發佈時間：16:30 2026-09-05
2019港姐亞軍王菲，和唱片公司太子爺兼歌手張子丰一向愛得低調，今日突然投下閃光彈，宣布已經訂婚。王菲大晒巨鑽：「我諗我呢世人應該唔會再遇到一個我咁愛而又咁愛我嘅人，當身邊所有人都同我講『呢個人真係好好』嘅時候，我想講『係啊我知啊！所以我揀啱咗啦！』往後人生，合作愉快。」
張子丰亦有撰文分享抱得美人歸的喜悅，寫下「2026.08.08」，相信是求婚當天的日子。他說：「曾經覺得人生好迷茫，但係你嘅出現，令我知道原來生活係可以好開心、好幸福咁過。然後有一刻，我知道呢個就係我想一齊過一世嘅人。我覺得，一定係個天派咗個天使落嚟畀我。」
充滿儀式感
張子丰充滿儀式感，選在日落前的黃昏時分，手捧大束紅玫瑰，在湖中央的小船上向王菲下跪求婚，加上親友在湖邊舉起「MARRY ME」氣球助攻，浪漫到爆，成功換來王菲一句「我願意」。
王菲指剛認識張子丰的時候，曾說他懶有儀式感，果然到求婚當日，貫徹作風。「但今次我鍾意。白羊座係一個超級三分鐘熱度嘅人（至少我係），但對住你每日都唔厭，想癡住攬住，每當有煩惱唔想理，就會萌生『想兩個人一齊逃離宇宙』嘅想法，所有嘢可以好簡單好平凡，好似只要兩個人一齊就乜都搞得掂，一齊放肆食一餐，一齊睇套好戲，就可以令我哋開心全日。好記得有次聚會我哋有個男性朋友攬住你，搞笑地講：『張子丰同我一齊啦！』然後你突然間好嚴肅地講：『唔得喎！因為只有同王菲一齊嘅張子丰先係the best version嘅張子丰！所以我冇可能離開佢！』嗰下，默默地好感動。」
婚禮未定
張子丰就表示，由最初好習慣自己一個人生活，到現在一個人睡覺會淆底，一個人起身又有點不習慣。「好享受每一次二人世界，每個Weekend搵地方玩、搵地方探索、搵戲睇，要一齊睇晒全世界嘅戲。以前成日有一個唔知屋企係邊嘅感覺，𠵱家知道，邊度有你有我，邊度就係屋企。『餘生多多指教』呢啲老土嘢唔講喇，總之以後我哋兩個拍住上，一齊繼續進步、繼續成長；一齊去探索呢個世界、感受每一分每一秒，精精彩彩咁過埋餘下嘅人生。」
一對準新人因合演《法言人》而撻着，宣布求婚成功後，李施嬅、洪永城、江若琳、陳曉華等大批圈中人留言祝賀。
張子丰其後接受傳媒訪問，透露今次求婚準備了一段時間，當日以拍攝為由，安排女友上船介紹，期間又擔心落雨兼打風，幸好最後順利完成。他指婚禮仍在安排，「慢慢傾邊度擺好，搞咩類型婚禮好，未係好急，要慢慢享受過程。」
圈中筍盤
張子丰是圈中筍盤，畢業於加拿大皇后大學電影系及心理系，爸爸是有「環星音樂會之父」之稱的環星娛樂老闆張國林，身家估計過億，因此張子丰常被媒體稱為「唱片公司太子爺」。他曾以歌手身份出道，奪得「新城勁爆新人王男歌手」，其後成立製作公司，亦有8級鋼琴資格。
