發佈時間：17:28 2026-05-19
今年的母親節（5月10日），對2019年選港姐入行的網紅蔡嘉欣來說，特別有意義。事關32歲的她，2023年和圈外富貴男友Derek結婚後，努力造人多時，今年情人節宣布有喜，現已進入大直路，倒數見到BB的真身。「預產期係6月初，BB幾活潑，尤其去到後期，直情見到佢隻腳喺我肚皮踢咗一嚿尖尖出嚟。」
胎動的感覺，相信她會一世記住。至於對BB的期望，她說：「社會壓力大，我希望佢係一個開朗、樂觀、健談，唔好收收埋埋，識得同人溝通嘅人。」子女成才是錦上添花，身心靈健康最緊要。
增磅11公斤
即將踏入人生新階段做媽媽的蔡嘉欣，透露懷孕後重了11公斤，但基本上陀得幾幸福、幾開心，完全沒有大肚婆會孕吐的辛苦情形出現。
「好lucky，BB對我好好，最大改變係飲食口味唔同。懷孕頭三個月，好鍾意食酸辣嘢，中期之後日日都想食曲奇、蛋糕，明明以前唔係太鍾意食甜嘢。同埋啱啱有咗嗰陣，皮膚比較敏感，會生風癩，慢慢去到中期，免疫力就好啲。對腳水腫都幾嚴重，變咗好多鞋都唔啱着，哈哈！」
由於準備懷孕時有睇中醫調理身體，所以陀B後，她沒有刻意食補品，只是戒口拒食生冷嘢，謝絕酒精。問她老公有否當她是女王服侍？
她笑說：「冇乜喎！我不嬲都係服侍佢嗰個，我又冇要求要做女王，日日坐喺度唔郁。我繼續煮飯、洗碗、執屋，老公都好溫柔，好期待寶寶出世。奶樽、衫仔之類嘅BB用品，基本上已經全部買齊晒。我買咗大約10件衫仔，屋企人又買啲，朋友又畀啲，所以已經有海量嘅衫仔喇。」
閨密何依婷和陳詩欣都是媽媽級人馬，蔡嘉欣笑言不用開口問，兩人已主動過招教她湊B心得，「我哋個媽媽谷，日日都分享好多BB成長嘢。好開心佢哋懷孕先，變咗有經驗，我有咩唔明就可以問。」
更了解媽咪
蔡嘉欣好勤力，懷孕16周後開始，每兩、三日做一次運動，一直做到8個幾月，出現氣喘才停止。「𠵱家靜養為主，同埋開始每日讀故事書，聽音樂胎教，希望BB日後心情可以peaceful啲。」
相比起一般大肚婆，蔡嘉欣的懷孕生活多姿多彩，先後去過美國、首爾和新彊，寓工作於娛樂。「完全唔辛苦，勁輕盈、勁輕鬆。BB對我好好，有時都唔記得咗自己懷孕㖭！其實咁樣飛一轉好開心，因為BB出世後會忙，趁𠵱家仲自由就飛啦。」
問她幻想坐完月「放監」，最期待吃甚麼？她說：「唔係食壽司嗰啲，而係半生熟雞蛋，我好鍾意食流心蛋，忍咗好耐喇！反而冇乜欲望去旅行，想等BB大啲，一齊去親子旅行多啲。」
養兒方知父母恩，這些年來的母親節，她最難忘帶媽媽去了很多地方旅行。「透過旅行令我更加了解媽咪，佢好cute，心態好少女，有時我覺得佢好似小妹妹，要我照顧返佢。同埋佢開始老，我好珍惜仲可以一切去旅行嘅日子，𠵱家同媽咪仲熟過我細個嗰陣。」
距離「卸貨」讓媽媽抱孫的日子越來越近，生一個是否夠晒數？ 她笑說：「睇吓點啦，我老公話生一個喎。」
生一個又好，生一隊足球隊都好，只要一家人齊齊整整，便是幸福。
延伸內容：非常檢控觀｜吳子冲飾悲情哥哥令人心碎｜同「拜金港姐」蔡嘉欣拍過拖│情迷「豬肉婆」
延伸內容：人妻大鬥法︱ Coffee蔡嘉欣三點式晒火辣身材夠Hot 單文柔晒纖腰Amanda S.晒美腿吸睛
延伸內容：「拜金港姐」蔡嘉欣宣布離巢TVB！ 正式結束5年的賓主關係
