更新時間：19:51 2025-05-22
發佈時間：19:51 2025-05-22
發佈時間：19:51 2025-05-22
尖沙咀驚現罕見景象，鐘樓的避雷針如同竹籤，竟將黃澄澄的滿月「串住」，看上去猶如一串魚蛋！香港天文台將拍下了這唯美卻有趣一幕的照片上載facebook，藉此分享天文知識，直言「滿月唔一定喺農曆十五日」，「月圓之時」取決於新月發生喺初一嘅咩時間」。
香港天文台發帖指，「最近有朋友影到超得意畫面——圓碌碌嘅月亮『篤』喺鐘樓嘅避雷針上，睇落似『篤魚蛋』咁」！據指，照片是在農曆十五（5月12日）晚上7時拍攝，「月亮睇落已經相當飽滿，呢粒『魚蛋』又光又圓，但其實仲差幾個鐘先到真正嘅『滿月』㗎」！
天文台：農曆十四至十七有機會滿月
天文台指，「滿月唔一定喺農曆十五日，因為農曆係跟月相變化週期而制定，一個週期大約要29.53日，月亮由新月到滿月要約14.77日，唔係整數，所以真正嘅滿月『月圓之時』取決於新月發生喺初一嘅咩時間！加上月球唔係以恆定嘅速度圍繞地球運行，因此滿月喺農曆十四至十七都有機會出現㗎」。
天文台隨後在回應欄補充﹕「想知幾時先滿月？」可瀏覽天文台網頁的「月相的日期及時間資料」，當中有2025-2027年的資料，以「上弦月」、「滿（望）月」、「下弦月」、「新（朔）月」這4個月相為一個循環。
其中5月的滿月為13日（農曆十六）00:56，而下一個滿月將於6月11日（農曆十六）15:44出現。
不少網民看到照片後紛紛大讚「好美」和「靚」，另有人上載大月亮美拍，留言「只要大氣清澈，滿月東升是很美的景象」。
最Hit
