發佈時間：10:30 2024-02-24
做人如下棋，步步環環相扣，但一子錯，未必滿盤落索。
從表面看，陳湛文與林明禎，共通點大概只是一同演出過電影《飯戲攻心》，再於兩年後添食《飯戲攻心2》。
僅此而已？並不。
深層一點，二人都有夢想，同樣跟演藝相關，41歲的陳湛文坦言：「當俾唔到我生活嘅使費，我都會質疑自己係咪行錯咗，唔會後悔嘅，但總會有轉行嘅念頭。始終演員需要作品去練習，去印證自己嘅認知。好好彩地，我仲有得繼續行落去。」
33歲的林明禎，現在是來自馬來西亞的女神、BB，但她一路走來，並不容易。
「入行初時，我是第一次離家人那麼遠，一個人生活，嗰時真係日日打電話俾我媽媽，覺得自己好像做錯了決定，每天都覺得糟糕了！完蛋了！然後真的是自己慢慢去適應，一邊碰釘子，一邊學習。」
朝夢想進發，落子不悔。最大的障礙，從來都是自己。
撰文☆吳靜 攝影、錄影☆梁比利
化妝☆MinChen（林明禎）、
Lisa C. Makeup Art（陳湛文）
髮型☆Matt Chau（林明禎）、
Lisa C. Makeup Art（陳湛文）
服裝提供☆Kate Spade（林明禎）、
LAKH、New Balance（陳湛文）
眼鏡☆eye’s Buddy（陳湛文）
場地提供☆香港康得思酒店
設計☆黎志堅
人逢喜2
兩年前上映的《飯戲攻心》叫好叫座，珠玉在前，少了「子華神」的《飯戲攻心2》，難免有讓人比較的壓力，但陳湛文跟林明禎異口同聲表示，絲毫不覺有壓力。
陳湛文笑言：「劇本寫得好完整，完整到只可以容納到好微細嘅改動，因為一大改，就會引發骨牌效應，所以係冇改過嘅。」
林明禎則以國語及廣東話「雙語廣播」，「每一場戲，喺拍之前導演都會同我哋傾，問我們覺得怎麼樣，是我們達成共識後才拍的。」
戲中的二人，為搵食而走CP路線，各有不同的造型，陳湛文表示：「『柯南』裝對我嚟講係相對地輕便嘅；『黃金聖衣』就太椏柞嘞！不過啲工作人員話，嗰個Look喺我身上冇違和感，後來我照鏡，睇到都覺得係非我莫屬嘅。」
相比對手的金光燦爛，林明禎就愛上暗黑，「喪屍新娘個Look好特別，我把我的瀏海都梳上去，把我的額頭露出來，同平時好唔一樣。」
追尋修哥
《飯戲2》中有不少精警對白，當中包括「夢想成真，注定艱辛。」，令二人甚有共鳴。
聽到這8個字，林明禎即說：「夢想係艱辛嘅！我喺入行之前，夢想係做廚師，因為我好鍾意煮嘢食。所以我一直打工存錢，存了一筆錢，就報了名去澳洲讀廚藝。」
計劃趕不及變化，就在她準備負笈澳洲時，「我的照片在網絡上傳開，然後就簽了經紀公司，給我開了另一條道路。媽媽以前是駐唱歌手，入演藝圈可以說是她的夢想，她跟我說機會難得，於是我就入行了。
「當時我完全不清楚娛樂圈的運作，所以走來的路是艱辛的，有時候回頭看，也是覺得：嘩！好奇妙呀！」
陳湛文就表示：「自從今次見到修哥（胡楓）之後，我就覺得係要追尋佢呢塊天花板！因為作為92歲嘅人，佢仲可以咁享受演藝生活。做到92歲，其實係好難得嘅！」
年又過年
為賀歲電影擔綱演出，陳湛文跟林明禎，各自也有特別的過年模式。原裝港產的陳湛文表示：「我屋企係興擇日過節嘅，未必吓吓都係年三十晚食團年飯，我阿爸係會望住本《通勝》揀日子，就晒所有屋企人，睇吓邊日團年嘅。
「我阿爸嘅理論係，如果團年、開年嘅日子唔好，就成年都衰㗎嘞！所以我由細到大都適應咗，唔係正日做節嘅，不過有時正日又係我哋嘅好日，就會正日做節囉。」
來自馬來西亞的林明禎，過年的習俗，也許令不少宅男產生幻想。
「我們家裏會穿旗袍，就是穿上旗袍就像穿上了福氣，然後去廟裏拜拜，去人家的家裏拜年，把福氣跟其他人分享。」
踏入龍年，二人也有不少大計，歌手出身的林明禎，計劃這年回歸本業，「這兩年一直都有講要出歌，但是都冇時間，所以希望今年可以再用歌手嘅身份，同大家見面。」
陳湛文接着說：「我諗得簡單啲，有作品可以俾我繼續參與，就最好嘞！因為成個氛圍好似越嚟越難行，所以仲有得拼搏，其實係一種福氣。」
Search得到
網絡世界的發達，令資訊更流通，用例證解說，勝過反駁。
1. 方便度100%，方便到陳湛文和林明禎，都有用網絡搜尋器搜尋自己。
原因？陳湛文笑言：「通常都係做完訪問，唔知喺邊度睇番，所以我就Search吓自己。」
林明禎表示：「因為有一年，我拿過一個被搜索得最多的獎，我覺得呢個獎好特別，所以我就Search吓自己。」
2. 準確度>50%，純粹滿足網友求知慾，準確與否得啖笑。以陳湛文跟林明禎為例，於搜尋器分別打二人的名字，也會自動彈出「老婆」及「老公」的預測。
陳湛文聞言即大笑：「我都明吖！」
林明禎就一臉問號，「我似有老公咩？我係『擔心』嘅，啊！我係單身嘅。你哋唔需要擔心，我單身！哈哈！」
3. 成功率50%，同樣以二人為例，除各自的另一半，網友對他們的身高，也特別關注。不過，Google也解答不了陳湛文的身高，當事人笑說：「係175cm，但以前我Send CV嘅時候，我都會寫178cm嘅。」附帶意味深長的笑容乙個。
至於林明禎，159cm是對的，她還補充：「我好自豪我嘅身高，本來我好努力做瑜伽，就係為咗想去到160cm，但係都去唔到⋯⋯不過着咗鞋就有嘞！」
世事總有兩面，求真？靠自己求證好過，眼見都未為真，何況網絡資訊？
