發佈時間：19:04 2024-10-17
現年34歲的林子超前年參加TVB節目《全城一叮》，變身妖后跳唱《Lindylicious》、又晒肌跳鋼管舞，成功突圍奪下冠軍。林子超入行12年終捱出頭，去年成功上車過獨立生活，近日他更一再變身成為跳唱歌手，拍了一個魅力十足的MV。
相關內容 : 「一叮皇后」 林子超篤信風水住北角 一個人住400呎暖竇
歌星夢由喜歡郭富城開始
林子超近日就在社交網分享他第一首單曲《廢人美學》的拍攝花絮和 MV，片中就見他衣着超級性感，魚網衣加超短皮褲仔，加上扭籮撩人舞姿，實在妖味超濃。問林子超為何會有做歌手拍MV這個項目出現，他就話:「其實我由細到大都有個做歌手嘅夢想，因為我細個就已經好鍾意郭富城，但細個嘅時候覺得做歌手好難，要有唱片公司支持，才有錢去做歌，到現在就發覺做歌比較易，製作費用比以前平好多，現在我有能力去做，就好想去完成這個心願。」
子超坦言他這個年紀，又未夠歲數參加《中年好聲音》，又唔夠一班Gen Z勁去參加《全民造星》，故此沒有想過參加比賽來一圓歌手夢，但幸好自己入行多年認識了好多好好的音樂朋友，有一班音樂好友的助攻和支持下，子超就做了這首歌和拍攝了這個MV。
魚網衣加超短皮褲仔 意識好大膽
林子超舞藝超凡，首個MV就以跳唱為主打，對於MV中的大膽舞姿，他就話: 「識我嘅朋友都會諗起我都係跳舞，所以決定第一首出嘅歌一定係要跳舞歌，再加上因為自己細個好受美國跳舞文化影響，又想跳一啲冇香港男歌手跳過嘅舞種，所以就特登去學咗幾堂Twerking加咗入個MV，希望可以有個震撼眼球嘅效果。」
為了處男作可以給予大家驚喜，林子超坦言下了不少功，出錢又出力，成首歌籌備了足足一年時間，再加上自資六位數字，拍攝MV拍超過22個小時，所以當製成品出街的時候真的非常感動。「我以前想做一樣嘢一定係要靠公司，或者係等人俾機會，但可能而家時代唔同，自己創造出一個作品，滿足感同成功感真係好大。今次我首歌叫做《廢人美學》，主要係想講耍廢其實係種生活態度，唔係冇用或者係浪費時間，因為人一世永遠都有Up同Down，幾時係廢，自己定義，好好過自己嘅人生就可以。」
感恩班底好專業
「我自己都好感恩搵嚟嘅班底好專業，有Kendy Suen做監製同作曲，有之前幫炎明熹作《焰》嘅填詞人彭嘉維幫我填詞。而我嘅排舞師同Dancer都係而家炙手可熱嘅，佢哋分別做緊三個唔同嘅巡迴演唱會，劉德華陳奕迅同Twins，所以排舞淨排咗三次，一次齊人，就拍攝MV。」子超大讚導演年輕有為，有血有汗，導演的團隊雖然全部都是Gen Z，但拍攝出來的效果就非常理想，引來很的迴響，所以很感恩。
林子超曾做開胸手術 不畏生死積極圓夢
林子超14歲時已開始跳舞，之後入讀香港演藝學院修畢兩年制現代舞文憑課程，卻在2009年進行先天性心漏病徹底治療，一度入院做開胸手術。林子超2011年入加NowTV《CEO選拔賽》入行，曾擔任娛樂頻道節目主持，其後為追演員夢，於2015年不再續約NowTV，由於一度失業，戶口曾只得三位數字存款。林子超於2016年報名《2016香港先生選舉》，卻未能晉身十三強，但獲TVB監製睇中在兒童節目《Think Big天地》教跳舞，之後以自由身拍劇集《宮心計2深宮計》，獲得觀眾關注，之後簽約TVB成為旗下基本合約藝員，林子超最新的作品為正在播出的劇集《逆天奇案2》。
