發佈時間：22:03 2024-01-04
身為英皇娛樂集團營運總裁、有「超級經理人」之稱的霍汶希（Mani），由炙手可熱的廣告模特兒，退居幕後轉任經理人，謝霆鋒、容祖兒、蔡卓妍及鍾欣潼等，經她悉心栽培下，時至今日，已是獨當一面的巨星，Mani一名，無人不識，在中港演藝界舉足輕重，以實力說話。
一步一生，闖出一片天，風光背後，Mani是他也是你和我，同樣曾在高山低谷間，付出血汗及淚水游走打拼，非純靠運氣。Mani接受《東周刊》副社長黃庭桄的「勵志人生」系列Facebook直播訪問，分享家庭、事業及人生的苦與樂，在五光十色但高壓的娛樂圈中，找到快樂的生存之道；在困局及危機中，自省自勉安然度過。人生故事娓娓道來，希望能給失意無助的你，盡付笑談中，共勉同行。《東周網》今天起一連三集，細數Mani不一樣的人生故事。
童年志願當老師
Mani貴為「最美經理人」，當經理人前曾做過模特兒，成為無數MV及廣告的女主角，包括吳奇隆《一天一天等下去》MV、許志安《雨後陽光》MV、和劉德華合拍百事可樂告等。然而她卻說童年的志願，是想當老師。
「童年志願係做老師，想做啲威水嘅嘢，哈！直至十幾歲時開始有明星夢。但好快就返回現實世界，因為試過追過呢個夢，知道拍得越多廣告，越熟口面，就會越少人搵你，之後都有諗過轉做歌手或演員，但好快冇諗呢樣嘢，決定搵正職。因為呢份工唔可以保證我每一個月有穩定收入，你今日有工開，但係可能要等到三個月後先至再有工開，我係巨蟹座，係需要安全感嘅人。」
不再追演藝夢，選擇當經理人，Mani完全無悔，認為自己做了最正確的選擇：「我選啱咗呢份職業，亦都好彩揀咗呢份職業，否則唔會搵到一份可以發揮我嘅長處、自己喜歡、既可以幫人又可以照顧家人嘅工。」
情牽英皇三十年
歲月匆匆，轉眼間Mani在英皇集團已任職三十年，她笑說初時以為自己「好勁」，但發現年資逾數十年的集團員工是多不勝數。Mani說公司的凝聚力，以及老闆楊受成博士的個人魅力，是員工忠心不二的關鍵。即使曾被甘言厚幣挖角，但Mani從未有絲毫心動，因一直感恩及緊記老闆及團隊，對她無私的支持及付出，認為今日的成果，不是一人打拼出來。
「我性格念舊、需要安全感，唔習慣新環境，唔喜歡冒險，雖然真係有人畀我一筆好大嘅跳槽金，但我完全諗都冇諗過！唔想一時間為咗呢筆錢，而唔睇未來漫漫長路。外間一直覺得我係成功嘅經理人，其實背後有好龐大嘅團隊支持我，絕對唔係我個人嘅功勞。」
醉爆行兇 容祖兒救駕
Mani在香港娛樂圈如魚得水之時，突然離開舒適圈，由零開始，北上為英皇開發內地市場。打回原形，要做「開荒牛」，絕不容易，即使在香港娛樂圈游刃有餘，但跳去內地娛樂圈，就要適應及接受全新的模式。黃庭桄說最深刻的，是多年前在北京，和Mani及和多位電影公司老闆一起飯聚。飯局間見Mani在盛情難卻下，被老闆們多次要求「杯杯清」，杯接杯喝不停，深感當經理人絕不容易。自言當年酒量尚算不錯的Mani，說已不大記得當晚的情況。
「我又ok喎！唔算好難堪！唔開心嘅嘢，我唔會記住或記仇，只會記住邊個幫過我。不過我平時點飲都好，有個原則就係，要打直行返出去，要保持清醒，點都唔可以醉，一定要企企理理，因為我係代表公司，要知道咩場合做緊咩崗位。唔可以有借口，因為醉而失言或有唔好嘅言行。」
惟Mani也有失手時，更爭點醉爆下搞出人命！「最記得有次我係醉到箍住個朋友，唔畀對方走，我唔知自己好大力，箍到個朋友反眼咁滯，當時容祖兒喺現場，即刻幫手救我朋友，自此我同自己講，以後唔可以玩得咁癲！」
Mani做MV女主角逐格睇！
