發佈時間：16:52 2023-12-29
歌手關心妍（Jade）早前在美國三藩巿做完嘢，便約兩名好友在加拿大溫哥華遊玩。由於她曾在溫哥華讀書，所以今次重遊舊地開心回憶返晒嚟，Delta Bird Sanctuary和Caplilano Suspension Bridge都好值得推介。至於美食方面，原來當地的日本菜和意大利菜都非常出色，海鮮如龍蝦刺身和Manila Clams亦一定要試，必會令你驚喜萬分！
重遊舊地
今次Jade笑言以導遊身份帶住廿幾年前探過她的小學同學一齊去玩，期間幼稚園同學也有Join她們，帶她們到Delta Bird Sanctuary遊覽，Jade說：「呢個地方係我喺溫哥華咁耐都未去過，去睇一啲鶴同候鳥，好似香港嘅米埔咁。」仲有去咗Stanley Park、Granville Island和Caplilano Suspension Bridge。「原本第一站去到Stanley Park係想踩單車，可惜天氣唔好，只係行咗個圈咋。」第二站Granville Island似一個巿集，「裏面啲店舖係賣Local手作嘢，亦有嘢食如酥皮海鮮忌廉湯同冬甩，又可以買水果食。」至於Caplilano Suspension Bridge呢條吊橋今次應該是她第3次去，「嗰日天氣好好，所以風景好靚，因為我冇畏高，所以行過時都好享受。」
懷舊壽司
美食方面，Jade更大飽口福，食完日本菜，又有中國火鍋和意大利菜，當然也不少得甜品。她續稱：「有個壽司好特別，壽司卷入面係蕎麥麵同蟹柳，叫做Soba Sushi，呢個真係溫哥華碩果僅存嘅日本餐廳師傅仲會做，因為係我讀書年代溫哥華先有，我表弟帶我搵番間餐廳叫Stem，因為當時個師傅嘅徒弟仲有做，所以先食得番，真係好感恩！」
魚生必食
另外，她最愛食魚生，她坦言：「喺春秋火鍋嗰度用龍蝦做咗個Sashimi，好鮮甜；而日本魚生都好好食，尤其係Local嘅三文魚。」而她最推介是首次幫襯的意大利小酒館Pepino Italian Restaurant，她解釋：「我食咗隻雞同蝦，仲有Pasta同Cheese Bread都好好食，而價錢非常相宜，大約係港幣250蚊，不過就嘈啲，因為樓底比較矮同啲枱比較密，但Overall係一間幾唔錯嘅餐廳嚟，冇諗過加拿大食到咁好嘅意大利菜。」
鬆軟Cheese Cake
值得一提的是，在加拿大別忘了吃Manila Clams蜆意粉，Jade表示地道又美味。而Cheese Cake都不能錯過，好似在當地非常有名的Cheese Cake Etc，她稱小時候已經常食，「你見好大嚿蛋糕，有啲士多啤梨同好多Cream，以為會好膩，但其實一啲都唔膩，而且蛋糕好鬆軟又唔太甜，今次可以食番真係好開心！」
變落湯雞
今次她最難忘是在Delta Bird Sanctuary睇雀仔時落大雨，「因為呢個地方好大，點知行到中間突然落好大好大雨，諗住跑返去，但跑到返去已經變咗落湯雞。因為濕晒溫哥華又得攝氏3度左右，所以凍到不得了，係人生未試過咁狼狽，但又好開心，因為同小學同學同幼稚園同學一齊跑，好似細個嗰陣時咁，好有童年回憶，返番去那些年嘅年代！」嚟緊她會忙「妍亮生命慈善基金」的探訪活動，以及明年亦會繼續進行她入行20周年的巡迴演唱會，一月中將會是廣州站，所以她又要趕緊Keep Fit和練歌了。
