叔叔，可以是親戚、長輩，也可以是「怪叔叔」，但王雙駿這個Carl叔叔，則早在本地樂壇享負盛名。
52歲的他，擔任歌曲監製的30多年來，雙手製作超過600首作品；跟他合作過的歌手不計其數，由陳奕迅、謝霆鋒，到柳應廷、吳林峰等，不同世代的歌手，也稱他為Carl叔叔。
「喺我廿幾歲嘅時候已經有呢個名，始作俑者係葛民輝。當時我同佢、蔡一智喺同一間公司做嘢，阿葛叫個仔嗌我，嗌完之後，成個Office都係咁嗌我，嗌到無論係前輩、後輩都咁嗌。對我嚟講，係一個好親暱嘅稱呼。」
這個稱呼，就如其作品般跨越世代，但王雙駿笑言，他當歌曲監製，只抱着一個宗旨：好玩。
「我享受由零開始嘅過程，就算過咗咁多年，呢個宗旨都係冇變嘅，人愈大，追求嘅好玩都會有唔同，但係萬變不離其宗，我都會咁Enjoy。
「監製嘅工作，係喺有限嘅時間入面，令完成品有最好嘅水準，所以我成日會將歌手推到懸崖邊，等佢哋自己爬番上嚟，咁先可以知道自己嘅能力所及。」
怎樣於有限時間把潛能最大化，不就是做人的高深課題嗎？

撰文☆吳靜　攝影、錄影☆梁比利　化妝☆Kris Wong　髮型☆Stone Cheng　形象☆Yee Li
服裝提供☆New Balance、Give Me A Ring、Gone Archive、Nialaya from SOLO、Gentle Monster from Puyi Optical
場地提供☆Moviemarks　設計☆黃郁濤

假公濟私

製作30多年音樂，王雙駿於3月才舉行首個音樂會，原來他初時都有所猶豫。
「成件事唔係我Initiate（開始）嘅，係《電笠》（跨媒體平台）邀請，開頭我都有啲懷疑，但後來諗到一個位，就決定要做嘞。呢個係一個好好嘅機會，俾我同一啲老朋友聚會，所以係假公濟私，俾我同新舊嘅朋友，嚟一個Reunion。」
說是音樂會，實質是王雙駿跟一眾友人，即嘉賓們：謝霆鋒、麥浚龍、柳應廷、李駿傑、吳林峰及& The Duo Band的派對，也讓他頓入回帶Mode。
「我識霆鋒嘅時候，佢得19歲，係個好『刺激』嘅人，完全唔理世俗眼光，喺我哋嘅創作入面，聽眾會聽到好熱血嘅火花。睇住佢由年少輕狂，慢慢展現出一種穩重。
「而講到影響埋我成個人生嘅，係& The Duo Band，令我學識咗好多時唔需要諗太多，玩咗先，令自己開心就夠。所以今次我揀歌唔難，因為我知道同呢班朋友玩邊啲歌係最好玩，我係好自私嘅，由自己出發。咁難得開Show，梗係自己開心咗先！」
快樂至上，其實王雙駿多年來對擔任監製，也有一定要求。「我希望做到嘅，係每一個歌手同我合作完一首歌，佢都有得着，有嘢袋落袋，而嗰樣嘢係令佢唱下首歌嘅時候，可以攞番出嚟用，好似技巧、理解歌曲嘅角度。
「我唔係嗰啲搵人唱Demo，然後叫歌手跟住唱嘅監製，我大部分嘅歌，都係度身訂造，由零開始。」

嘔心瀝血

王雙駿享受當歌曲監製的每個過程，享受到至今也沒有助手分擔工作，他呷一口暖水後表示：「無論係錄Vocal用1支咪，定係用10幾支咪去錄鼓，都係我自己擺位自己Patch（修正）。好多朋友問我，點解唔搵人幫手，但呢啲係樂趣嚟，咁點可以將我嘅樂趣分俾人？如果唔係咁做，其實好難做到咁耐。」
要數這些年來王雙駿的作品，大概要手執計數機才可，只說近年的話，當事人則可秒速點名。
「我近年花得比較多時間喺阿Jer（柳應廷）度，第一首歌同佢錄嘅，係〈水刑物語〉，我好記得第一個Section，佢係揦手唔成勢嘅，佢突然間唔知點樣去演繹一首歌，因為佢一路都係唱Cover（翻唱），全部都有Reference，突然間要佢由零開始，佢係唔知點算好。
「因為嗰時我同佢唔熟，可能仲有啲顧忌，但係好快，我推多佢兩次去懸崖邊，我哋之間嘅默契、信任就開始出現嘞。」
由2020年起，至今二人合作炮製過14首作品，包數個「三部曲」，王雙駿還以「嘔心瀝血」來形容。
「我見證咗佢嘅轉變，由〈水刑物語〉到〈坐看雲起時〉係最明顯，因為後者好難唱，無論係技巧上、情感上都係，而且歌曲係好『心』，即係講一啲好內心嘅嘢。
「加上首歌嘅Range好闊，初時都有啲阻滯，而轉捩點係，佢有個Friend嘅家姐有Cancer，佢哋有一個好深入嘅對話，拎到阿Jer內心嘅感受出嚟，就傳遞到首歌嘅感情。」

能力愈大

在王雙駿的音樂履歷表中，陳奕迅佔極大的比重，二人早於28年前初合作，他笑言，到現在跟這位多年夥伴，也是「傾偈多過做嘢」。
「同陳奕迅錄音都幾歎㗎，我就好似一個聽眾咁，好多年前已經係咁，Sit back and relax（一笑），佢自動波嘅。而且佢對唱歌好有要求，亦都好有點子，好多歌手會花時間諗點唱首歌，試唔同嘅Key，但佢係咩Key都得。
「我哋會花時間，研究唞氣位，唱埋邊粒字先唞氣。好多人以為陳奕迅錄音好快，其實唔係，能力愈大，個人就會愈貪㗎嘞！我哋一首歌會錄幾個Section，每個Section3至6個鐘，可能有3個鐘頭用咗嚟傾偈。我同佢都冇乜做嘢嘅心態，錄音又好，做演唱會又好，都係以好玩為基本。」
王雙駿又啟動回帶Mode續說：「我同佢合作第一首歌（〈反高潮〉）已經係咁，我記得當時喺夜晚錄，錄得唔係好順利，咁不如嗌個飯食吓先，食完我哋就傾偈，傾咗3、4個鐘，其實係Break the ice，因為當時唔係好熟，咩都講，音樂、屋企⋯⋯跟住錄音就好順利。」

慈父的Dear Children

生命中最重要的是甚麼？
家人？朋友？健康？財富？地位？
重視「好玩」的王雙駿，同時相當重視實用。看他的招牌帽子搭太陽眼鏡Look，其實並非追求外觀。
「我儲咗帽差唔多20年，因為我個頭比較大，香港普遍係冇我Size，咁我就去到邊買到邊，雖然今時今日買嘢，網購都好方便。
「平時我通常都唔戴帽，但上台嘅時候，帽同眼鏡我都會戴，主要係因為懶，戴帽唔使Set頭；戴眼鏡就因為我要成日周圍望，睇吓隊Band，有時仲要顧埋個Artist，有眼鏡遮住就冇咁覺。」
型格之下為實用，就如王雙駿的音樂人形象之下，實為慈父乙名。他右前臂的燕子紋身，是其身上4隻燕子紋身的其中一員，代表其一家四口。
而訪問這天，巨蟹座的他，稱要於下午6時前「交人」，為的不是趕收工，而是參與兒子的學校活動。
王雙駿生命中最親愛的，其實跟一般慈父無異。