發佈時間：18:26 2024-10-13
現年78歲的電影大亨黃百鳴叱吒影壇半世紀，打造多部打破香港票房紀錄及家傳戶曉的電影包括《開心鬼》、《家有囍事》、《最佳拍檔》及《葉問》等。當中過年必loop、32年前的《家有囍事》，黃百鳴和周星馳為氹「程大嫂」吳君如返屋企，合唱《相逢何必曾相識》：「wa pi愛，同腰怕er sit ki愛（我怕愛，同樣怕會失去愛）」洗腦至今，怎料黃百鳴早前在一個晚宴上，以石破天驚的「家有囍事」式唱腔，高歌MC張天賦的《記憶綿》，即成為網民熱話！黃百鳴變「黃百綿」！
所謂擒高擒低靠腰力靠腳力，已到古稀之年的黃百鳴精力十足，年過花甲更有六嚿腹肌，無私分享游水晒肌相，手瓜起𦟌腰冇贅肉，勁過唔少後生仔！要做到好腰好腎好男人，黃百鳴凍齡有法！
日日上磅月月斷食
甩頭髮同「三高」，是「男人最痛」，黃百鳴完全沒有以上「痛楚」！他曾分享保持健康之道，就是每餐只吃7分飽，不會吃宵夜，更每天奉行「168」，即是空肚16小時。「每個月都會斷食一次，畀身體休息一下。」
自律，也是黃百鳴保持鋼條身形之道，就是日日上磅！他說：「我好滿意而家嘅身形，我日日上磅，會維持150至155磅，若果超過157磅，我就立刻去焗身、跑步減磅。我有好多應酬飯局，我咩都吃，豬腩肉、雞皮同酒照飲照食，但我有自制能力，食到七分飽，就放低碗筷。」
黃百鳴的早餐，一定會有咖啡，另外會吃蛋、火腿、香腸、番茄和洋蔥，再配一碗牛奶麥皮。平日午餐和晚餐主要是在外用膳，周六和周日則是家庭日，吃家常便飯。「我平日只係飲家常湯水，例如西洋菜湯、青紅蘿蔔湯，我唔喜歡食零食，唯一喜歡係食花生，但有次睇報導話九粒花生等於一碗飯之後，我就好少食。」
做瑜珈做上癮
2009年黃百鳴拍攝電影《家有囍事2009》，由於久違幕前多年，當時有大肚腩的他，為了上鏡好看，花了一個月時間減磅。「我立即戒咗十幾年食宵夜嘅習慣，以前每晚食公仔麵或剩菜，飽到撐住肚皮瞓，其實係最容易積聚脂肪！當時為減磅，逢星期六、日健身一小時。嗰一小時，係先跑步半小時，之後舉20磅啞鈴。練肌肉，就舉70磅重鐵餅。一星期健身一至兩次嘅習慣，一直維持到依而家。」
早年因疫情關係，未能去健身中心，黃百鳴請了瑜珈導師上門私人教授，自此愛上了瑜珈。「初時拉筋會覺得辛苦、難度高，但兩、三個月後，我完全做到。以前我去影身份證，身高178cm，年紀大縮水變咗177cm，點知有次做身體檢查時，發現高咗2cm，竟然179cm！」
黃百鳴每天會抽至少大約半小時進行瑜珈，有圖有真相，見他長年在社交平台分享做瑜珈的相片。相中的黃百鳴明顯腰力及柔軟度不錯，自如應付高難度動作，包括以滾筒借力，手臂支地，腰挺直雙腳朝天等。有心又有力，黃百鳴說保持活力，心態很重要：「你成日覺得自己年輕，你就會年輕！」really？
>>按圖即睇晒肌照及做瑜珈相<<
