發佈時間：19:07 2025-02-12
今年是蛇年，致力推動保育及保護瀕危動物的郭秀雲（Sharon），原來也是愛蛇之人，現時飼養了30多條大大小小的蛇。她說：「佢哋好容易照顧，通常幼蛇一星期餵一次，成體蛇每月一次，餵完後幾日，清理佢哋嘅便便就可以，連太陽都唔使帶佢哋去曬。唔好期望啲蛇會好似貓狗咁識得嗲你，但佢哋好鍾意捲住你條頸唔郁。」老公龐傑最初都聞蛇色變，後來被潛移默化慢慢接受了，真是愛屋及烏！
餵雪藏老鼠
郭秀雲10幾歲時已養過蛇，婚後因為老公害怕，她一直沒有養，唯有慢慢幫老公克服對蛇的恐懼。最初由變色龍埋手，再到其他大大小小的爬蟲。「終於有一次，我幫朋友救咗條好大條嘅蛇，成10幾呎，喺屋企照顧咗幾日，老公都有接觸。之後佢見到啲『蛇毛』，已經麻木了。」
她會幫每條蛇仔蛇女改名，並且會整卡片貼在盒上，記低牠們的樣子、基因等資料。好奇牠們會食乜？「我通常會餵荷蘭入口、人工繁殖嘅雪藏老鼠或白兔畀佢哋食，起初老公會有意見，話：『吓！你擺雪櫃呀？』我就答佢：『咁雪櫃係咪都有雞、有牛扒吖？其實人工繁殖乾淨過走地雞，同埋會同人類嘅食材分開，放喺雪櫃唔同隔層。
「我好贊成人養蛇㗎！只要唔係好大條，又唔係有毒，好似粟米蛇、牛蛇、球蟒，呢啲性格比較溫馴，顏色已經被人繁殖到好靚。𠵱家多咗好多女仔鍾意蛇，記得養佢哋個盒要安全，唔好畀佢哋走甩就得。」
講起走甩寵物，她對於過年過節，有人因信仰放生雀仔表示無奈。「其實係好心做壞事，害咗隻動物。大多數放生等於放死，佢哋根本唔識得搵食。除咗鸚鵡，又話放啲淡水龜落海，真係好心啦！試過有對新人喺山頂影婚紗相，放生一大籠愛情鳥，10幾隻，我救到1隻咋，好難捉。山頂有好多鷹，見到你放生雀，真係多謝晒！」
小型動物園
熱愛大自然的郭秀雲，家中有如一個小型動物園，問她養了多少種寵物？她「吓」了一聲，然後笑說：「成日都會變，最大嗰隻就係我老公囉！」
保守估計，她家中飼養的珍禽異獸包括蛇、蜥蜴、鸚鵡、龜和蜘蛛等，當中包括一隻她去年拯救的貓頭鷹。「個主人同我一齊去警署領返，原來佢有好多隻貓頭鷹，又成日去泰國，就叫我幫手養住先，點知一養就養到𠵱家。隻貓頭鷹好為食，成日喺我屋企花園個巨型雀籠度飛來飛去。」
照顧眾多寵物，郭秀雲坦言要花很多心思，例如要清早起床，準備一大兜放有蘿蔔絲、椰菜等材料的沙律當作雀糧，黃昏又要提供水果，她稱忙得來開心。「開支大唔大？梗係大啦，雪藏老鼠都10蚊、8蚊隻，貓頭鷹一日都食我幾十蚊，每月開支以萬蚊計。」
她成立了「海峰環保教育」和「香港鸚鵡救援」已有一段日子，多年來為救瀕危動物出心出力，可覺得動物已經成為她生命的全部？「可以咁講㗎！唔知點解會行咗呢條路，總之煮到埋嚟，我唔能夠唔理，例如我哋原意係想救嗰啲因為主人生病、去世而冇人理嘅鸚鵡，唔係幫人四圍搵走甩嘅雀。其實主人睇實啲，好多意外可以避免。」
延伸內容：郭秀雲籌款助動物 七仙羽初次接觸大蜥蝪
