香港首個泰國法科女師傅陳譽之，其實早在98年已經入行，不過當年她並不是一位玄學師傅，而是貪玩地參加了當年的「亞洲小姐」競選比賽，及後還當上歌手。
家族在泰國坐擁5間象神廟的陳師傅，香港的寓所只是她的度假屋，因為一個月只回來一次處理這邊的業務，所以一般只逗留4至5天。這間1,200呎、位於大圍半山的老牌豪宅，面對下城門水塘，陳師傅坦言：「好風水。」
此外，陳師傅在泰國忙到甩轆，每一天都彷彿在打仗，這裏就變成她的「避難所」，可以寧靜一下。

一圓歌手夢

現年36歲的陳譽之，是香港首個泰國法科女師傅；而家族三代都是法科師傅的她，曾獲得美國Discovery Channel邀請作嘉賓，另泰國旅遊局亦曾用她的肖像在香港宣傳，來頭不小！雖然陳師傅在玄學界贏在起跑線上，但年少輕狂的她，當年因為被花花世界的娛樂圈吸引着，於是在1998年參加「亞洲小姐選舉」，希望能夠成為明日之星。
縱使陳師傅最終未能當選，但沒有因此放棄入行。自小喜歡唱歌的她，於是向多間唱片公司毛遂自薦，幾經波折，終於可以圓夢，她直說：「以前曾經有機會見唱片公司高層，不過佢哋要做組合，自己又唔係sell身材、唔賣胸，但最終都有機會做歌手，仲攞埋最佳新人獎，叫做完成自己由細到大嘅音樂夢想，總算係對自己有個交代！」
在樂壇，陳師傅除一圓歌手夢外，還結識了不少朋友，她憶述：「當年真係識到唔少歌手朋友㗎，有好多都好friend添，唔想講係邊個啦，好似借人宣傳咁。不過，有一個我想講嘅，就係陳僖儀（Sita），當年我哋好friend 㗎，大家同年同月同日生，所以條命都有少少似，喺佢車禍死嗰一年，我爸爸同我講，叫我乜嘢都唔好做，立即飛返泰國收埋自己。當時，我有少少半信半疑，因為始終後生，但係爸爸真係好嚴厲咁樣逼我返去。當時我都有同Sita講，叫佢同我一齊去泰國收埋一下自己，由於我哋兩個條命有啲相似，但係佢屋企係基督教，始終唔係太信呢啲！不過，喺我游說下，為咗能夠超度Sita，佢哋屋企人最後都有用到佛教儀式喪禮。」

絕不養鬼仔

深知演藝界花無百日紅，陳師傅笑言：「細個玩吓啫，當年想做明星，咁咪參加啲比賽囉，做明星邊度咁易搵到錢呀！都係做番自己嘅家族生意好。」現時在曼谷、華欣、清邁、清萊都有象神廟的她，一年幾乎有五分四的時間都在泰國，但心繫香港的她，在港亦有一個基地。這間位於大圍的老牌豪宅，是陳師傅在前年才搬過來的，「我幾乎每10年就搬一次屋，因為要跟住啲風水嚟走，兩年前，因為準備進入九運，所以我搬咗嚟呢度，有山有水，雖然我逗留嘅時間唔多，但係都要好風水。」
這個單位面積約1,200呎，裝修清幽簡潔；然而，每個角落陳師傅都花盡心思去布置，她坦言：「我泰國嘅屋企有成4,000呎，呢度唔使咁大啦，我一個月只係返嚟一次，幫客人做吓嘢，同埋返嚟唞一唞。因為泰國嘅業務，真係好繁忙，廟宇香火鼎盛；而呢度除咗少少風水擺設之外，連插一炷香嘅地方都冇。」
屋內的最大特色是，有很多畫作及擺設，原來陳師傅每次去旅行，都會購買一大堆富有當地色彩的擺設，例如花樽和雕刻品等，不單止可留下一個紀念，亦可以粉飾家居，她笑說：「我好鍾意花，所以買得最多就係花樽。雖然我唔喺香港，但係我會定期請鐘點姐姐，買上嚟幫我換花。間屋多啲花，我就會多啲人緣，做我哋呢行人緣好緊要。呢度每一個角落嘅擺設都係我親手構思嘅，我係一個好念舊嘅人，所以有好多都係比較舊嘅物品，包括：廚房裏面嘅所有電器，只要唔壞，我都會留低；又譬如：我用緊嘅屋企電話，都係好舊款嘅。有好多朋友嚟過，會笑我呢度似一間博物館。」而鄰居衛蘭、衛詩，知道陳師傅鍾意畫作，都特別親手為她創作了一幅油畫，令她甜在心頭。
陳師傅表示，很多人都對法科師傅有誤解，以為師傅的家中一定是滿天神佛、養滿鬼仔，她強調自己養的是古曼童，並非鬼仔；而她所養的1,080個古曼童，全部都放在泰國的家裏供養，所以她需要定時請和尚到家中，為古曼童誦經加持，她透露：「我係會定時到醫院、廟宇收養佢哋，因為呢啲嬰靈，係人哋墮胎，令到佢哋流離失所，我收養佢哋，係能夠幫自己積陰德、升運。我會定期請和尚過嚟屋企食飯，等和尚幫啲嬰靈誦經，每日我都會預備一碗好大嘅飯，同埋一杯好大嘅水，並且插香供奉佢哋，夠時間佢哋就會投胎轉世，我就功德圓滿。」善哉、善哉！