要活出真我，往往都是知易行難，現實不免會讓人氣餒、灰心⋯⋯
「我好識得調節自己嘅心理狀態，好好彩地，我未試過遇到一啲事，令我覺得難捱到捱唔過。」
以上的一番話，出於憑《白日之下》的演出，榮獲本屆《香港電影金像獎》「最佳女配角」的梁雍婷（Rachel）口中。你大概會想，那是勝利者感言吧。
實際是，入行快11年、一臉童顏但原來即將31歲的梁雍婷，也經歷過一些「量地日子」，正如她於金像獎台上所說，多得其就讀浸大電影學院的恩師廖啟智，為她送上鼓勵與幫助，才令她有綻放光芒的時刻。
追夢從來不易，何況梁雍婷追的是演員夢，就注定更艱辛。「第一次想加入電影工業，係我16歲喺星光大道，望住個金像獎，我就諗有一日，要攞到呢個獎。到我考兩次都考唔入演藝學院，讀浸會大學拍第一套電影，我就發現，原來做一個演員，並唔係要追逐獎項，所以就放低咗呢個目標。
「到拍《白日之下》，我發現一個演員，除咗要盡自己本分演好戲之外，都有一種責任，去履行社會嘅意義。因為呢部電影，喚醒我最初想做演員嘅原因，就係同觀眾連結。」
要搭通線路，梁雍婷也相當現實，「我知道，要成為一個有戲拍嘅演員，難度係好高，所以我隨住自己嘅步伐去努力，希望有多啲嘅演出機會。」
明知荊棘滿途，為了忠於真我，梁雍婷選擇披荊斬棘，也要闖出自己的宇宙。

緣份

人與人的相遇，是緣份，對梁雍婷而言，《白日之下》除了讓她有走訪外地影展、手執兩個「最佳女配角」的榮譽外，也是她跟台前幕後，一次緣份的交會。
「我入行第一部電影，就喺阿簡（導演簡君晉）做臨時演員；同Jennifer（余香凝）喺2018年就一齊做過金像獎嘅《星。勢。力》成員；仲有周漢寧，我哋一齊拍過RubberBand嘅《First Date》MV。不過，拍嘅時候我哋都好專注，真係熟絡係宣傳嘅時候，到𠵱家都會Keep住見面。識到呢班咁好嘅團隊，係好大嘅得着。」
梁雍婷的善緣，不只來自工作，於金像獎台上，她不忘感謝已故智叔的教導，這天她真摯的說：「有時當我行得未必係好如意嘅時候，都會諗番起廖啟智老師教過我嘅點點滴滴。我好記得佢同我講過一個故事，係佢幫一個作品去Cast啲演員，當中有個男演員，第一次演得麻麻哋，半個鐘後佢再去撳鐘，請求俾佢演多一次。老師話，嗰位演員都係演得唔係咁好，但演員就係要不斷嘗試。
「我就會提醒番自己，演員呢條路，唔止要做好眼前呢一步，而係必須要知道，自己要面對好多挫折，點樣調適自己嘅心態，應對各種嘅困難，係好緊要嘅。」

Why Not Both

恩師的教導，終生受用；演繹的角色，也為梁雍婷帶來獎項，但她坦言：「我覺得自己啱啱先至起步，前面仲有好多未知要去探索。」
曾說過做演員要欣然接受自己的年齡，童顏的梁雍婷，笑言此優點並不構成她演戲的障礙。「我baby face得嚟，落咗妝個樣夠殘吖嘛，咁嗰個殘就係有一定年紀嘅滄桑。如果想我Young啲，加番啲遮瑕膏就可以！」
外觀不成問題，其作品多屬嚴肅題材，喜劇、小品相對較罕，梁雍婷也表示：「兩種我都好想演！喜劇係我好想嘗試嘅領域，因為我唔係一個好有幽默感嘅人，所以要從角色出發，去拿捏喜劇嘅節奏，對我嚟講係一個好大嘅挑戰。」
不愛Hea做的她，曾有段日子沒有工作，要靠兼職維持生活，而來自各行各業的打工經驗，令她至今仍可應用於本業上。
「以前經濟比較拮据，我係需要返Part-time，𠵱家就唔使嘞。我做過賣Frozen yogurt、叫人登記PPS（繳費靈）、返酒吧、賣菜⋯⋯我都好感激以前嘅僱主，佢哋對我好好，俾我逐個禮拜交更表；有時要Casting，都會包容我走開幾個鐘。」

表演狂熱

老掉大牙的三歲定八十，套用於90後梁雍婷身上，也100%合適。訪問這天，她以貼身小背心配搭寬鬆牛仔褲示人，跟走在潮流尖端的K-Pop女團的練習Look無異。
她聞言即哈哈大笑，附加一句：「我細個真係諗過做女團㗎！」
以為是隨口噏？她即繼續解說：「我細個好鍾意模仿，睇Twins、Cookies、早安少女組⋯⋯我仲同啲好好嘅小學同學，組咗隊『午安少女組』。嗰時仲係用緊菲林相機，我哋就影晒唱片封套，再去買CD，攞支錄音筆，錄自己cover嘅歌。明明Background music仲有阿Sa阿嬌把聲，我哋都照唱，我喺同學屋企過夜，錄好跟住仲逼Auntie聽。
「仲有我細妹，我不停灌輸我阿妹，要同我一齊成為女子組合！」
梁雍婷的模仿對象，還有劇集主角，「向海嵐做嘅《楊貴妃》，我就去文具舖買個紅色印仔，然後吸喺自己個額頭度，去做我嘅楊貴妃。
「我就係一個好有表演慾、好鍾意模仿嘅人，就係呢啲細細嘅種子，成為咗我想做演員嘅原因。」

愛是要爭取

表演慾、模仿慾強以外，問梁雍婷如何形容自己時，她直言：「我係素食主義者，因為10年前我睇咗有人喺西貢，特登揸車撞死牛，睇完好嬲好嬲！咁點解我仲食枱上面嘅肉呢？於是我就唔再食肉嘞。我仲好愛護小動物，支持領養同爭取兩性平等嘅人，就算第時結婚，我都希望係我向男朋友求婚囉。」
梁雍婷跟任職IT界的男友，是相識多年的中學同學，至今已拍拖5、6年。「佢由中學嘅時候已經知道，我好鍾意表演，𠵱家係超級支持我演戲。我好好彩，有一個好好嘅男朋友，當我有少少難過嘅時候，就會講出嚟，同佢講完之後就會舒服啲，咁我就可以繼續去面對現實。
「所以我想我係求婚嗰個，係認真㗎！我女性主義，又唔循規蹈矩，愛係要自己爭取！不過唔會係2024年嘅事，因為我同佢都想為自己想做嘅嘢努力，都未有成家立室嘅概念。」
未有路線圖，因為：「婚姻對我哋嚟講，係衝動而浪漫嘅決定，即係嗰下『我可以跪低嘞！』，跟住我就攞隻戒指出嚟求婚。但係佢話，佢唔會俾呢個場面發生，因為佢要同我鬥快跪低喎。」
這個畫面並未出現，敬請期待。

Pure Happiness

快樂，不以金錢、物質衡量，所以正常來說，一定跟450萬無關。
梁雍婷的快樂，其中一個來源，是她兩隻愛犬：同為3歲的唐狗Lucky和Zelda。
「我成日覺得養寵物，可以感受到生命最純粹嘅快樂。有時唔需要要求太多嘢，淨係見到自己愛嘅人、有嘢食，就已經好開心好開心！佢哋咁悠然自在嘅生活方式，對我都係一個啟發。」
她把兩名毛孩取名Lucky和Zelda，原因也並不複雜，「3年前，我同男朋友領養Lucky嘅時候，我哋都覺得好幸運可以有佢加入呢個家，於是就叫佢Lucky；到Zelda就係因為我哋都鍾意打機，覺得佢好似《薩爾達傳說》嘅薩爾達公主咁靚，同埋係我哋嘅公主，於是就叫佢Zelda。」
滿滿的幸福感，勝過買撈買耳環買金買樓，問梁雍婷當下的願望，她零猶豫秒回：「我兩隻狗健健康康就夠嘞！我喺Instagram見到，有主人帶啲狗去旅行，所以我希望喺有生之年，可以帶佢哋去一次日本旅行，睇香港以外嘅世界。」
你以為主人想Shopping？零物慾的梁雍婷已緊接表示：「日本係對寵物最友善嘅地方，可以搭包機，佢哋唔使困喺個籠入面。」
快樂，就係咁簡單。