模特兒出身的何紫綸（Ann），2020年在嚴峻的「疫市」下開設養生按摩店，打算在商界大展拳腳，奈何疫情足足持續了3年之多，最終被逼「離場」。為了平靜心靈，她就開始學習打坐，繼而再接觸讓人洗滌心靈的頌鉢。怎料一學便愛上，早前還正式考牌成為頌缽治療師。

自從接觸了身心靈後，Ann已養成早睡早起的習慣，每天早上都會在其約700呎的香閨，開着平靜的音樂，向着窗外的園林景做瑜伽伸展運動，既洗滌心靈又可keep fit，一舉兩得！向來給人cool爆形象的Ann，原來愛收藏玩具黃鴨仔，家中擁有過百隻不同大小、條紋的鴨仔，甚至出外旅行時，她會在浴缸放滿小型黃鴨仔一起浸浴，可見她童心未泯呢！

心靈得到平靜

現年43歲的何紫綸（Ann），17歲就入行做模特兒，曾與張栢芝胞弟張豪龍拍拖9年，2015年，她與拍拖兩年的飲食界才俊Gary Lam結婚，後來因性格不合，目標不一致，最終在2018年離婚。結束了3年的婚姻生活後，Ann開始轉型做女強人，從商做生意，在疫市下開設養生按摩店，此外還有擔任個人形象造型師。怎料，疫情足足持續了3年之多，Ann最終被逼「離場」，於是選擇跟朋友的醫學美容公司合併，將損失減到最低。

由於投資失利，Ann當時感到有點壓力，為了心靈得到平靜，於是開始學習打坐，令她由內到外都得到改變：「有個師兄話我人好急，個人越急，做乜都好似好多沙石，所以開始學打坐，學咗之後，會清楚內心需要乜嘢，對人又nice啲！其實我以前對人都nice，但可能我個樣太強硬、俾人感覺好cool，𠵱家多咗笑容、慈祥咗、睇化咗，冇特別去追求對事業、愛情，冇咁執着，但仍然都會追求財富！哈哈！」

「後來接觸頌鉢，我好鍾意其聲音，第一次做就不停喊，係嚎哭，師兄話我內心可能積聚、沉澱了好多傷痛或者壓力，當我第二次做又喊，之後索性自學，咁就開始接觸頌鉢呢個範疇。開頭喺屋企做都不停流淚，做咗3個月左右開始好啲，之後跟咗個女導師學，就想真真正正想攞個牌，幫自己做完之後，就想去幫人！之後我轉用了音樂治療，用好多個鉢，不停敲擊，令到發出不同音樂，我自己開心，對方又好開心，因為音頻可以紓緩情緒，所以我決定向呢方面發展下，我𠵱家係一個初級導師。」

從溝通中學習

接觸頌鉢之後，令Ann改變了人生態度：「𠵱家鍾意同人溝通，好鍾意識新朋友，聽下佢哋個故事，同人溝通可以從中學習。我以前好封閉，唔係好想聽人講，𠵱家講嘢多咗，笑多咗，我覺得笑多啲個人都靚啲！能量唔同咗，吸嘅嘢都會更加好。」疫情期間，Ann亦培養插花及種植盆栽的喜好：「因為我鼻敏感又唔可以養寵物，於是選擇種植物，可以陶治性情，我以前養生店嗰度有棵盆栽（發財樹）之前養死咗，之後攞咗返屋企，竟然起死回生，越來越多葉，佢哋有生命，見到屋企插嘅花開，就會好開心。」現時Ann跟一班志同道合的朋友，合作了一個女性專屬平台「靈舍不同」，分享兩性關係，希望幫到有需要的朋友，打開國內市場。

收藏黃鴨仔

向來給人冷酷爆形象的Ann，原來是一位充滿童真的中女，其約700呎的香閨收藏了過百隻不同大小、來自不同國家，不同圖案的黃鴨仔，她說：「我十幾歲做model開始收藏到𠵱家，身邊朋友見到都會買來送給我，當中有來自不同國家、不同造型的鴨仔，我最鍾意rock友造型，好少見到鴨仔有爆炸頭、同埋彈結他，好rock and roll，成件事好有型，係一個夾band嘅男仔朋友送，另一隻身上有紋身嘅鴨仔，有個A字，代表我個英文名Ann，仲jel咗頭，好得意。另一對結婚鴨仔，係家姐在我21歲時送給我，當時佢話收到呢對鴨就永遠幸福快樂。鴨仔會着婚紗同踢死兔，我覺得好得意。其實好多都好有特色，我都好鍾意！我有時去旅行都會帶一些最傳統的黃鴨仔，放晒入浴缸，再點啲香薰浸泡泡浴，就會覺得好relax！」

刁蠻小公主

提到感情事，Ann自從2018年離婚後，雖然身邊一直有追求者，但真命天子至今仍未出現，笑言還要公開「招親」，而她對另一半要求，首要條件是喜歡做運動：「需要目標一致，一定要做運動。（喜歡做運動的肥佬？）我又唔介意，最緊要身體健康，我覺得做運動嘅人冇乜諗埋一邊，因為做完運動有安多酚，大家都會開心啲。唔好食煙，最緊要溝通到，因為我喺愛情方面都幾刁蠻，做一個小公主角色，雖然我都識照顧人，但我又鍾意被照顧，要懂得照顧我，當然都要有一定經濟能力啦！𠵱家自己一個住，覺得個私人空間緊要，唔需要成日黐住另一半，以前拍拖好黐身，長大後先發覺新鮮感好緊要。我𠵱家公開地招親！可能我個樣太cool，有啲人唔敢埋身，加上我係觀察型，好少做主動，觀察完一輪先會有下一步。」

造型師事業

一直擔任個人形象造型師的Ann，每小時收5位數人仔，收入相當可觀，同時找到自己的樂趣：「一直都有喺國內工作，教桌上儀態，好多太太來上堂，之前試過經朋友介紹，教過一個客人嘅內地女朋友，點樣去上落跑車，客人揸架法拉利出來，我教佢女朋友點樣上落，教咗3堂，覺得好有趣。有時內地太太來香港，我就做佢哋嘅私人形象指導，陪佢哋行街買衫，我覺得呢個行業好啱我，因為自己鍾意行街睇靚嘢，其實好少做模特兒會肯去做呢樣嘢，可能會有人覺得點解我會去陪人買嘢，但我又唔係咁諗，見到人哋開心自己又開心，所以我都會一直拓展呢個事業。」