發佈時間：18:00 2025-05-26
有人說，唱歌了得的羅敏莊，是樂壇的滄海遺珠。你同意嗎？
羅敏莊自小會跟隨父母到酒廊觀看音樂演出，播下音樂種子。讀中學時，又會參加多個校內及聯校歌唱比賽。中學畢業後，入讀香港演藝學院戲劇學院，同屆同學有陳琪、焦媛、楊詩敏等人，入學第一年就被發掘陳慧嫻和黎瑞恩的音樂製作人安格斯賞識，安排出唱片。1995年正式推出首張個人EP《心軟》及大碟《一生也在等》，派台作品有大家耳熟能詳的《挑戰者》等，曾於1995年度叱咤樂壇流行榜頒獎典禮中，獲得叱咤樂壇生力軍女歌手銀獎，金獎得主是陳慧琳。
可惜音樂路一直未能大紅大紫，有時睇電視見到其他人唱歌，唱到鬼五馬六，咁樣都可以唱歌出唱片，會感觸地喊，覺得自己卻沒有咁好機會。
2010年，她在《超級巨聲2》與參賽者合唱《挑戰者》，評判倫永亮說：「好希望香港樂壇有多啲羅敏莊呢類歌手。」令她當場落淚。
羅敏莊感到懷才不遇嗎？
多年下來，羅敏莊仍會感到懷才不遇嗎？
「每個人在年輕時，一定會試過咁諗。到現在我50歲，回頭望返，以前成日覺得一分耕耘就會有一分收穫，但當入了社會，才會發現，好多嘢原來唔係咁㗎。
「人生經歷令我學習到，當你努力咗，就不要問收穫。當你放下了，人反而會感覺開心咗。」
羅敏莊和老公陳國邦，演藝事業的際遇都好像差不多，比上不足，比下有餘，「我哋兩個好多時都會傾呢個話題，你做戲叻咩？我睇戲叻過你喎。做人咪睇化啲囉！」
當羅敏莊的爸爸，在64歲時病逝，羅敏莊不禁驚醒，60幾歲其實仍然很年輕，但無常卻奪走了她的爸爸，她當下開始打算，人生以後的打算應該如何。
「爸爸本來應該可以慢慢享受人生，但咁早就走咗。我開始問自己，以後嘅人生，係咪繼續營營役役咁樣生活落去呢？」
喪父的日子，羅敏莊帶媽媽到泰國清邁散心，望着藍天白雲，還有陽光海灘，令心靈很療癒，令她萌生移民到泰國的念頭。
移民泰國係享受生活
「可能有人會問我，移民泰國唔返工，生活唔悶咩？但我寧願選擇以後條人生路，係享受生活。」
移居泰國第一步，是先置業，然後再為當年大約五歲的女兒物色好學校，「我發現泰國的學校，性價比好好喎，師資又唔差。」
羅敏莊說，畢竟她是為人媽媽，照顧女兒是放在人生的第一位。「在泰國，有我打理家頭細務，照顧女兒，老公就可以放心，留在香港繼續拼搏，發展演藝事業。」
羅敏莊和陳國邦，不經不覺已經結婚了16年，性格一凹一凸，一動一靜，可謂絕配。2012年4月4日，在籌備演唱會期間，發現懷孕兩個月。羅敏莊指懷孕屬意料之外，她亦要挺孕肚演出。同年10月30日，在浸會醫院誕下重7.3磅的女嬰，取名陳禛。
父母都是演藝界，陳禛都曾經參與幕前演出，在電影《梅艷芳》中，飾演童年梅艷芳，大獲好評，不過女兒無意接棒踏上演藝路。現時她在當地入讀哈羅曼谷國際學校，而陳國邦與羅敏莊所購入的泰國寓所，與陳禛所讀的學校，亦只需半小時車程。
在泰國找到第二生命
當旁人覺得羅敏莊犧牲了在香港的一切，但她卻在泰國找到第二生命，生活得非常快樂。
「我在泰國生活，會不斷鑽研新事物，例如我會跟音樂老師學習如何唱歌，上網跟隨年輕音樂人學唱歌技巧。一路學一路會發現，咦！幫到我喎！原來好多技巧我以前都未試過。」
當女兒去了上上學，羅敏莊會去學泰文、日文、彈琴，黃得不亦樂乎，「一星期我上兩堂泰文，用泰文同老師吹水，所以我識唔少泰文粗口㗎，哈哈！」
至於老公陳國邦的泰文，亦可以在日常生活溝通到，「佢個人表面好似好悶咁，但佢做每件事都好認真，佢會上YouTube學泰文，每日揸車就播住嗰幾條泰文片段，當做記對白咁死背爛背。我就貪玩啲，鍾意學埋泰國人的口音，特別係啲高低音嘅尾音。」
沙哇廸卡，且聽聽羅敏莊娓娓道來在曼谷的泰開心歲月。
