發佈時間：10:00 2026-09-04
今年38歲的何廣沛 （Matthew）笑言，從未想過自己會變成「狗奴」：「當初真係咩都唔識，因為屋企人怕小動物，我由細到大都冇機會養。」這一切的緣份，全因未婚妻苗承諾（Sarah）飼養的柴犬「柴太」而改變。
Matthew與Sarah一起之後，也愛屋及烏，擔起照顧「柴太」的負責，如今兩人一狗日夜相對，早已培養出無可替代的深厚感情。為了讓間中同床共枕的「柴太」，保持乾淨健康，Matthew去年更特意開創寵物清潔用品的生意，將對愛犬的無微不至，轉化成為一門新的事業。
關係迅速加溫
談起當初接觸「柴太」的過程，何廣沛 （Matthew）坦言，完全是一場意外的驚喜：「『柴太』原本係跟開我未婚妻嘅，但自從我哋一齊，搬埋一齊住之後，我就順理成章成為咗佢嘅新主人。」因為從未飼養過寵物，故Matthew起初對照顧狗仔一頭霧水；不過，憑着對另一半的愛，他開始主動學習，並由最初的恐懼，到後來包辦餵食、沖涼、放狗等，繼而兩人一狗的關係迅速加溫，最後連「柴太」的壞脾氣，他也全盤接收。
不少人都指柴犬性格固執，Matthew親身照顧後亦有同感：「我都有上網search過，柴犬係咩類型嘅狗仔，好多資料都話佢哋比較硬頸，我最初都唔信邪！」為了訓練「柴太」，他曾特地觀看了不少網上的教學影片，希望能教懂愛犬各種指令：「我有嘗試過令到『柴太』做到指令，不過佢就真係非常之硬頸，而且記憶力好似金魚咁，得3秒鐘咁咋！」
Matthew笑說，每次花了幾個小時訓練「柴太」拿玩具，當下雖然成功，但只要過了十五分鐘，牠便會打回原形，之後更當主人透明。面對愛犬「耍大牌」的性格，他只能無奈攤開雙手笑一笑。
萌生研發產品
因為「柴太」間中都會上主人的床一齊瞓，加上每日最少到外邊走兩次，所以牠的腳掌經常接觸地面污垢，環境衞生變得非常重要。Matthew分享說：「狗仔最主要係要清潔番佢嘅腳掌，因為腳掌同街道地下最大接觸。」他透露，自己本身患有比較嚴重的鼻敏感，加上「柴太」曾試過腳掌發炎導致行走時「拐吓拐吓」，令他與未婚妻都心痛不已：「睇見佢咁樣真係好心痛，所以喺家居清潔或者買寵物用品時，我都好着重成分同來源地。」
市面上的產品未必完全符合Matthew的要求，於是他便萌生自己研發產品的念頭，去年更正式推出寵物清潔品牌 ：「我哋最王牌嘅產品就係抹腳嘅，除咗清潔作用，仲加咗蘆薈成分去滋潤番佢嘅腳掌。」Matthew又表示，狗仔的腳掌行得多容易乾裂，但用了保濕成分的清潔產品後，乾裂問題便會大大改善，這份心思完全原自對「柴太」的愛護。
未來家庭規劃
飼養了「柴太」3年多，Matthew坦言自己的生活習慣和心態都有了極大的轉變，責任感比以往重得多：「以前年輕嘅時候出街食飯，可能會直落去唱K、玩通頂，但自從有咗『柴太』之後，好多時食完飯就會話：『我哋要早走啦，要返去餵狗、幫隻狗沖涼。』知道佢喺屋企等緊我哋。」
提及未來的家庭規劃，Matthew亦滿臉幸福地表示，很期待將來小朋友與「柴太」一同成長的畫面，他開心地謂：「經常都會喺腦入面有個畫面，如果他日我嘅BB同佢一齊成長會點樣呢？見到網上啲片，小朋友兩三歲攬住身邊隻狗仔一齊睇電視，嗰個畫面真係好warm，我都好期待呢一日嘅到來。」
從一個毫無飼養寵物經驗的門外漢，到今日視「柴太」如家人，甚至為牠開創一門新的事業，Matthew完美示範了甚麼叫「愛屋及烏」。
