發佈時間：16:21 2026-07-08
有「法律系學霸女神」之稱的樂翊榆，畢業於倫敦的大學，獲得榮譽法律學士學位。回流香港後，她搞作多多，既投身演藝界，為HOYTV做節目主持，又成立自家的移民及全球身份配置公司。此外，她還剛擔任一間資產管理公司的客戶關係經理，另工餘時間又參與不少社區和慈善活動，認真百足咁多爪。
身份多籮籮的樂翊榆，近日就為自己設計了兩個全新的造型，大玩一黑一白格調，「因為社交媒體啲人覺得我造型悶，咪轉吓新意思。其實，我細個想做時裝設計嘅工作，黑色造型係以荷李活已故影星柯德莉夏萍作靈感；而白色造型係想反映自己鍾意大自然、放鬆嘅感覺，今次係個幾得意嘅嘗試。」喜歡黑白分明的她，坦言人如其心，行動作風一樣簡單直接，但往往遭人誤會為戰鬥格：「啲朋友話我係披着狼皮嘅羊，我好想讓大家睇到我內心一面，我外表好精明，但感情上卻經常被騙㗎。」
拒婚前性行為
堅決拒絕婚前性行為的樂翊榆，雖然曾經拍過多次拖，但往往不超過兩個月，便揭發對方有第三者，於是馬上斬纜了結；而現時單身的她，全力寄情於工作。對於HOYTV早前的內部變動，有否帶來影響？她直說︰「我一直係自由身，不過HOYTV對我好好，俾我主持唔同節目，仲可以分享玄學知識。我其實仲有品酒師牌，都有同監製講，希望有機會參與吓啲跟酒有關嘅節目。稍後，我會參與一個關於詐騙題目嘅電影，係飾演一個被騙嘅高材生。」
樂翊榆繼續分享自己的初衷︰「我揀讀法律，因為想透過做律師幫人解決紛爭，調解問題。適逢入咗娛樂圈，令我成為公眾人物，可以利用自己嘅影響力，做多啲社區活動，好似之前推廣選舉，我就向市民解釋參與投票嘅好處。另外，我相信生命影響生命，下一代係未來棟樑，所以我助養兒童、參加《共創明 「Teen」》計劃，擔任義務老師，以及成為菁英會成員、YActive青年大使等。」
Profile
姓名︰樂翊榆（Annalise）
身高︰167cm
體重︰45kg
三圍：32" 25" 34"
藝歷︰曾任平面模特兒，於2019年代表香港參加第48屆《Miss Intercontinental》選美，獲網民大讚為「翻版劉心悠」，又於2024年競逐第73屆「環球小姐香港代表」 ，可惜因決賽前夕病倒，而未能出戰。曾主持節目︰無綫J2台節目《沖遊泰國9》；HOYTV的《開運秘笈》、《女行團》、《好好生活在灣區》 等。
