發佈時間：11:49 2025-10-08
在颱風樺加沙吹襲香港期間，DJ當奴除幫忙暫託狗狗，原來同一時間他已經領養了一隻逃出繁殖場，被用作生育機器的貴婦犬「年糕」。當奴日前帶「年糕」做身體檢查及剪毛扮靚，並在社交網站發帖交代這段美麗的緣份。
當奴於9月27日在ig發帖：
「我領養了年糕
相處兩個星期，互相了解大家脾性同習慣，不錯啊
年糕 aka Miles，改呢個名係因為佢前半生都係被困喺無良繁殖場，冇得周圍走，嚟到我屋企，想帶佢走遠啲，玩多啲。」
當奴提到，在眾多狗狗中選中年糕，是因為在「IG成日都見到佢嘅領養post，佢咁可愛，點解幾次嘅領養活動都冇人揀嘅？見到真身，原來佢可能困籠困得太耐，個頭耷耷地，無咩心機，除咗呢樣，我見佢又乖，又黐住我，唔忍心佢又再被拒絕，考慮清楚就帶佢返嚟。」
親身探望試探緣份
原來當奴於8月底到阿棍屋領養中心探望，事前在心中許下承諾：「如果我去到領養中心，佢（年糕）會自己主動走埋嚟，我就考慮帶佢返屋企，點知佢唔單止走埋嚟，仲將我大髀當成佢張床，一瞓瞓咗三個字，醒目得
好，假如家訪成功，MoMo同Mochi又接受佢，我又做老寶啦！」
當奴在IG交代指自己不是一時衝動，而是考慮了大半年，不想落地獄，不會棄養！
帖文hashtag #支持領養不購買不棄養
ViuTV 一姐陳俞希留言：「戥你開心啊成日做義工貼呢啲紙嘅時候都好想啲小動物俾人領養」
導演彭秀慧亦留言：「支持支持！你會係好爸爸！
希望屋企嘅兩位都歡迎佢」
領養前做足心理準備有病醫病
當奴經過家訪後，成功領養年糕。由於年糕是從繁殖場救出，之前的日子都在籠中渡過，被迫做生育機器，健康狀況未必很好，領養後當奴就帶年糕去做身體檢查。
「唔知佢有冇隱藏病，帶佢去做身體檢查前，我都有心理準備，有病醫病，冇病保健，如果有咩大鑊嘢都冇計，陪住佢，至少佢有一段時間都可以開開心心，感恩只係有啲支氣管炎，但康復中，其他還好，happy！」
與原居民貓貓磨合 每天進步
由於當奴家中有兩位原居民貓貓，不知道兩貓是否能接受年糕，並以作了最壞打算，如果貓貓不接受年糕，就讓年糕在廳生活，貓貓在走廊及房生活。
當奴說，貓貓Mochi、Momo由「唔妥佢（仲嬲咗我），到唔餚佢，主動去八卦佢，最多太熱情哄埋嚟就兜巴星埋去，但至少未打交，要啲時間消化，冇得心急。」
他還說到在貓狗磨合過程中「無咩心得，每日都係學習。」而最重要的是，「只要你當動物係你嘅健康、運氣、幸福，你就唔會放低。」
他還提到現在早睡早起，人健康咗，仲高咗。如果見到他沒梳頭頭放狗，請見諒。
而早前颱風他接了阿棍屋狗狗大貴回家暫託，颱風過後送大貴返阿棍屋，心中不捨，幸見到牠被一直照顧牠的婆婆像抱孫般抱在懷內，當奴心感安樂，並說「有機會會再見」
至於新成員年糕已改名「Miles」，本來買了圍欄給牠，分隔貓狗活動空間，但當奴不忍心見到Miles不開心，5分鐘後便放了牠出來。
年糕多次出席領養日都落空 終遇真命天子
阿棍屋昨日（10月7日）在面書發帖說：「年糕是從繁殖場救出來的其中一隻狗狗。脫離繁殖場煉獄時，年糕已經六歲了🥹過往的經歷並沒有讓年糕對人類失去信心，反而性格極其親人🥰待身體檢查後，我們多次安排年糕出席領養日，不過每次都落空🥲
直到一個月前的Pawshero領養日，儘管經歷了颱風而改期，年糕終於找到了屬於牠的真命天子！🥳謝謝DJ Donald @donaldtong 深思熟慮後，願意給年糕（現在改名為Miles）一個永遠的家，也有後備方案想好要如何讓年糕與家中原住民貓貓更好地相處🐱🐶
或許年糕的上半生，只是繁殖場的生財工具，但幸運地下半生能有家有愛。但是多少狗狗能如年糕般幸運？我們衷心希望大家能多多支持領養，領養代替購買，拒絕黑心繁殖場❌沒有買賣，沒有傷害🙌🏻
再次感謝DJ Donald愛心滿滿，從此改寫了狗狗的命運🫶🏻祝福你們從此永遠幸福快樂！㊗️🌸✨」
立即追蹤《東周刊》全新WhatsApp頻道，緊貼全城熱話、突發猛料、獨家消息！
https://bit.ly/4gnvlZf
