發佈時間：16:00 2025-01-18
現年36歲的唱作人馮允謙（Jay），在2011年勇奪《超級巨聲3》的亞軍入行，近年終闖出頭來！在早前舉行的叱咤樂壇流行頒獎典禮，他被外界睇高一線狂擸大獎，結果大熱倒灶，被MIRROR成員陳卓賢（Ian）力壓，失落唱作人和男歌手金獎，以及「至尊唱片大獎」。難怪Jay坦言有感失望，就連網民也洗版戥他不值！
日前，本刊就發現，心情直插谷底的Jay，聯同一名長髮索女坐車返回將軍澳的寓所，下車時愁眉深鎖，於是不惜拉着女方當「樹窿」，到樓下的公園狂呻，講足成個鐘才放人離開。
延伸內容：馮允謙超寵粉 逐一聆聽歌迷心聲 簽唱會簽足5個半小時
入行走陽光路線
馮允謙勇奪2011年《超級巨聲3》亞軍而入行，一路走陽光氣息路線，唱得之餘，又通曉作曲及編曲，才華洋溢，且多年來保持健康形象，就連資深女歌手陳潔靈，也稱讚他是年輕歌手的典範。去年，Jay第3度舉行個人演唱會，門票開賣首日，已火速售罄，大收旺場。此外，他最近還進軍大銀幕，首次參演電影《得寵先生》。
延伸內容：盧慧敏好懷念被狗仔濕吻 爆料馮允謙首日開工 狂問26次：你緊唔緊張？
成績不似預期
形勢大好的Jay，外間預期會在今屆的樂壇頒獎禮上大豐收；可惜，繼在新城頒獎禮中捧蛋後，另有多首歌打入「903專業推介」的他，事前曾被看好可成為「叱咤樂壇唱作人」金獎或男歌手金獎得主；最終，Jay被MIRROR成員Ian揮低，兩項獎僅得銀獎，就連「至尊唱片大獎」亦輸給對方。不少網民都對賽果不滿，留言替Jay抱不平，既鬧Ian，又轟張敬軒為Ian打人情牌。
事後被問及未能奪男歌手金獎的感受時，Jay直說：「話冇失望係呃緊你哋，所以拎獎隨緣啦，都替Ian高興，佢都寫好多歌，佢都有自己嘅演唱會，就嚟又巡迴，惟有出年再努力啦！」而身旁的同門師妹雲浩影也無奈的說︰「我失望呀！我真係好期待！我由今年年頭睇住佢有幾咁努力寫歌。」
搵啱「樹窿」解愁
大熱倒灶，Jay的失望之情，人人皆見。日前，他連同一名長髮索女，乘車抵達其將軍澳寓所樓下時，心情似乎仍未平復，依然鬱鬱不歡。昔日在訪問中，Jay曾透露在低潮時，愛以音樂抒發情緒，因而創作了逾千首Demo。
這次成績不似預期，滿肚委屈，Jay於是帶着長髮索女走到附近的一個公園，當女方如「樹窿」般大吐苦水。講得激動時，他更情自不禁地乸埋口面，不快之情躍然紙上。期間，女方也耐心地聆聽，並不停出言安慰。擾攘了成粒鐘、Jay狂呻完一輪後，情緒明顯鬆弛下來；而女方見他有番笑容，才安心送他上樓。
終於吐氣揚眉
在港出生的Jay，1歲半時隨家人移居加拿大，因為父親要留港搵錢，照顧他三兄弟的責任，便落在母親身上，所以母子感情要好。自小熱愛唱歌的他，13歲便自學結他，17歲開始創作歌曲，在當地大學的市場學系畢業後，便回港參加《超級巨聲3》，勇奪亞軍後，便展開星途。
縱使Jay有音樂才華，但始終是回流，初期發展緩慢。2017年，他約滿TVB後，收入跌至零，陷入事業低潮。他曾透露，為減低支出，除多留在家外，又與孖生弟弟Tim一起去試食會吃免費餐。其後，Jay獲到寰亞青睞，收歸旗下。2020年，他推出專輯《Awaken》，終吐氣揚眉，受歡迎程度與日俱增，前年還迎來首個紅館演唱會。
延伸內容：馮允謙紅館個唱自爆因衛蘭入行 觀眾熱情全場起舞大合唱
婚期一拖再拖
至於感情方面，Jay有一個拍拖多年的空姐女友Crystal，無論順境或逆境都在他的身邊，故於2020年已訂婚，但因疫情而令婚期一拖再拖，他坦言：「女朋友都支持我先努力工作，雖然未有結婚計劃，但我一早已認定她，我心裏面只有她一個！」雖然今次失落大獎，但獲得很多人的認同，Jay其實都已經贏了！
《東周網》獨家「質詢」馬清鏗「小三」五索，足本訪談內容已上線，快啲Bookmark《星桄伴我心》Page喇！
即睇 : 獨家質詢馬清鏗「小三」五索“我係賤人，但我住山頂，你唔恨得咁多！”
《東周網》訪談系列節目《星桄伴我心》12月/1月重磅嘉賓：
即睇：肥媽攬屍唱情歌 憶亡夫飲泣 搵胡楓哭訴對話大公開
即睇：「黑妹」李麗霞2段婚姻3次患癌「我其實係一個軟弱女人！」
即睇：《異空感應》阮浩棕演技大爆發 罕談緋聞女友何沛珈 致電某人激動爆喊真情流露
即睇：劉江「講呢啲」｜ 結婚51周年，分享獨門退讓心得｜爆周潤發古惑招𠱁跑山
