發佈時間：14:13 2025-11-29
盧海鵬試咪，X你老母Y。」
作為香港人，應該人人都知鵬哥講緊乜，呢句亦係這次鵬哥訪問中，他講的第一句說話。
83歲開演唱會，宣傳海報稱之為收山之作，問鵬哥可是準備退休？即時就畀鵬哥試我咪。
「佢哋（主辦）強行安個名，就話我收山，我完全唔係咁意思。話盧海鵬收咪？點會收咪？試咪就試咪，盧海鵬就只會試咪，就係我講粗口，咁你𠵱家話盧海鵬收咪，即係叫我唔好講粗口啦？」
Well，而其實整個訪問過程中，鵬哥繼續試咪，中氣十足氣勢磅礴，殺氣勁過電影中的黑幫「大佬」，叫鵬哥收山唔好試咪？嘥氣啦！
鵬哥近幾年不時出席各種慈善晚宴、活動及聚會，我也見過他好幾次，有時看似精神狀態不太好，步行出入也要朋友摻扶。想不到這次開演唱會宣傳做訪問，鵬哥竟然精神奕奕，行得走得企得，當然更加講得、唱得兼「X」得。
「有病？乜病都好返晒啦！之前有相士話我過唔到79歲，家陣過晒啦！日日跑步添呀我（係咪同發哥（周潤發）一齊跑？）冇一齊跑好耐啦！我自己跑呀！」
鵬哥強調，這次是演唱會，不是扮嘢會，所以他會唱歌唱足2個鐘。
「我唱成晚都得，最多唱到冇聲！演唱會全晚玩即興，歌單已經在我腦裏，首首都是我的飲歌。」今次會請朋友們來睇騷兼聚會，但就應該不會有親人來睇。
「廣州的（親人）就死晒喇！加拿大嗰啲就唔知返唔返嚟。」
不過，古天樂和周潤發就有可能現身，鵬哥叫到，應該是不敢不來的。
BTW，訪問中鵬哥的「X」、「Y」與「Z」，我少寫，否則基本上整篇文每一句都有「X」、「Y」、「Z」。
半世紀人生
盧海鵬加入娛樂圈超過半世紀，從廣州來港後做過不同行業，到1973年入讀無綫電視第三期訓練班，同期同學有周潤發和吳孟達，最為香港人認識的，自然是在《歡樂今宵》搞笑扮演其他藝人及名人，《蝦仔爹哋》更是我當年每個星期都要追睇的短劇，之後在香港的電視台間遊走，到2012年以《奪命金》獲香港電影金像獎「最佳男配角」，拍下電影無數，演出角色更是香港人的集體回憶。但原來他最想做的其中一件事，是開演唱會。
「要講我今年唔係入行60年，總之就超過半世紀，60年係要來宣傳，啲人係咁噏，我都冇得講，總之就搞個演唱會，冇啲咩紀念嘅，純粹係開心，所以就搞演唱會。」
唱歌要練氣，鵬哥現時每日朝早去跑步。
「如果我練唔到舞，我就唔唱啦，早幾年身體唔好，就唔敢跑，𠵱家冇事喇，日日朝朝跑步，跑到個人健康返，咩病都冇埋啦、氣又夠啦、聲又有啦，所以就夠膽開啦！」
79歲大關
鵬哥近年身體不算十分好，早前接受訪問時更稱，右眼失明也有糖尿病，甚至有玄學家稱他過不了79歲，最後全部係廢話。
「跑步之後就再沒有病過，連糖尿問題都好了，剛剛去驗一切指數都正常，但眼睛比較遲頓，一隻眼盲了，另一隻視力很矇，所以行路要慢，就係驚仆親，但要行得快我一樣都得。」
鵬哥明言曾有玄學家批命說他過不到79歲，而鵬哥也說79歲那年，身體確實很差。
「唔夠聲唔夠氣，行路腳軟，跑步行山，行下行下就過到今時今日，人生有幾何？好難講，你睇吓許紹雄。」
「當年話我過唔到79歲，真係行路都行唔到，過得到就好啦！」
鵬哥就這樣過了一大關，83歲開演唱會，確實不是人人都做得到。
人生自古誰無
談到許紹雄，鵬哥十分感觸。
「當然傷心，雖然我年紀比他大，但他比我早兩屆參加無綫藝員訓練班，他是我師兄。」
「人總係要過，不過好難講，好像許紹雄一樣，突然間入醫院就話死。」
人生難料，可會請家人來看演唱會？
「我屋企人呢，喺廣州嗰啲就死晒㗎喇，我自己嗰啲呢就喺晒加拿大，（會唔會叫他們回來睇？）我點知得㗎？」
對於演唱會名為「收咪」，鵬哥指「收咪」不是「收山」，收咪只代表「盡量」在台上不講粗口。
「歌單歌詞我都記得晒，在腦海，隻隻都是飲歌，歌衫要隆重，全部都係珠片。」
這次真的台上不「試咪」嗎？
「睇心情啦！」
還有，鵬哥在《風林火山》中飾演黑幫元老蛇叔，拍攝多年後終於上映，問鵬哥有否入場睇？如無意外，繼續被試咪。
「拍咗好耐啦！冇睇，個仔（Juno）都唔知拍乜！」
這次被試咪的，原來不是我。
今次唱歌唔係扮嘢
鵬哥這次演唱會，講到明是鳴金收咪演唱會，不是「扮嘢」會，但宣傳海報上卻是滿滿回憶中的鵬哥扮嘢造型，問一問鵬哥這次會否大玩「扮嘢」搞笑？點知又畀鵬哥試咪。
「講到明呢個係演唱會，唔係扮嘢會，如果開扮嘢會呢，就唔使聽啦，要化妝扮嘢，上到台唱一唱，又返後台再扮嘢，出出入入，就甚麼都不用唱了。」
擔心鵬哥的身體狀況，問他會唔會擔心辛苦？我又繼續被試咪。
「如果擔心我就唔撈，擔心唔得我就唔敢去答應做。開演唱會我要好盡力，又唱又跳又嗌又喊又跑，好犀利，年紀唔細都要盡自己能力，如果唔盡自己能力做演唱會，就不如唔好做，做嚟做咩？」
鵬哥每一句說話都中氣充足，好氣過後生仔，我絕對相信他應該可以唱足兩個鐘，只不過開演唱會期間，會否不經意在台上爆粗試咪，恐怕就極為難講。
訪問完後我才知，原來鵬哥開演唱會宣傳記招時，為了不在大庭廣眾兼有直播的期間爆粗，所以把他的經典名句改成:「盧海鵬試咪，演唱會係威。」
難怪訪問第一句，鵬哥就認唔住要爆:
「盧海鵬試咪，X你老母Y。」
真係忍唔住吖嘛！
延伸內容：盧海鵬貴為扮嘢界鼻祖 83歲舉行演唱會兼簽名夠霸氣
《東周網》訪談系列節目《星桄伴我心》11月重磅嘉賓：
即睇：孫慧雪爆拍性感寫真因由 生仔大出血攞命搏 被懷疑是犯罪集團主腦
即睇：「億萬駙馬」伍富橋：人人以我唔使做！爆太太出招試探人品 永不忘被外父羞辱係鴨
立即追蹤《東周刊》全新WhatsApp頻道，緊貼全城熱話、突發猛料、獨家消息！
