人生需要甚麼？要贏在起跑線？還是經歷無數考驗的洗禮？名？利？Or both？
生於演藝世家，放棄原可於金融界的高薪厚職，也要投身演藝圈追夢的阮浩棕，就在入行10年、他33歲的今年，一次過於《萬千星輝頒獎典禮》中，獲得「飛躍進步男藝員」、「最佳男配角」及「最佳男主角」的提名。
呢鋪仲唔算係代表作？
他的答案是，未算。
「今年係特別嘅一年，我有3套作品，終於俾大家見到阮浩棕，記得我呢個演員。不過，視帝對我嚟講都係言之尚早。我希望假以時日，有能力去擔正一套20或25集嘅劇集男主角。
「我唔心急嘅，始終我仲有好多嘢要學，要慢慢學多啲、進步多啲，等自己真係可以孭得到嘅時候，先去接受呢個挑戰。」
雖然自知仍有所不足，但阮浩棕已得到網友支持，視他為「飛躍男」的大熱，他笑言：「我覺得我嘅演出，總算對得住網友嘅讚賞，但係仍然有進步嘅空間。獎項唔到我去控制，我嘅工作已經喺拍攝嘅時候完成，咁當然，我都好想得到認可同鼓勵啦！」
人生需要的，最基本是保持進步的上進心，才不會令自己原地踏步，那麼機會，甚至是代表作，就在不遠處。

越級挑戰

入行10年，今年阮浩棕憑《靈戲逼人》的演出，入圍「視帝」提名名單，他誠懇地表示：「原本我以為只係有『飛躍進步男藝員』提名，冇預計過『視帝』都有提名，始終我喺《靈戲逼人》入面係第二男主角，所以我仲諗住最多都係提名『最佳男配角』咋！
「我好有信心，唔會攞到『視帝』，哈哈！呢個獎就算係入到5強，我都覺得德不配位。」
說今年是阮浩棕關鍵的一年，大概也不為過，2013年考入藝訓班的他，因祖母是梁舜燕，令他貼着「上等孫」標籤多時，直至今年先後播出的《隱型戰隊》、《隱門》及《靈戲逼人》，作品替他成功討回應得的公道。
「我係嫲嫲嘅孫，係事實嚟嘅，我亦繼承咗佢嘅衣缽，亦都因為咁，我更加要裝備好自己，希望之後觀眾認識我，唔係因為我係嫲嫲嘅孫，而係因為我嘅演出。」
除了祖母，其實阮浩棕的父親、姑母跟叔父，全部都是電視製作人及演員，到了阮浩棕這一代，則只有他一人還選擇傳承這個「家族事業」。
「我表姐、哥哥都係圈外人，但係咁唔代表我會有任何甜頭。」

天外有天

說入行的決心，阮浩棕要到大學時期才萌生，中學時靠自修重讀考入科技大學，修讀工商管理時，因參加大學的音樂劇課程，喚醒了他體內的演藝因子，令他放棄加入金融業的念頭。
「我同媽咪約法三章，要完成大學課程先入行，所以我23歲先考藝訓班，入行嘅時候，我覺得自己一定掂嘅，𠵱家諗番，都覺得係心高氣傲咗。
「直至2017年，為咗突破自己，我決定走出自己嘅舒適圈，返內地工作，先發現天外有天。當時我爸爸已經喺內地做咗好耐，佢都話我去內地會學到好多嘢。」
不過，阮爸爸並沒有為兒子鋪路，隻身闖蕩的阮浩棕，也經歷過飾演主角⋯⋯的兄弟甲乙的日子。
「雖然冇咗穩定嘅收入，但係我嘅得着並唔可以用金錢衡量。我記得我喺一套網大（網絡大電影）《七劍下天山之修羅眼》入面，飾演反派『修羅王』，男主角係香港朋友冇咁熟悉嘅張倬聞。佢係中央戲劇學院畢業生，一場戲，導演都未出聲，佢已經可以俾到唔同嘅演繹方式出嚟，我喺現場真係大開眼界。
「而我，喺拍攝嘅時候，好多幕後嘅工作人員都讚我做得好好，我就真係覺得好，哈哈！到我睇番套戲，見到自己演出嘅畫面，就唔係咁滿意嘞，太浮誇。」

無悔追夢

訪問這天，阮浩棕推着小型行李箱，到達訪問地點，化妝、髮型他也一手包辦，是這10年累積下來的內功，也符合經濟原則。
「其實我有計過條數，交通方面，因為我住得比較偏，所以開工嘅話，飛的係平過自己揸車嘅；好慳㗎我，可以嘅話，我都會搭地鐵，唔會揸車。做呢一行，要儲錢真係好難。
「𠵱家我33歲，同級嘅同學，中學或者大學都好，個個都身居要職，有好多都買晒樓上晒車。」
問他可有後悔入行追夢，他即搖頭笑說：「我身邊嘅人實在太優秀，由細到大我都知道自己比唔上佢哋，既然係咁，我就試吓做自己有興趣做嘅嘢。
「到舊同學聚會，我啲同學反而係羨慕番我轉頭，因為我可以做自己鍾意做嘅事。係，錢未必會好似佢哋搵得咁多，但係我好有滿足感。」

信則有

凡事準備Plan A跟Plan B，通常是否穩陣啲？
以阮浩棕的個案來看，A跟B，更可以並駕齊驅。努力尋找演員的自我修養外，他的左手手腕上，還有「外力」支援。
「呢兩條水晶，一條係紫鈦金髮晶，有開發智慧同增加記憶力嘅功效；一條係綠幽靈，提升我喺正職上面嘅能量。
「我喺《隱形戰隊》播映前，開始戴呢條紫鈦金髮晶手鏈，之後我嘅IG follower，由2,500升到5,000，係以倍數增長，功效好似幾顯著。」
說到他現時的IG follower，已達11,000多，別跟國際級人馬相比，對一個默默耕耘的演員來說，數字已屬亮麗級別。
事業現曙光，也難免讓人想起，阮浩棕被指跟「《東張》女神」何沛珈相戀。一聞「女友」之名，他淡定地說：「順其自然啦！喺呢一刻，我一定係以事業行先。男人，始終要以事業為重，有事業，先有本錢去規劃未來；冇事業，冇一個經濟能力，感情世界點豐富都冇用。
「我係一個傳統嘅人，所以我覺得，結婚生仔係需要嘅，所以𠵱家更加要努力做嘢。」
即使計劃如何趕不及變化，信念還是可以如一。