發佈時間：08:00 2025-01-28
關心妍（Jade）去年不停周圍飛，到內地多個城市舉行演唱會，所以今個農曆新年，她決定留港休息，日前更到上環買海味辦年貨，準備煮好餸迎接蛇年。
11歲便下廚的關心妍，在店內兜了幾個圈，便買齊海參、花膠、鮑魚、乾瑤柱和花菇等食材，收穫豐富。
「團年飯、開年飯都有着落，買咗啲好嘢！我平時煮慣9人份量的飯菜，因為每個星期日，老爺、奶奶等都會來我屋企食飯，所以團年飯並非大工程，係要諗一啲新菜式囉。」
貴為家中大廚，見到家人食得開心，她即使在廚房忙到一頭煙，也是樂趣。
整海參炆鮑魚
結婚15年，每日都盡量回家煮飯給老公和女兒吃的關心妍，甫抵達上環一間老字號海味店，即獲店舖負責人薛志威熱情接待，向她推介澳洲大豬婆參、日本千葉8頭A級網鮑、印度6頭鰵魚肚公和非洲AA花膠片等。關心妍細心聆聽，表示：「獲益良多，原來海參營養成分好高。」
關心妍透露，每年的年三十和大年初一都會全家總動員食飯，初一除了有盆菜，還會炮製好意頭的菜式，例如「橫財就手」炆豬手、炆鮑魚。「剛才買了乾瑤柱，可以煮瑤柱節瓜脯，還有豹紋花菇，用來炆煮素菜，又可以整海參。蘿蔔糕、年糕一早已買好，今年可能會試下整斑蘭椰汁糕添。」
新正頭多親友來家中拜年，一定熱鬧，關心妍笑言已有心理準備整各式fusion菜招待親朋，「他們很擦得，由朝食到晚，我會不斷整，可能突然有日式關東煮、打邊爐，又會有小朋友鍾意吃的意粉，即是會有新年菜式，亦有各方好友鍾意吃的東西。」
除了大展廚藝宴請親友，家中還要預備4、5個全盒，她笑說：「全盒要等女兒考完試去揀，因為糖果部由她負責，有一個全盒是她專屬請人吃的。另外，會有幾個全盒分別擺放脆麻花、角仔、瓜子、蓮子和果仁等。」
包利是睇星爺
關心妍指8歲寶貝女楊榮心，除了有份參與買糖果，也會一邊睇賀歲片，一邊幫手包利是。去年兩母女看了《嚦咕嚦咕新年財》，今年則會睇周星馳的戲。「同學仔跟她說周星馳的戲好好笑，有一日我在家中唱：『燒雞翼⋯⋯』她就問我唱甚麼，我說是星爺的《唐伯虎點秋香》，她就話今年要睇，讓她感受港產片的魅力都好。」
前幾年疫情，女兒未有機會行花市，關心妍打算今年帶她去感受氣氛，至於睇煙花，她笑說：「心心喜歡透過電視睇煙花多啲，因為她好細膽，好驚煙花大聲。她又發現前幾年冇得拜年，利是『盤數』唔靚，今年已問定我：『媽咪，你貼的揮春有幾多句？等我𢭃利是時，講晒嗰10句。』」
心心落力𢭃利是，無非想善用一分一毫。有時她會請婆婆嫲嫲食飯，又會分擔自己平日的使費，關心妍說：「例如她想去嘉年華玩，或者想學一些非必要的課程，她就會share費用。我想她知道父母好努力賺錢，啲錢唔係變出來。」
新一年新景象，關心妍希望自己在蛇年再勤力一點，亦想創辦的妍亮生命慈善基金，幫助到更多香港不同的基層朋友。
延伸內容：關心妍廣州個唱爆棚 獻出女兒門票贈歌迷
延伸內容：加拿大好玩好食︱關心妍睇雀仔行吊橋 食龍蝦刺身勁回味
《東周刊》最新一期提早1月25日出版！隨書附送《蛇年行運東勝》
千呼萬喚的《蛇年行運東勝》於1月25日隆重登場，雲集全港9大玄學名家！隨最新第1118期《東周刊》附贈，於便利店、各大報攤發售，記得去買返本睇吓蛇年如何行大運啦！
《東周網》訪談系列節目《星桄伴我心》1月重磅嘉賓：
即睇：獨家質詢馬清鏗「小三」五索“我係賤人，但我住山頂，你咁多！唔恨得”
即睇：劉江「講呢啲」｜ 結婚51周年，分享獨門退讓心得｜爆周潤發古惑招𠱁跑山
