭周永恒上門滋擾，包括在大門外半裸叫囂，喊打喊殺，雖報警求助，但滋擾重覆，令她活在惶恐中，日前更直指曾遭對方叉頸威脅人生安全，恐嚇她：「再出聲會即刻殺死你！」
周永恒踢爆同居屢被趕出門口
Ivy不留情面的數臭，周永恒主動接觸東周網，接受《星桄伴我心》主持黃庭桄訪問，稱希望親自澄清，目的是不想負面新聞傷害其兒子及正在搞離婚手續的太太陳薇：「我想個仔好，唔好影響佢！」
對於Ivy那份「象徵式」的愛，周永恒說去年六月和太太搞分居，直至九月才開始跟Ivy拍拖及同居，所以不存在Ivy所指「呃我離咗婚」，更踢爆女方「冇同居」的說法。
周永恒說：「我哋拍拖好多人都知，我有帶佢出街，出街冇戴口罩，有拖有攬。舊年離婚之後幾個月，佢叫我返教會，傾吓偈就一齊咗。上年六月分居，如無意外今年六月簽字，我同太太分咗手，狀況係分居，關係好清楚，唔係一腳踏兩船，佢（Ivy）成日問我幾時搞清手續，其實時間同文件都係阿仔媽咪搞，唔係我。（有同居？）我住過佢吓佢度。」
Ivy公開監控畫面指周永恒上門滋擾，拍得他在門外半裸出現。周永恒反指女方常發脾氣要他「七街瞓」，把他的東西扔出門口：「因為我成日畀佢飛，佢啲行為好激烈，然後我又好無奈咁敲門，問佢即係點呀？可唔可以畀返啲嘢我？係鬧交，飛完又復合好多次。冇着衫嗰日，我個樣好衰，因為我瞓緊覺，佢冇帶鎖匙，我發脾氣，佢又驚，走去報警，警察嚟到我都唔知咩事，警察入嚟調查，佢好驚喺厠所，唔知佢驚乜嘢，我當日個樣係好衰，因為凌晨三點瞓緊，冇着衫。」
叉頸是性愛非恐嚇？
至於Ivy聲稱被叉頸遭死亡恐嚇，周永恒另有說法，承認曾向Ivy叉頸，但並非暴力恐嚇，只是進行窒息式性愛。「叉佢條頸係有嘅！但唔係喺嗰個情節去叉佢條頸，即係『你叉我條頸啦！』嗰種窒息感覺，係有嘅，係喺一啲糾纏緊嘅時間，夜晚嘅時候嚟，（你意思係發生性行為時？）係！我依稀記得唔係鬧交時叉佢條頸喎，你畀我留白少少，唔好講到咁露骨啦！」
周永恒指常和Ivy吵架的原因，歸究於女方冇安全感，坦言自己清白，冇亂搞男女關係。「佢成日好容易好少嘢就好妒忌，好冇安全感，所有嘢好緊張，轉個頭就趕我走，重重覆覆好多次。我冇背住佢溝女呀！我連電話都冇lock，就咁擺喺到，都冇乜朋友搵我。同居期間，同佢一齊好sweet，返工就返工，放工就放工，好簡單嘅生活，又唔會出去飲嘢。」
周永恒更指Ivy控制慾強，尤其知道他見前妻，就會觸及其神經，直言情已逝不會復合。「佢會覺得我有好多嘢可以改進，會guide住我。有時我受到，都會盡量去聽，但有時同佢溝通，佢好似leader咁，想lead住我，我又唔想畀佢lead，就會嗌交。最經常發生，係同小朋友有關。我成日好掛住個仔，出嚟見一定見到囝囝媽咪出嚟，一有異性埋身，佢（Ivy）好易有反應。佢係愛我，唔愛嘅話，就完全消失，答都唔答。唔會復合，反正完咗就完咗，而家冇諗。」
唔恨食軟飯
25年前入娛樂圈到現在，周永恒無論事業或名聲，劣跡斑斑，現年41歲的他，覺得一事無成嗎？周永恒說：「喺你哋眼中我係一事無成，但我覺得絕對唔係，我好勤力日日做嘢，做緊嘅嘢同娛樂圈無關。其實好多街坊都會見到我，我有去送貨、做吓製作，總之開到飯，一日三餐無憂。」
周永恒說，無論是陳薇或Ivy，從未向對方索取金錢：「我有畀家用，同Ivy一齊時都有畀過，如果佢唔OK我會幫。我唔問女人攞錢，我唔食軟飯，如果我食，我都『肥仔』揸法拉利，一早彈起咗啦！」
愛一個上一課，趙頌茹（阿Yu）和陳薇兩任太太，給周永恒上了怎樣的一課？說到第二任太太陳薇，周永恒流露愧疚之情，他稱對方選擇離婚，源於自己燥爆的自閉性格。「因為我好燥，啲性格以前唔好，唔係咁易同人溝通到，似啲成年自閉症咁，好多嘢我要人聽咗我講先，聽唔到人點講，佢喺我身邊會好攰，我成日會鬧佢，到最後慢慢感情愈來愈淡，都可惜。」
我不是賤男
做完又錯，錯完又做，無間地獄，會悔過嗎？周永恒說自己有改進，更稱從來不覺得自己是賤男，也不會理會外間對他如何抱有壞印象。
「我有改呀，不過我冇同大家交待之嘛，我以前嘅感情觀，覺得可以有好多女仔都冇所謂，反正轉來轉去，我而家冇！同太太咁多年，都冇去溝女，個仔都8歲，去到分開咗，識嘅女仔都唔係出面嘅女仔。因為本身我個圈子好細，又唔係咁易信人，所以我冇咩選擇，身邊朋友又冇乜靚女，全部係阿叔。」
「我唔賤呀！我同阿Yu分開咗先至變成咁（被指賤男）之嘛！ 有幾賤啫？我都唔識拍拖！你哋成日話我食好多女，我其實可以食好多女，但埋親身嘅一定爆，個個影完我張相，一定可以抽水嘅，有幾多單你都數到！四十歲人拍幾多次拖？數埋都唔夠廿次，認認真真，可能係十次。18歲個女朋友變咗我老婆，然後分手，就變咗賤男！」
「我都唔打女人！我好好揪，畀我打，一定入硬廠！如果係女人，死得！係阿Yu嗰次，推咗佢一下，推完佢跌低，我有送佢去醫院同返屋企，佢嬲我走去搵Ruby（小三），之後一路炒作變咗賤男、唔要老婆，拋妻棄女。當時我係藝人，好多情緒，會在意人哋點睇，好想去兜搞返好件事，失去咗關係復和嘅機會。」
博愛地被愛
「我缺愛，人哋愛我，我唔識拒絕，係真嘅。以前好戇居，以前做偶像，好需要人哋愛你，人哋愛你，你就一定要接受，博愛地被愛，係好正常，但界線唔識去定，去到某個位係原來會傷害人，冇咗條界線。我唔識拒絕人愛我，以前做偶像係要令人愛你，冇人教你點定界線，」
一直被鬧到貼地，周永恒說，真的想貼地生活，尤其後悔錯過了和阿Yu的一對女兒成長，不想再令兒子的成長歲月有一絲遺憾。
「我都四張，個仔都八歲，已經miss咗兩個女嘅成長，講真阿女咩樣我都唔知，化咗妝個樣，都認唔到，我唔想再miss囝囝成長。我同佢媽咪嘅問題，係我嘅問題，我同阿仔嘅關係應該持續落去。唔係吓吓搵個女仔去氹，我試咗，好畀力，但未必啱，邊有咁多時間同情緒資本，再去搵咁複雜嘅嘢？不要落地啲，簡簡單單，湊吓仔返吓工，簡簡單單就算。」
「點解而家我唔理人點睇？因為以前太過理人點睇！你太在意人哋睇法，成日變咗人哋點睇你，緊要過自己點睇自己。人哋覺得你唔好就係唔好咩？唔應該係咁！如果畀我再揀多一次，我理得你點講，屋企一定係最重要，氹返個老婆，唔好理人哋寫得我幾衰，做一啲老婆需要你做嘅嘢，而唔係喺到拗：『點解你整到我咁衰？你點樣可以幫我變得好啲？』」
「呢十幾年我唔會理人點睇，太在意我做乜，嗰啲人好得閒食花生，如果認真愛我在意我，一係借鏡或鼓勵緊我，有啲為鬧而鬧係借緊鏡。你覺得有人好惡，你可以驚咗佢，因為你驚自己好惡，會傷到人。其實你又可以去諗點解佢咁惡，可以去慰問佢安慰佢，因為你惡時都想有人安慰。愛恨對錯，來來去去都係咁，我當中走出嚟，最好同最衰點分？冇天堂冇地獄，冇黑就冇白。」
盼和太太復合
周永恒自言患有專注力不足及過度活躍症(英文簡稱ADHD），對人際關係及工作都會有影響，就是想變，做得更好，近年向精神科醫生求助，對於涉毒傳聞，一笑置之。
「以前我成日做主角，乜都諗晒自己先，而家諗吓人哋都係主角，我可以學吓做配角滿足人哋所想。我係ADHD底， 吹毛求疵，所以做藝術嗰啲嘢係可以唔瞓，思想偏激、潔癖，容易忽略人哋睇法。近呢幾年食血清素，個brake好咗好多，開始諗配角個想法，溝通會好啲。會開始諗點解要人哋明白我，點解唔滿足吓人先？碰釘多，（同太太）又唔係唔相愛，本身都好好，點解會去到咁差？所以我好珍惜第二段婚姻，修補我愛情觀，一路協調緊點樣令身邊人好啲。我跳掣係因為overload，有啲人挑釁我有冇食冰毒，你有冇見過食冰毒嘅人唔生冰瘡？」
周永恒說和十分珍惜和陳薇這段婚姻，雖已去到辦理離婚手續階段，但仍有復合的盼望。
「我仲有機會啩，希望佢（陳薇）畀機會我。畀啲空間佢，佢好驚傳媒，同佢一齊時我狀況好差，佢要同世紀賤男結婚喎，你諗吓同我結婚時個朵臭到點？同我拍拖時成日被人影。今日個仔咁大個，佢好攰頂咗咁耐，我又慢，乜都慢過人，個腦成熟又慢過人，希望澄清完就完。」
「其實對佢都好大傷害，畢竟愛過一場，你哋想我互片，我唔覺係咁。花生滿地時，你哋就爽，傷害我冇所謂，但玩到人哋，邊忍心？留一線啦！既然大家覺得我咁克人憎咁、係個躝癱，咁你就唔好搞佢哋，有咩意思？不如放低手機、睇本書，無謂浪費時間。其實我個人好nice，唔係你哋諗到咁恐怖！出到街我成日同啲師奶傾偈，好多師奶粉絲，見我除晒衫成個小鮮肉咁。」
