發佈時間：14:30 2026-07-18
英皇娛樂集團行政總裁霍汶希（Mani）昨日（17日）正日生日，一向愛錫旗下藝人的她，被公司上下聯手反過來送驚喜。曾比特（Mike）、湯怡（Kathy）、楊天宇（Angus）、李靖筠（Gladys）、曾傲棐（Arvin）、海兒（Hedy）、黃明德（Dark）、劉若寶（Polly）及一班同事秘密籌備party，等Mani開完會返公司即場有surprise。
曾比特黃明德帶頭全體唱生日歌
Mani一踏入公司門口，Mike即刻拿着結他跟Dark合體自彈自唱生日歌，全公司職員跟隨大合唱，最後連英文、廣東話及國語3個版本都唱勻，辦公室頓時變得非常熱鬧。
講到送禮物，Angus向Mani笑着自爆：「我買咗生日禮物俾你，但係唔記得帶擺咗喺屋企。」Mani一聽即刻追住Angus大叫：「拎個銀包出嚟，唔該。」場面搞笑；至於開餅店的Kathy，就親手製作蛋糕送給Mani，Mani一見即大讚：「呢個係全香港最好味嘅蛋糕，我話俾你哋知，仲要係靚女嘅出品。」許願時，Mani就將願望送給大家：「祝所有藝人都大紅大紫、工作順利。」
霍汶希派現金回禮變「派錢大會」
影完大合照後，向來跟藝人同事打成一片的Mani即時自動波話：「拎個電話出嚟搶利是。」全場即刻瘋狂歡呼。不過因為並非所有同事都在同一個群組，最後決定改為派實體利是，同事們都乖乖排隊等拎利是，氣氛熾熱高漲。
派利是期間，Mani忍不住笑着說：「點解無端端變咗新年嘅？點解生日會係我派錢嘅？CFO快啲攞啲錢出嚟吖，有冇錢呀請問？」由於事前完全未有準備，手上的利是派完後，Mani霸氣話：「派現金。」點知連現金都不夠，她邊摷袋邊抱頭問：「有冇人有現金呀？」引嚟全場爆笑，不過她即刻補充話：「大家記住，唔係講錢嘅問題，係Lucky Money。攞到Lucky Money就大紅大紫、身體健康、事事如意、要乜有乜。」
老闆楊受成經過發嬲指「唔請我」
正當大家玩得開心之際，英皇集團主席楊受成博士剛好「路過」，楊博士即問Mani：「你好大膽喎！生日都唔請我！」Mani無奈回應：「唔係呀，我唔知道佢哋surprise我吖，我招架唔住喇，攞晒啲錢出嚟派啦！」楊博士見狀即刻問：「使唔使要錢呀？」更即時摷袋準備出手，非常豪氣。
之後二人合照留念，Mani邊拿着利是邊跟楊博士說：「老闆，今日嚟講，我33年一直都搶你啲錢喇，我今日個個都派咗一封大家都大吉大利嘅生日利是，祝你身體健康、事事如意、生意興隆。」然後便親手遞上利是給楊博士。楊博士接過利是就搞笑話：「可唔可以補償返我30幾年嚟你呃我啲錢呢？多謝！生日快樂！」隨後Mani突然問楊博士：「咦，你諗住俾利是我嗎？」全場即刻拍手叫好，楊博士亦二話不說從褲袋拿出利是，場面搞笑。
延伸內容：霍汶希Mani擢升為英皇娛樂行政總裁 曾做許志安、吳奇隆MV女主角 因一個原因決心轉行！
延伸內容：霍汶希14歲女兒首露面 網民激讚基因太強 星味十足似舒淇
延伸內容：霍汶希公開逆齡3大法寶 真情剖白「終極後盾」是媽媽和女兒
