發佈時間：11:00 2024-09-06
要知道，現在長者們要有「樂悠咭」，才能享有$2乘車優惠。
「我一早有啦！哈哈！」賈思樂笑道。
今年10月便70歲的他，笑言歲月為自己的外形，留下太多的痕跡。
「我係Lucky嘅，70歲仲鍾意玩，咁我仲有能力、體力吖嘛。我好鍾意修哥（胡楓）同羅蘭姐，佢哋係優雅地老去，我都想好似佢哋咁幸福。」
2024年，是賈思樂入行50年紀念，成為深入民心的「蝦仔」之前，生於澳門的他，是在台上覓理想的歌手。
「嗰一年，我喺澳門搭14蚊水翼船嚟香港，參加《聲寶之夜》（歌唱比賽），攞咗第3名就簽咗TVB做歌星。」
當時仍未有中文名字，他以英文名Louie Castro，推出首張個人專輯《Movie Star》。看着踏出第一步的痕跡，他輕歎：「嗰時太瘦嘞！我鍾意𠵱家咁，有番啲肉，唔係睇落好似唔係好健康。
「我𠵱家係OK嘅，雖然中過COVID之後，我嘅氣冇咁好，醫生都係話，可能係後遺症，呼吸冇咁順。除咗呢樣，其他Touch wood都OK。」
入行半個世紀，賈思樂早已看透行業定理。「呢一行就係咁，花無百日紅，唔會有人永遠都On the top。我每個Moment都咁Enjoy。呢樣做唔到，可以做吓另外嘅嘢。
「我喺舞台上面50年，仲係學習緊㗎！唔好話我好夠經驗，就乜嘢都識，呢個態度係好唔要得㗎。人係Always learn，只要活到老，學到老，就咩年紀都會Happy！」
賈思樂笑看人生，細味沿途風光，不需着眼數字，更不用「樂悠咭」。
Happy Together
當70歲生日遇上入行50周年，就讓賈思樂有開Show念頭。
「我啲朋友知道我開演唱會，都講笑咁問我係咪等錢使，哈哈！有啲仲話我，唔係退咗休咩。其實我係為慈善機構籌款，仲有係我貪心，想有千幾人同我唱生日歌，一齊開番個Party開心吓。
「我知道我啲朋友都好錫我，亦都好了解我，知道如果冇咩特別嘢，我就會好Hea，但係如果我好Focus去做一件事，就會開晒Turbo咁，所以就同我講：『50周年要做啲嘢慶祝，你唔可以咁懶㗎，你𠵱家好肥呀！』一話我肥，我就會好嬲！於是我就決定，喺10月自己70歲呢個月做埋，始終都係值得慶祝嘅。」
於是，其演唱會命名為「Happy Together」，就是為了同樂。
「唱歌，對我嚟講係好Happy嘅，而我嘅歌聲令到其他人都開心，咁我就更加開心！以前讀書，老師會問我哋畢業後想做乜嘢，我啲同學通常都係話醫生、律師，或者老師，係得我話想做明星、歌星或者設計師，啲同學仔都笑我㗎。
「到早兩年Reunion，我啲同學都唔係做佢哋想做，或者鍾意做嘅工作，到我笑番佢哋轉頭，因為我仲做緊自己鍾意做嘅嘢。不過，今次演唱會，我都有請佢哋嚟睇。」
明星、歌星是賈思樂的志願之二，而設計師，他也一早解鎖成就。「我不嬲都有設計我嘅歌衫，今次上台嗰5套衫，都係我設計嘅，連揀料都係我！」
即使是日常的造型，賈思樂也花足心思。「哈哈！其實係懶，𠵱家我成日戴帽，係因為我懶得Set頭咋，一戴上頭度就出得街，所以我去旅行，一見到靚嘅帽就咩款都買，用嚟襯衫，你睇幾方便！」
鬼仔
衣着以外，賈思樂的童顏仍得以保持，也是他有心經營。
「𠵱家我每個月，都會去醫務所做一次Treatment，唔係打針嗰啲；搽防曬都好緊要！但係最緊要，係保持心境開朗，我唔係一個愁眉苦面嘅人，都唔會成日Complain。每件事，我都會睇好嗰一邊，必要時就包容人哋，或者改善自己，兩樣都唔得嘞，就要放下。」
論放下，賈思樂入行時，也放棄了原本的工作，由原生地澳門，隻身到香港追夢。
「當時我每個月喺《歡樂今宵》唱一次歌，全職就喺我姐夫間公司做文員，每個月人工500蚊。甘國亮想簽我拍劇，我同我媽媽講，佢仲教我要有嗰個人工先好應承。
「點知甘生一開口：『我哋俾嘅錢唔多，得3,000蚊⋯⋯』我開心到後面嗰啲都聽唔到嘞，而且做戲係我唱歌以外都想做嘅嘢，所以我就應承咗。」
賈思樂坦言：「嗰時啲拍檔成日笑我係鬼仔，係㗎！我中文又唔識睇，講廣東話又唔正，但係我有自己嘅Uniqueness（獨特性）。甘生教我，演戲唔係扮嘢，叫我Be myself就得。」
做自己，除了是演技，也成了賈思樂的做人原則。
友共情
唔扮嘢，令賈思樂在娛樂圈這半個世紀，廣結不少真朋友。
「娛樂圈唔係好似啲人講到咁跟紅頂白，我好Lucky，識到好多好朋友。我記得2011年，我想做《蝦仔爹哋》舞台劇，於是自己去搵Sponsor，但冇人肯Sponsor，因為我諗住做一場，即係冇可能回本啦！既然冇Sponsor，我就自己Sponsor自己，按咗層樓去做。
「鵬哥、大姐明、阿戚（戚美珍）聽到我咁做之後，都問我做咩咁傻，但係我好想做得成，之後好多人知道呢件事，華仔、DoDo、祖兒、志偉⋯⋯斗零都唔收嚟做嘉賓，支持我呢個傻仔。我都冇諗過會賺錢，唔蝕我都偷笑啦！嗰時仲有收益，捐到俾大姐明嘅心晴行動添。同埋，我層樓贖番好耐嘞，哈哈！」
不是導人迷信，早已環遊全球的賈思樂，年少時也有求神問卜，當中就有不可思議的奇遇。
「喺我讀書嘅時候，去過搵一個Gypsy（吉卜賽人）占卜，好似塔羅牌咁。我抽咗幾張牌，當中有兩張我好記得，第一張係有隻雀喺個男仔側邊唱緊歌；第二張係一架飛機。
