發佈時間：13:04 2025-05-08
人有無限的可能性，就如賈思樂（Louie），有誰會想到平日不戴首飾的他，竟然會參與設計翡翠？
「事緣我有次喺泰國參加bling bling party，戴咗好多朱義盛首飾，做珠寶嘅好朋友向海嵐（Anne）見到，就話：『好少男人戴accessories戴得靚，有冇興趣同我crossover呀？』」
兩人於是一拍即合，Louie要求設計要有他的中、英文名，款式越簡單越好，「因為型同『娘』只係一線之差，我希望帶起男士戴玉嘅潮流，亦想話俾人知，唔一定要出席隆重宴會才戴玉，casual戴一樣可以。」
設計含中英文名
賈思樂首度參與設計的翡翠系列，名為「樂『翠』無窮」，將於下周五（16日）推出，並舉行推介酒會。提到今次突然作出新嘗試，要多得他自己擅長配搭，有次參加bling bling party時，除了奪得最佳衣着獎，還獲得向海嵐的賞識。
「阿Anne問我對玉有咩睇法？我話媽媽以前戴玉鈪，成日講玉可以保平安、辟邪，戴得越耐，色澤越靚。諗諗下，要crossover，梗係要有我嘅元素，就提議不如用我中文名個『樂』字，同英文名『Louie』吖！我要求設計一定要簡單同男性化啲，唔好太多鑽石、紅寶石，佢話得，會幫我度掂佢。」
今次他的系列，以平安扣吊墜為主題。「鏈亦有兩種，通常係白金鏈，我就比較喜歡用繩，除咗有中國傳統感覺，亦富有時代感，最緊要唔『娘』。雖然系列係中性，男女都戴得，但都要我carry到，俾我啲男士朋友睇，希望佢哋會對翡翠另眼相看。」
系列的貨源來自盛產翡翠的緬甸，賈思樂起初對翡翠一知半解，「初頭唔明點解啲玉會有深淺色，價錢又唔同，誤以為偷工減料，原來係誤會！每嚿原石都獨一無二，得到嘅玉自然有分別。」
家姐打牌爛玉鈪
見到玉，便憶起亡母，是另一個令賈思樂答應向海嵐邀請的原因，「摸親玉、見親玉，就會諗起媽媽，好似佢仲喺我身邊。媽媽以前成日戴玉鈪，我仲記得細個，佢俾我戴一隻拳頭形狀嘅玉粒嚟定驚。」
媽媽愛玉這份心，直到現在，才傳到賈思樂的身上；而他的家姐就跟媽媽一樣，早已是愛玉之人。他繪形繪聲地說：「家姐有次打牌好興奮，食嚦咕嚦咕，點知大力一拍，隻玉鈪就爛咗，食呢鋪嘅錢都cover唔到隻玉鈪啊！不過應該唔係好貴，否則佢喊死都似，哈哈！下次去美國，我都會帶啲設計俾佢睇，佢可能搶住要戴，驚佢唔俾番我咋，哈哈！」
今次跟向海嵐合作，令賈思樂開始對設計產生興趣，亦會向身邊的男性朋友做「市場調查」，看看他們對玉有甚麼要求。「我有朋友鍾意星光熠熠，黐滿晒石喺側邊，有咁大粒得咁大粒嗰啲，不過各花入各眼，佢鍾意咪得囉。遲啲我可能會設計一啲好男性化嘅手鈪，希望下次再見面時，有30款產品擺喺枱面啦。」
性格樂觀的賈思樂，設計玉都以「樂趣」行先。如今已成功踏出第一步，要再突破，發揮小宇宙冇難度啦。
延伸內容：賈思樂開騷賀入行50年 半百好友慶祝70歲大壽即淚崩
延伸內容：陳玉蓮恬妞舊愛慶祝70大壽 女星爭住獻吻
《東周網》訪談系列節目《星桄伴我心》5月重磅嘉賓： h
即睇：魯振順八級鋼琴，出過唱片，手揸兩層樓 曾割脈斷9條手筋：「我對唔住媽媽！」
即睇：陳國邦被評為「懷才不遇之星」：係咪真係去擦鞋就得？爆杜琪峰出一招教戲 再爆同周秀娜接吻感受 更爆羅敏莊曾離家出走
