發佈時間：18:52 2025-08-13
TVB熱播中的《女神配對計劃》成為全城熱話，多對CP的發展更備受關注。在鏡頭前，羅毓儀（Yuki）對林俊其（Kris）已不停流露愛慕之情，隔着熒光幕都feel到；而在鏡頭後，兩人近日更被網民捕獲結伴在旺角逛街，還手拖手斷正！看來，Kris已經將女神成功追到手。
2016年已開始做特約演員的Kris，入行快將10年，直至近年才嶄露頭角，再靠《女神配對》成功爆紅！不過，回憶起疫情期間沒開工，終日無所事事，令屋企人擔心的那段日子，他眼泛淚光的說：「有一日老竇轉咗幾千蚊俾我，佢乜嘢都冇講，默默關心我⋯⋯嗰一刻真係直穿咗我心底，當其時我覺得好對佢唔住！」明年便「三張」的Kris，不僅未能養家，還要老父接濟，心中無限愧疚！
王浩信2.0
現年29歲的林俊其（Kris），2016年開始做特約演員，2018年考入藝員訓練班，翌年獲得無綫簽約成為「親生仔」。近年的重頭劇《反黑英雄》、《黑色月光》、《刑偵12》，他都有份參演，並且佔戲漸重，總算捱出頭來。由於Kris的外形及聲線酷似「視帝」王浩信，因此他曾經三度在劇集中，包括：《兄弟》、《反黑路人甲》及《踩過界II》，飾演對方的年輕版和替身。
Kris笑言：「真係好多人都話我似王浩信，由中學一年班開始，已經有人話我似；仲有一日，屋企人突然同我講，話我似洪卓立同王浩信。出咗嚟做嘢之後，試過有一次去做攤位遊戲，真係有人認錯我係王浩信，仲話佢有睇《樓奴》，問我可唔可以同佢合照？哈哈！」其實，他亦覺得自己個鼻同個嘴最似，特別在劇集《兄弟》中有一幕帶着眼鏡，連自己見到都嚇一跳，他坦言：「我把聲就年紀越大越似佢（王浩信），因為把聲越嚟越厚。」
最大遺憾
疫情期間，Kris試過有一年半時間手停口停，每日睡醒等運到，然後再睡覺又等睡醒，百無聊賴。因為父母在外地，沒有演藝工作的他，於是瞞得就瞞，免得家人擔心，他無奈的說：「因為疫情，阿爸阿媽唔喺香港，我阿哥見到我冇工開，佢同阿媽講咗，跟住阿媽就成日問我：『點呀？有冇開工呀？出咗去呀？開工定係喺屋企呀？』嗰陣時，我又唔敢同佢講我喺屋企，因為我驚同佢講咗，佢會擔心，仲要大家相隔咁遠，我惟有唔覆佢機。」
接着，他眼泛淚光的說：「我好記得有一日，老竇無啦啦轉咗幾千蚊俾我，佢乜嘢都冇講，其實我同我老竇性格好似，默默關心我，但係唔使講嘢，佢知道我當刻嘅狀況。我問佢點解突然轉幾千蚊俾我，佢就答我：『得啦！』佢呢句：『得啦！』直穿咗我心底，當其時我覺得好對佢哋唔住。」
除了對父母愧疚之外，Kris對嫲嫲和婆婆亦有話兒：「我同嫲嫲、婆婆嘅感情好好，佢哋成日同我講：『讀多啲書呀！識多啲字啊！』」兩位老人家當然希望看到孫兒學業有成，可惜他唸中四時曾留級一年，中學一畢業後便加入娛樂圈。「我出咗嚟拍嘢嘅時候，嫲嫲已經過身，婆婆就仲喺度，我於是錄咗我拍戲嘅視頻俾佢睇，佢就話：『拍戲咁叻呀，拍多啲戲俾婆婆睇啊！』不過，到我真係有多啲戲份，拍《反黑英雄》嘅時候，婆婆已經唔喺度，呢個係我最大嘅遺憾。」說吧後，Kris再次頭耷耷眼濕濕。
車廂捕獲
最近，無綫熱播的戀愛真人騷《女神配對計劃》，為了暗戀6年的「女神」羅毓儀（Yuki），性格內向的Kris鼓起勇氣上節目追求，結果令他人氣急升，亦令他和Yuki越走越近。日前，有網民就拍得兩人在旺角街頭拖手的照片，Kris哈哈大笑：「私下我哋係有見面嘅，嗰日Yuki收工後，我哋就出咗去食飯，當時佢嘅狀態唔太好、有啲攰，同埋佢對鞋其實好高，嗰度係馬路口有車好貼近我哋，基於安全問題，我想照顧佢，所以我捉住佢行咗一段路，但始終我哋又未一齊，所以我都講一句sorry，見佢無乜事，就放開手。」
不過，Kris和Yuki跟着又被網民捕獲，在港鐵車廂中肩並肩睇手機，期間相當親暱。縱使節目還未播出結局，但Yuki的終極選擇，相信大家應該一清二楚了。
延伸內容：女神配對計劃丨羅毓儀被林俊其「壁咚」冧樣出晒嚟 大叫：「救命我想走！」 派好人卡給 T.Max
延伸內容：女神配對計劃︱羅毓儀現身宣傳 林俊其回應同梁超怡關係
延伸內容：女神配對計劃︱林俊其同港姐季軍甜蜜shopping 幾個月後進擊羅毓儀
延伸內容：女神配對計劃︱冧到羅毓儀放棄小鮮肉 「王浩信2.0」林俊其背景起底！
《東周網》訪談系列節目《星桄伴我心》8月重磅嘉賓：
即睇：譚輝智親解拉姑寵愛之謎 爆喊陪最愛開刀「望住手術室盞燈，我真係好驚！」
