發佈時間：15:27 2026-05-21
現年20歲、因參加第一季《聲夢傳奇》而被發掘的詹天文（Windy），眨下眼已經入行6年。當日的青春少艾，如今已亭亭玉立，更成為TVB現時最炙手可熱的歌手。早前，她在《唱錢》節目中表現出來的高音爆發力，實力超凡，難怪她一直被譽為「聲夢高音擔當」。兩年前，她成功考入國際知名音樂學府——美國伯克利音樂學院（Berklee College of Music）；不過，她最終決定入讀廣州的星海音樂學院，跟內地當紅歌手周筆暢、鄭源、劉惜君等成校友。
Windy坦言：「我嘅唱歌水準，因為讀咗呢兩年書真係升咗級，佢哋啲老師個個都好好，有好多人問我：『會唔會一個女仔過到去廣州讀書好唔習慣？』我又冇喎，因為我好鍾意食重口味嘅嘢，喺當地可以隨時嗌外賣，好方便，其實好鍾意當地嘅生活。」
可是，曾經在當地病倒的Windy，就一度思「香」，她憶說：「當其時我係因為皮膚出疹，好辛苦，咁一個人喺嗰邊，又真係幾慘嘅，平時喺香港都有父母錫我、照顧我，所以一個人喺嗰邊病就係最慘囉！」的確在家千日好，既有父母關懷備至，又有「天文台」（粉絲暱稱）的支持，難怪她表示自己甚麼都不怕。
接棒「一姐」
隨着，「聲夢人氣王」炎明熹（Gigi）蟬過別枝，令「星夢一姐」之位隨即懸空。同屬組合After Class成員的Windy，近期勢頭可謂一時無兩，故外界紛紛睇好她，可以接棒登上「一姐」的寶座。面對排山倒海的傳聞，她表現大方，直言會做好本分，以實力證明自己具備獨當一面的能力。
在歌唱事業上，Windy不停交出漂亮的成績，大熱作品包括：〈沒有你的新學期〉、〈大雕刻家〉、〈Seed of Truth〉等。最近，推出新歌〈無疾而終〉的她，透露在小時候只試過拍拖一個禮拜，所以在演繹這首歌時非常有難度，因為自己沒有這方面的經驗。Windy又表示聽到歌名時，也不知道如何代入：「呢首歌裏面嘅主角係我自己想像出嚟嘅，其實出嚟個效果，都唔係我想要嘅效果，舒文（歌曲監製）都幫咗我好多，幫我投入喺呢首歌裏面。」
現時，注重學業及事業的Windy，坦言對戀愛仍未有任何憧憬，不過如果將來拍拖，就希望可以揀一個身形比較高大的男朋友。
