發佈時間：18:48 2024-10-14
歌手林奕匡（Phil）和太太李靄璣（Rikko）今年8月正式升呢為家長級，囝囝 Darrien 出世，共同組織三人新世界！林奕匡為愛兒特別創作的新歌《搖籃下的歌》已上架，但他想不到的，是一早寫好的歌詞，竟然是神預言！
林奕匡說初時知道要當父親時，即有不少創作靈感：「知道就嚟做爸爸嘅時候，已經有好多想法，即刻寫咗好幾首歌俾 Darrien，當時一心只係想用嚟記載同送 佢，至於有冇機會製作成一首歌，我自己都唔知道。」
當決定要做歌之時，林奕匡考慮到自己的歌庫中，以鋼琴為主的 ballad 作品為數不少，但以結他創作的比較少，所以他想要以結他創作一首歌送給 Darrien：「今次就以寫首歌送俾囝囝為由，邀請咗新加坡音樂人 Marcus 一齊創作，佢嘅結他有一手，過去佢都同過唔同人合作。寫《搖籃下的歌》嗰陣時我哋隔空合作，但好合拍，個零鐘已經寫好首歌。」
錄歌撞正囝囝出生
把歌曲交由林寶填詞後，林奕匡即安排錄音日程，怎料Darrien竟然提早出世！「錄音 schedule 一早決定咗，但唔知佢幾時出世，呢個就係天嘅安排，啱啱佢出院嗰日我就去錄音。其實好得意，情感上係滿滿，但嗰一刻其實好難錄歌，因為情感泛濫，不停係唱唱下就喊。」
邊唱邊喊，因歌詞句句入心入肺，如神預言般，完全說中了他初次跟囝囝見面的畫面與心情。林奕匡說：「我好鍾意呢幾句歌詞：『今晚心情 怕你亦也許難聽得懂幾句 唯願我枕邊跟你伴隨』BB 啱啱出世時，我推住 BB 保護箱行出手術室，當時媽媽仲喺手術室，得我同BB獨處半個鐘，當時我幫佢影咗啲相同影片，其中一條片，我有講到：『知道你唔知而家發生緊乜嘢事，亦都唔會有任何記憶，但係我會幫你拍低記載一下。』呢句歌詞，就好係我嘅心聲，現實生活中我真係實現咗呢個畫面。」
「我唔敢話《搖籃下的歌》係BB嘅專屬搖籃曲，但佢應該係聽得最多，因為我成日唱俾佢聽。其實我一早寫咗英文嘅歌詞，都可以話英文版係特別送俾佢，係我打從心底嘅創作，當中包括我嘅期待、盼望、未知、憂心、鼓勵、陪伴，各種嘅心情。中文版就係同大家分享嘅，因為我相信每個做父母嘅都一定有呢啲感受。」林奕匡說
新手爸爸雞手鴨腳
林奕匡說當爸爸後，出現不少雞手鴨腳的有趣事，更說「父親」這崗位，令他人生昇華去另一境界，多了份責任，更要懂得照顧身邊人。「作為新手爸爸，起初係有啲雞手鴨腳唔知點算，我咁大力，佢咁脆弱，佢成日郁身郁勢，我唔敢同佢鬥力，怕整親佢，驚又抱得佢唔舒服；而家佢硬淨咗，我又多咗經驗，兩個開始有啲默契，佢一日比一日認到多啲我，每日都會俾多少少表情，我哋嘅 connection 明顯愈嚟愈多，所以每日都愈嚟愈開心。」
