發佈時間：13:13 2026-03-28
木村拓哉呢期好忙，喺東京揸完的士，轉頭又要走去學堂，黑起塊面教班新紮師兄，一唔滿意仲會拎張退學申請表出嚟，勸你唔好考警察，執包袱返屋企，咩事先？
戴番頭盔，木村不嬲nice開，上述後半段畫面只係《電影教場：驪歌》嘅劇情，仲講到第205屆學員畢業典禮臨近，危機四伏，木村飾演嘅鐵面教官「風間公親」，會令班學員感受到「震撼教育」嘅力量。
造型霸氣
有睇開日劇，都知木村拓哉唔止有《律政英雄》、《摘星廚神》系列搬上大銀幕，《教場》都一樣，由2020年推出首輯以來，長拍長有。故事最終章就改以電影形式同觀眾見面，前篇《電影教場：集結》已率先喺3月19日上映，後篇《電影教場：驪歌》就強攻復活節檔期。型開嘅木村，魔鬼教官造型充滿話題性，銀白頭髮，右眼裝咗假眼，輕輕一句：「跑！」已經氣場全開，霸氣十足。
舊生齊集
正所謂「嚴師出高徒」，木村都有苦衷，唔採取高壓教學手段唔得。呢班第205屆學生各有諗法，有人正義大過天，以打擊黑勢力為目標投考警察；有人純粹想打份工，亦有人有暗黑一面⋯⋯
最令粉絲開心，莫過於一班教場「畢業生」：大島優子、川口春奈、濱田岳同目黑蓮，以及後輩坂口憲二、染谷將太，知道危機逼近唔對路，再次走埋一齊。
親身謝票
木村為咗謝票，曾一日走勻福岡、大阪、名古屋同東京嘅戲院。當問到歷來最難忘嘅「學生」時，佢話：「北村匠海飾演嘅遠野，如果冇佢，相信風間唔會成為教官。而今次電影入面，金子大地飾演嘅笠原，同埋中村蒼飾演嘅若槻都係。記得我同中村大熱天時拍對手戲，拍到成個人濕晒。」
上映日期：4月2日
延伸內容：木村拓哉《東京的士：回憶里程》為養家做的士司機 接載日本影后倍賞千惠子聽經歷有啟發
延伸內容：木村拓哉「原味褲」值千萬！洗褲神器洗出「木村汁」：似Shabu Shabu湯底！
延伸內容：木村拓哉組大叔團玩過山車 逆天神顏反轉遊樂場 Keep fit竟然靠食呢樣嘢!
《東周網》訪談系列節目《星桄伴我心》3月重磅嘉賓：
即睇：「葵芳」蔡蕙琪爆拍《夜王》｜要剔「親密程度」點心紙｜與謝安琪秘密淵源｜感動黃子華搭膊頭鼓勵
立即追蹤《東周刊》全新WhatsApp頻道，緊貼全城熱話、突發猛料、獨家消息！
