最近，現年29歲的「東張女神」梁敏巧（Maggie），被Baby face癡戀的新聞，成為全城焦點；不過，當Baby face得知女神將他的求婚花束及7大承諾紙牌丟進垃圾桶裏，便立即決定轉移追求前「亞視一姐」薛影儀。而Maggie知道這個消息後，都祝福兩人能夠有情人終成眷屬。
現時，Maggie只想專心工作，希望可以賺多些錢，令退休的爸爸可以安享晚年，皆因她有一個爛賭母親，回想起當日媽媽的所作所為，Maggie淚流滿面，哭訴悲慘的身世：「佢（媽媽）可以忍心放低我同哥哥喺一個大廈嘅管理處，然後自己走咗去賭錢，到今時今日佢都係死性不改。」結果，梁媽媽輸掉安居樂業的單位，弄致全家人顛沛流離。

延伸內容 : 《呃錢》肥仔自爆對梁敏巧心動原因 開出7大承諾求愛

延伸內容 : 《呃錢》肥仔誓言30日媾掂「東張女神」 獨家直擊梁敏巧被攔途求婚

延伸內容 :  「東張女神」梁敏巧「胸」猛開班　靠5個動作煉成42吋長腿　踢走X型腳！

可以同Baby face做朋友

在無綫節目《呃錢》中，苦主黃先生（Baby face）竟然對主持人「東張女神」梁敏巧（Maggie），生滋貓入眼，還揚言30日內要追到女神。坐言起行的他，買齊鮮花和戒指向Maggie求婚，頓時成為了全城熱話，就連無綫台慶大日子，也找來王祖藍扮Baby face，且成功求婚。

不過現實中，Maggie就拒絕了Baby face，但她卻為對方說好話：「大家又唔好諗到Baby face係一個癡漢，其實佢都好正常，可能因為太想要戀愛，先會有呢啲行徑啫，佢都冇對我做過任何嘢。」

Maggie又坦言，兩人其實可以做朋友；可是，當Baby face知道女神將他所送贈的7大承諾紙牌和花束都丟進垃圾桶後，便瞬間死心，繼而決定轉追前「亞視一姐」薛影儀。而Maggie知道這個消息後，都表示支持，兼希望Baby face能夠找到自己的真正女神！她笑言現時是事業拼搏期，完全沒有考慮兒女私情。

爸爸靜雞雞放錢在自己銀包裏

Maggie之所以拼命搵錢，全因想今年8月退休的爸爸能夠安享晚年，她直言爸爸是她最疼錫的人：「公司俾機會我，我要好好把握，其實選完港姐簽約之後，我幾乎有9個月係零收入，因為公司冇底薪，作為一個新人，又唔知道公司嘅運作，都唔敢出去搵工，20幾歲人又唔夠膽問爸爸攞錢，當時好迷惘！唔知自己嘅路點樣行，𠵱家喺《東張西望》能夠有咁多嘢做，其實真係好幸運！」

當年初入行，梁父知道女兒不夠錢用，於是靜雞雞放錢在她的銀包裏，但卻令Maggie心痛不已，她憶述：「當我知道爸爸塞錢俾我，我係好唔開心，感覺好無助，覺得自己好冇用！其實，佢一直都唔鼓勵我入行，選完美之後，當時我哋係分開住，我住沙頭角，佢日日管接管送，知道我要節食減肥，佢日日整營養餐俾我，佢真係一個絕世好爸爸！」在Maggie的印象中，爸爸年輕時是一位嚴父，但

現在就似足一個小朋友，經常會嗲她，一日兩個電話問候：「我𠵱家工作忙咗，又冇同佢一齊住，少咗時間陪佢，我都有啲內疚。」她強調自己的首要擇偶條件，就是要錫她的爸爸。

梁母賭到將居住單位變賣

儘管有一個廿四孝爸爸，但Maggie坦言自己在一個不健康的家庭中成長，皆因有一個爛賭的媽媽。梁母賭到將一家居住的單位變賣，而幾百萬元只消3天便賭光，她眼泛淚光的說：「記得我好細個嘅時候，我放學之後第一個地方就係去麻雀館做功課。我本身氣管唔好，麻雀館烏煙漳氣，搞到我𠵱家好多後遺症。每次媽媽同爸爸講，帶我同哥哥出街，其實就係去賭，佢最離譜就係放咗我哋喺大廈嘅管理處，之後佢自己去咗一街之隔嘅麻雀館賭錢，由天光賭到天黑，成5、6個鐘，先返嚟接我哋。」

梁母變本加厲 偷偷地將家人的資料作借貸擔保

在Maggie剛入行時，梁母變本加厲，將家人的資料、身份證作為借貸擔保，令Maggie不斷收到恐嚇電話及被貼街招，她嚎哭的說：「俾媽媽出賣嘅感覺真係好慘，嗰啲收數佬貼我街招、恐嚇我！我當其時真係唔識面對，其後我同爸爸講，不如我哋一家人一齊唔還錢，但係爸爸覺得呢個係佢老婆，係佢嘅責任，所以佢要一力承擔，令我有一種好無力嘅感覺，我真係希望我媽媽會改過，當我見到爸爸喊嘅時候，我真係有講唔出嘅痛。爸爸同我講咗一番說話：『如果你媽媽唔係咁樣，我好早就可以送你去外國讀書，或者係買啲樓俾你傍身，萬一爸爸走咗就真係冇嘢可以留低俾你。』」聽到這一席話，最疼錫爸爸的Maggie心如刀割，縱然梁母現時仍死性不改，但Maggie依然選擇原諒她，因為媽媽始終是媽媽，血脈相連。

即使自己在一個不健全的家庭裏長大，但Maggie仍然希望將來能夠結婚及生兒育女，她笑說：「其實，我係會結婚生仔嘅女人嚟㗎，早排識咗個睇相嘅師傅，佢話我35歲就會結婚，並且立即生仔。我覺得咁樣都幾好呀，唔使做高齡產婦，不過𠵱家嘅我，一定係事業為重！」Maggie的短期目標是完成心理學博士學位，而長遠目標則是可以在山區興建學校，讓更多貧苦的兒童有書讀。人美心善，「真•女神」本色！

---------------------------------------------------------------------------------------------

《東周網》訪談系列節目《星桄伴我心》11月重磅嘉賓：
黎諾懿夫婦互爆閨房樂事 慶結婚10周年
林保怡提名《金雞獎》影帝 送花冧李珊珊 激罕親揭秘密關係
周吉佩牀前唱歌送別：「爸爸聽到眼角滴淚，先至斷氣！」