直擊陪仔放暑假 揭陳山聰獨特家訓
陳山聰有仔萬事足│直擊陪仔放暑假 揭陳家獨特家訓
更新時間:00:27 2023-08-25
發佈時間:00:27 2023-08-25

現年46歲的陳山聰,在娛圈30年經過不少高低起跌,但隨着2019年,他跟圈外女友陳麗萍(Apple)結婚,翌年兒子陳霆軒(Jaco)出世後,便修心養性。剛於今年榮登「視帝」殊榮時的他,也不忘感激妻兒。

有仔萬事足的陳山聰,剛拍畢新劇《奪命提示》和客串新劇《新聞女王》後,便立即陪伴囝囝放暑假。繼全家去日本旅行後,日前,他又化身帶子洪郎,與Jaco到九龍灣睇teamLab展覽,去到邊都抱到實,縱使沒有老婆在身旁,他單獨湊仔都冇難度。儘管錫仔錫到燶,但陳山聰仍然為囝囝設立一些特別的家訓,並且要他必須遵守。

親子時光

今屆「視帝」陳山聰,近年家庭和事業兩得意!2020年囝囝陳霆軒(Jaco)出世時,父愛爆棚的他,更感恩得在社交平台留言:「人生馬拉松中最美麗的畫面。」此外,他還不時「放閃」家庭樂,一家三口幸福滿瀉。轉眼間, Jaco已經3歲了,稍後便入讀幼稚園K班;而陳山聰有份參與的無綫新劇《奪命提示》和《新聞女王》,剛於月前煞科,所以他現階段便做「全職爸爸」,陪伴囝囝放暑假。
日前,陳山聰撇低老婆陳麗萍(Apple),化身帶子洪郎,攜Jaco到九龍灣的Megabox參觀teamLab的光影體驗,同行還有一名外傭姐姐。為怕Jaco 一個人會悶,所以他們還相約了 Jaco的表姐芯芯作伴。現場所見,陳山聰先叫Jaco和芯芯到布景板前「打卡」,然後大大細細一行六人浩浩蕩蕩地排隊入內。
適逢入口處有一些玩具車展覽,向來是「車迷」的 Jaco,也忍不住眼望望。大夥兒在場內逗留了一個多小時,便轉場到附近的兒童遊樂場; 期間,Jaco坐在旋轉馬車上,開心得手舞足蹈;而陳山聰生怕囝囝樂極生悲,於是小心翼翼地望實。玩到攰,陳山聰抱着 Jaco去食薄餅醫肚,臨走時,他還教Jaco跟店員打招呼,而Jaco也聽話照做。

禁打『姐姐』

成為「人父」後,今年46歲的陳山聰,努力修心養性,他也坦言昔日後生時貪玩愛蒲,但自從 Jaco進入其生命後,立即變得嚮往家庭樂,並且經常搞家庭聚會,增加親子聯繫。由於老婆Apple要返工,他透露自己較多時間陪伴兒子,而他最着重Jaco要有禮貌,這亦是陳家的傳統家訓。此外,他對囝囝會恩威並施,「若佢冇禮貌、唔執嘢、打『姐姐』,我對佢都惡,會鬧爆佢!嗰刻,佢係好驚我,但又知我好錫佢,喊完咪𠱁番佢。」
 Jaco現時僅3歲,陳山聰對囝囝持開放態度,不會逼他升讀名校,反而想栽培他的喜好,譬如早前的兒童節,兩父子便在家中夾band,爸爸打鼓,兒子敲擊鑔鑔。看見Jaco玩得有板有眼,他感慨的說:「佢對舞獅嘅樂器好有sense,絕對係遺傳咗我,一班師兄弟都感受到我嗰份快樂。」
至於對Jaco的期望,在人生路上經歷過高山低谷的陳山聰強調︰「首要條件並唔係搵錢,係要佢學習做一個頂天立地,同埋有責任感嘅男子漢。」而他最想還是想生多個女,但一切順其自然。