發佈時間：10:00 2025-11-25
現年35歲的ERROR成員193（郭嘉駿），向來感情生活多姿多采，曾自誇拍拖的次數多不勝數，宛如一位情聖。2021年，他推出歌曲〈睡到三點〉，便找來「人氣女神」阿Gi擔任MV的女主角，兩人戲假情真撻着，並且低調拍拖；不過，193於去年在冇預警下飛甩阿Gi，結束這段逾3年的戀情，令女方傷心不已！
今年7月，「連登仔」爆料指出，193與Lolly Talk成員Tania發展地下情，但他立即否認並嬲爆反擊：「人不犯我，我不犯人！」193如此激動，原來新歡另有其人，就是同屬ViuTV、比他細13歲、矮29厘米的COLLAR成員Candy （王家晴）。日前，《東周刊》獨家直擊兩人甜蜜拍拖，平日狂傲不羈的193，對Candy全程呵護備至，激罕地露出溫柔的一面，又做「柴可夫」管接管送，等待女友收工後，更恩愛地撐枱腳打邊爐，據悉兩人已經暗撻了10個月。
延伸內容 : 193郭嘉駿揸車撞到阿婆？承認已備案 : 會盡力配合跟進
延伸內容 : 郭嘉駿倒車撞人引發熱議 學生時期踢足球、打籃球瓣瓣掂
不甘被屈
入行以來，193的身邊不乏女伴，除與「Dee姐」陳海寧（Isabella）傳過緋聞外，於2021年，他推出歌曲〈睡到三點〉時，便找來「人氣女神」阿Gi（樊沛珈）擔任MV女主角，兩人一撻即着，並低調拍拖逾3年多，後來更疑似發展到同居階段。據悉，拍拖期間，193經常帶阿Gi出席朋友聚會及活動，故圈內很多人都知道他們的關係；然而，193於去年在冇預警下提出分手，令阿Gi傷心欲絕。
今年7月，有「連登仔」上載多張圖片，聲稱是193與Lolly Talk成員Tania（陳紀澄）拍拖的「證據」，但其實圖片根本看不到樣子。隨後，193親自在Threads回應：「X sir麻煩你唔好搞到我，咁矮一睇就知唔係我嚟。你騷擾到我的話，我就爆你係邊間公司打手，順手講埋你哋其他故事出嚟。利申：我係娛樂圈deepweb嚟，只不過人不犯我，我不犯人！」
如此火爆，193不甘被屈之餘，還怕新歡誤會。日前，本刊在銅鑼灣發現193揸住一部銀色的Benz G-Class ，而坐在「女主人位」的正是COLLAR成員、 「顏值擔當」的Candy ！當日，193變身「柴可夫」，載着Candy 由銅鑼灣前往九龍灣的ViuTV總部；跟着，他一支公駕車離開。相隔3小時後，晚上6點許，這位貼心男友又駕車返來，並靜靜地等候。不久後，Candy從公司的大樓步出，一見男友即展現冧爆的笑容，並一支箭地衝上車。
共度春宵
之後，兩人直奔土瓜灣找餐廳醫肚。泊好車後，為怕被人認出，他們都上齊「裝備」，193在後座搵cap帽；而貪靚的他左揀右揀，試了幾頂才合心意。在旁的Candy就非常有耐性，一直在撳電話等待男友揀心水帽，接着她亦戴上口罩才落車。
向來性格敢言兼愛高調的193，今次一反常態，為保護剛萌芽的愛苗，保密工夫做到足。落車後，他再笠埋外套上的帽，全身包到冚。途經一間相熟的車房，他便停下與老闆寒暄。在旁的Candy為免被認出，就顯得相當避忌，首先彈開10米距離，跟着還匿埋入一個凹陷位。現場所見，193同老闆彷彿失散多年，傾到雞啄唔斷，搞到Candy等到冇癮，於是自己走開。15分鐘後，193終於捨得收口，但發現不見了Candy，於是馬上打電話聯絡。會合後，兩人四圍逛覓食，可是找到心水的餐廳，最後齊齊上番車，轉戰尖沙咀天文臺道打邊爐。
兩人情話綿綿一餐飯食足兩個鐘，離開餐廳時，看見夜闌人靜，Candy亦放下戒心沒有戴口罩；而平日口花花的193，就狂出招𠱁到女友開心不已，又不時望着他甜笑。兩人雖然未有親暱的行為，但全程有講有笑，表現甜蜜。醫飽肚後，193駕車返回自己的寓所，與Candy共度春宵。
今年1月，193與Candy 合拍ViuTV的綜藝節目《公司逼我打籃球》，因朝夕相對而撻着，但由於雙方的事業如日方中，故兩人決定將感情事盡量低調。不過，身邊的閨密都知道他們正在蜜運中。密友爆料：「193經常做『柴可夫』，Candy要去偏遠嘅地方開工，193都會一早起身車佢去，又接佢放工，更加會買定早餐，對女友呵護備至。」另外，193最近搬到沙田區居住，與Candy的老家距離很近，結果造就兩人發展到半同居的關係。
早已洩「蜜」
翻查社交網，其實193與Candy早已洩「蜜」！今年5月，Candy以支持隊友芯駖主演的舞台劇《你好，打劫！Reunion》為藉口，孖住193拍拖去睇騷；另外，她又戴上193自家時裝品牌的頸鏈，還自拍放上網，暗地裏「放閃」。雖然兩人相差13年，但完全沒有代溝，密友坦言：「Candy喺193猛烈的攻勢下，迅速被攻陷，亦被男方嘅幽默感徹底融化，覺得同佢一齊好開心，加上大家同公司，有唔少共同話題同朋友，相處得好舒服。」至於蜜運中的193，日前就推出一首以愛情為主題的歌曲〈你的名字 我的聖詩〉，MV講述193飾演的車房仔非常專一，第一天看到女主角已想跟她結婚，相信Candy應該會對號入座！
早年接受訪問時，193自誇拍拖的次數多不勝數：「中學時拍散拖，一星期拍一次拖，所以真係數唔到。」他更揚言自己冇結婚打算，愛情觀是「啱就一齊，唔啱就飛」，亦不會浪費大家的時間勉強去遷就，並分享擇偶條件：「最重要投契，唔好咁煩，唔好管住我。最怕女仔煩，去邊要影相俾佢睇，check我手機，我又唔係坐緊監，做乜要同你每刻交代。兩個人相處時開心，但亦都需要獨處。」換言之，Candy給予193的自由度十分大。
Candy被封「A0女神」
今年22歲的Candy ，於2021年參加ViuTV的選秀節目《全民造星IV》入行，翌年以女團COLLAR出道。參賽時，Candy自揭未拍過拖，故被網民封為「A0女神」，她又聲稱沒人追：「係有puppy love，但未拖過手，冇經歷過拍拖嗰啲經歷。」Candy亦有公開擇偶條件，表示鍾情長腿Oppa，理想型首選要高：「193嗰啲高度，睇韓劇啲男主角好高，當初ERROR成員最吸引我就係193，韓國《Running Man》我都係鍾意李光洙。」對的時間遇上對的人，難怪193輕而易舉幫Candy「升呢」成為「A1」！
