發佈時間：17:59 2026-01-01
踏入2026年元旦，在凌晨2點52分，threads上突然出現一段貼文：「跨年喺K11玩出軌」，有片有真相，這段被「捉到正」的偷食片，不單是2026年捉姦第一炮，更立即成為網民熱話！
片中見到一位穿白衫短褲晒長腿的港女，在尖沙咀K11商場一角，欲把一位男士推埋牆。該位拿着手機的港男，曾有彎腰等動作想逃辦，但港女「壁咚」成功，把港男推埋牆並展開審問對質。未幾港女眼火爆，大大力「啪」一聲，狠狠的向港男摑了一巴，力度大到連港男都拿不穩電話，成部電話飛落地。就地正法公開行刑後，港女和同行的拍攝者一起離去，而硬食兜巴星的港男，只是急急拾回手機，片中未見他上前追回港女。
設局引賤男出動
發帖者正是公開施刑的港女，她稱沒有陪男友倒數過年，但想不到成為對方身痕「覓食」的時機。天網恢恢，身痕港男利用另一IG小號搵女，竟然陰差陽錯下，找正港女的閨密！
港女說：「啱啱好我個friend話要搵仔，呢條友（男友）就去DM佢（閨密），因為佢（男友）換咗Account，我唔知嗰個係佢，（閨密）send相我先知。」發現男友色膽包天，港女決定和閨密決定自導自演，設局讓閨密答應港男赴約，相約在K11見面，因此上演這場大龍鳯。
港女指男友偷食已是夠渣，另一渣男行為，是港男超孤寒：「我就叫我個friend試叫佢要出嚟一齊跨年，佢話好，坐的士過嚟，仲要問我個friend攞（的士）錢。」港女更公開賤男男友的「特徵」，包括指他是2008年出生、在屯門區住等，又指他常用某組字眼來開IG帳號：「經常會開好多帳號，之後又整到自己封咗個號，其實係換號（方便）佢搵其他女， 然後佢就話IG被封咗要加你WeChat。」
網民讚打得好
可能港女嬲到火遮眼，發文時語意不清，網友猛話睇唔明，有好心網友替她「翻譯」，才令廣大網民得知來龍去脈，而港女亦謙虛回應：「太急發文，下次注意啦。」踏入新一年，即有大大粒生，網民當然食得開心，稱「打得好，睇得開心！」、「現場直擊，有誠意！」、「型到震！」
衰為食但難忍身痕的渣男們，以上故事對你們有何啟示？第一，唔該唔好手多多撩女友閨密，完全係地雷中的嘅核彈，近身三米獵物請忍手。第二，就算開100個IG小號，請不要懶，起個女友認唔出的名字，搵張新相做profile pic，AI完全幫到手，gen圖話咁易。最後，亦是最重要，就是世上冇免費午餐，出得嚟行預咗要還之外，出嚟玩當然要自費，坐的士仲問人攞錢，低級！
