現年38歲的謝東閔，最近憑熱播劇集《本尊就位》，人氣急升！日前，他接受本刊獨家專訪。參加歌唱比賽節目《超級巨聲2》入行，一向熱愛音樂的謝東閔，去年3月與吳業坤等志同道合的好友，合資7位數開設音樂中心，除希望培養小朋友對音樂的興趣外，還鼓勵對音樂有熱誠的人追夢。他坦言因為《中年好聲音》的效應，近年多了中年人報名上堂，就連被指是「魔音」的馮盈盈，亦有找他「惡補」！
至於女友朱智賢，為了登台演出也有到音樂中心練歌，但謝東閔笑言不會做其導師：「佢唔聽我講！」雖然不當女友的歌唱導師，但早前朱智賢行山時不慎弄致右腳骨裂，還超任性地去了福建飲宴，結果導致腳傷更嚴重，他就變身「柴可夫」及人肉拐杖，認真廿四孝！

「御用衰人」

從小熱愛音樂的謝東閔（Brian），18歲就開始跟隨已故唱歌老師戴思聰學習歌藝，他亦是戴老師生前最後一位徒弟。期間，Brian參加過不少歌唱比賽，並屢獲獎項，且於2010年參加TVB舉辦的歌唱比賽《超級巨聲2》，獲得殿軍，繼而入行。同屆冠軍為林欣彤，而亞、季軍則由胡鴻鈞和羅孝勇奪得。
不經不覺Brian已入行踏入第14個年頭，而入行以來，他以拍劇為主，近年更被獲安排多演大反派，譬如：《黯夜守護者》中的Big Boss、《你好，我的大夫》中的偷食老公，以及《旁觀者》中的加害者「馬子洋」等，都被網友稱讚他演得入型入格，還獲得「御用衰人」的封號！
提到演衰人演到出神入化，出街有否被人怒睥？Brian表示：「冇喎！有時仲請我飲嘢添！都只係近呢5、6套演衰人！嚟緊我拍嗰啲全部都唔係衰人，𠵱家啲人好叻，唔會話你做壞人去憎你，只會覺得你做得好或唔好。如果覺得我好衰，證明我有番咁上下演技；反而演衰人唔衰，就大鑊喇！」不過，在最近熱播的劇集《本尊就位》中，Brian不單止告別衰人形象，還「升呢」擔當男主角，飾演反應慢半拍、喜感十足的神仙呂洞賓，令粉絲為之驚喜！
除了演戲之外，Brian亦不忘對音樂的初衷。去年3月，他就與吳業坤、陳凱彤等幾位志同道合的好友，合資7位數在灣仔開設一間音樂中心，希望藉此培養小朋友對音樂的興趣，以及鼓勵一班熱愛音樂的人繼續追夢。他侃侃而談：「本身自己鍾意音樂，又係歌唱比賽出身，唱歌經驗都算豐富，亦識得一定的技巧，希望可以幫到一啲小朋友之餘，令到一啲大朋友繼續接觸音樂，繼續熱愛音樂。於是，我搵咗坤哥，同埋我以前個彈琴老師Patrick，仲有幾個歌唱老師，一齊搞咗呢一間音樂學校。我哋不只教唱歌，中心仲有樂器學，例如：管弦樂、色士風、長笛、結他、彈琴等。」

平反「魔音」

此外，Brian表示因為《中年好聲音》的效應，近年多了不少中年朋友報名上堂，就連被指是「魔音」的馮盈盈，亦有找他「惡補」提升歌藝！他透露：「我哋開咗之後，公司有好多藝員同事都有嚟一齊玩，有時想學唱歌、有時想拍吓片，我哋都會幫佢哋。甚至可以幫公司啲同事提升歌藝，等佢哋出去表演時可以好睇啲，現時有盈盈（馮盈盈）、Tiffany（劉穎鏇）、江嘉敏、何沛珈、蔡潔等，向我哋投下信心嘅一票。」
而Brian亦趁機為馮盈盈平反：「其實佢唱歌OK㗎！我有份幫佢，用我以前跟老師學唱歌嘅經驗去幫佢，希望佢可以regular（定期）嚟上堂。啲人成日話佢『魔音』，其實我聽過佢唱歌，又唔係真係咁『魔音』喎。佢平時上堂嘅時候唱，同埋喺台上唱係兩個人嚟，因為佢喺台上緊張啫！我遲啲幫佢拍條片放上網，幫佢澄清，洗脫『魔音』之名！」至於TVB「魔音」首席郭柏姸，就暫時未找Brian急救。
去年約滿離巢TVB的女友朱智賢（Ashley），為了登台演出，閒時也有到音樂中心練歌；可是，Brian卻說不會擔任對方的導師：「我唔訓練佢，由其他導師教佢，我教佢唔聽我講，哈、哈、哈⋯⋯呢度有7、8位導師俾佢揀。」另外，提到他和女友同樣喜歡運動，會否考慮開健身室？他直說：「有考慮過，但一切未確實。」

「本尊」唔急

Brian坦言疫情下幸運地一直有工開，一年半沒停過：「啱啱12月拍完套《企業強人》，𠵱家可以唞吓，3月先再開工，所以呢段時間，我係咁做其他嘢，早前先去完馬來西亞登台返嚟！（唔同女友去旅行？）唔會喇！因為屋企隻狗唔舒服，我唔可以同佢同時間飛走㗎。」
問到Ashley早前行山，落山時不慎弄致右腳骨裂需要打石膏，他如何照顧因女友？Brian憶述：「佢落山時整親，返到屋企腫晒，我仲以為佢拗柴，叫佢休息唔好周圍走，但係佢唔聽，仲去咗登台，又去埋福建飲宴，後來發覺一個星期都唔消腫，跟住自己走去睇醫生，照X光先知裂咗，要即時打石膏，要唞番2、3個星期。」期間，Brian 就變身隨傳隨到的「柴可夫」，以及任勞任怨的人肉拐杖，都說女人的任性是男人寵出來的！
兩人相戀逾7年，在今年的情人節，Brian便激罕地大放「閃光彈」，晒出與Ashley情侶裝，並輕搭女方香肩的「蜜」照，且寫下：「Happy valentine！」甜到漏！經歷過2020年的「人夫之亂」後，雙方的感情更加昇華；而結婚之事，就「本尊」唔急，旁人更急！