發佈時間：14:27 2025-11-24
緣份有時很奇妙，只要在對的時間，遇上對的人，即使大家身份背景風馬牛不相及，結伴走下去，感情也能開花結果。
藝人伍富橋（Alvin），2022年與富家千金梁兆楹（Shirley）拍拖半年後閃婚，即被戲謔為「億萬駙馬」，面對外界一連串的流言蜚語之餘，還要被外父誤解，指罵他是鴨、戲子等，承受巨大壓力。太太Shirley不甘丈夫受辱，曾與父親對着幹，早前更上電視節目流淚為丈夫平反：「他跟我結婚後，好像做甚麼事也變得難！」而伍富橋雖一度覺得委屈而留下男兒淚，卻沒有想過放棄這段婚姻。三年下來，和太太的感情更加穩固。
他和太太更在手臂一起紋上「伍兆」的麻雀圖案，作愛的密碼，「這是我人生中第一個紋身，係太太構思，用我姓氏的『伍』字，加佢個名的『兆』字，而佢屋企做麻雀生意，所以就選了一個麻雀圖案，幾有意思。」
數值上，兆比億更高，如果硬要在這段婚姻加上一個限期，會是伍兆年嗎？
億萬駙馬
2021年的紅葉季節，伍富橋與富家千金梁兆楹相戀，拍拖半年，於翌年3月宣布結婚，但因為二人的家底懸殊，婚後成為網民茶餘飯後的一粒大花生，伍富橋更被封為「億萬駙馬」，他苦笑說：「呢個稱號某程度上對我的演藝事業和健身事業都唔係好事，因為俾人感覺好似唔使做咁。好多監製唔再主動搵我，一嚟，我演技唔係話好好，唔係唔搵我唔得；二嚟，佢哋可能會覺得，我都應該唔得閒或者唔志在，所以真係好大影響。現實中，我唔係結咗婚，就唔使做，婚後我都接過啲冇名字的角色，如西裝男A、司機男B，有次返深圳，在場有PA問，邊個有車牌？我立即舉手，結果全場戲，我只係負責揸車去綁票。」
雖然好努力工作，但因為娶了個有錢老婆，令人對他有偏見，更一度成為網上熱搜，不少網友留言更hashtag#食軟飯、#靠老婆等標籤，「我起初冇乜感覺，但之後發現原來娶咗個有錢老婆，係會令自己工作機會少咗，呢樣係唯一壓力。而作為男人，梗係唔想大家對我印像係咁。初初有睇啲留言，𠵱家已經冇咁大興趣去睇佢哋講乜。」
除了他，太太Shirley亦被網友作出人身攻擊，部份留言更帶有侮辱性，如「抬佢上山夠食幾日」，他說：「呢樣令我好自責，因為我先至令佢被人評頭品足，被人抨擊身材，正常女仔都會唔開心，但太太卻話得啖笑。」不過有時亦見Shirley在網上跟網友開火，有次更爆Seed說：「佢X得落佢本事，你恨唔X到咁多！」對此伍富橋笑說：「呢個字成日喺屋企出現，佢除咗係反恐碩士畢業，廣東話文化方面都係專家。」
鴨·戲子
除了要抵檔外界的揶揄，伍富橋在家中亦要面對外父的誤解。據知二人結婚沒有舉行盛大婚宴，原來是外父一直不滿這樁婚事，認為女兒「所有另一半都係呃錢」，並以腳痛、呼吸不順為由推搪出席婚宴。
Shirley早前在電視節目更透露，父親曾經在家中，當面直斥伍富橋是「鴨」、「戲子」，對此伍富橋說：「呢個場面到𠵱家仍然好深刻，換轉第二個，同樣係一世都唔會忘記，始終被人咁樣揶揄，好難冇反應。你問我係咪嬲？我只係覺得無奈、傷心多啲，因為自己有付出過。佢同我講呢番說話時，我同太太已經結咗婚，佢係我長輩，同自己親生老竇冇分別。但我唔會因為佢咁講，而去做嘢傷害佢。
「當晚我立即衝上房執嘢走，一邊執一邊喊，我咁大個仔都未試過咁委屈。我冇做過鴨，當時唔想多講，而太太就喺我身邊維護我，同外父頂咗幾句。我會繼續做好本份，而唔係去憎恨，因為當時佢對我了解未夠深先有呢個判斷。雖然到呢一刻，大家仍然唔多來往，但關係仍然係外父同女婿，我知佢對我開始有些少改觀。」
有指他於婚前曾簽下協議，若婚姻破裂，需要淨身出戶，他說：「我哋冇做咩婚前協議，因為喺香港做冇意思，喺外國就有用，衰啲講有乜冬瓜豆腐，都係要分，做呢份嘢只係傷感情，所以從來都冇做過。𠵱家同外母一齊住，我每個月亦有俾錢做家用，可以cover水、電、煤、其他生活雜費等。」
延伸內容 : 伍富橋太太梁兆楹回應網民抨擊 梁父曾侮辱老公是「鴨」喊住話對唔住老公一樣嘢
伍兆密碼
過去幾年的經歷，令伍富橋和太太感情變得更牢固。細說他們的愛情故事，則要回到2021年。那時伍富橋在TVB娛樂新聞台做主播，Shirley則在幕後任職PA(助理編導)，「我哋喺同一部門工作，佢係PA，會攞啲稿俾我哋啲anchor去錄，因為我轉數較慢，同佢又一句說話都冇講過，所以佢初初對我印象好差，覺得我好冇禮貌。其後佢去我間gym度操，我哋先開始傾偈，但唔知點解，我好似撞邪咁，好想同佢食飯傾偈，相處時間多咗，好自然就開始拍拖。」
二人拍拖半年就閃婚，他說：「太太話結婚呢件事，應該係大家最愛大家嘅時候去做，係衝動㗎，好似愛情催化劑，成事件去到next level。佢鍾意我單純，夠戇居又踏實，而我只係想要一個穩定、舒服嘅屋企，同愛自己另一半就足夠。」
婚後二人互相扶持，去年伍富橋和Shirley在馬爾代夫旅遊慶生時，Shirley突然收到訊息，指有他「偷食」的證據。Shirley當時絕對信任丈夫，但同時亦鬼馬地留言：「想睇」。對於被「出軌」，伍富橋笑說：「太太睇人叻我好多，佢知我道德底線，對我有信心。」
夫妻二人今年在手臂上更紋上愛的密碼，「呢個係我人生第一個紋身，圖案係一隻麻雀，上面有我個姓『伍』，同太太個名『兆』，大家都紋喺前臂，一左一右。idea係太太諗，屋企做麻雀生意吖嘛。」
做單大嘢
現在伍富橋除了繼續演藝工作，亦是健身教練，早年開設的健身房亦正計劃擴充，「婚後我依然好積極發展事業，有在健身房教班及私人課堂，亦考咗牌成為匹克球（Pickleball）教練，雖然外間成日認為我娶咗個有錢老婆後就唔使做，但其實我係忙到俾太太投訴我經常唔返屋企。」
熱愛唱歌的他，其實是2016年的新秀歌唱比賽季軍，早年出過多首單曲，至今仍然希望繼續追尋音樂夢。「我同太太係財政獨立，我唔會要求佢俾錢我追夢，始終做音樂，需要大量資金。我做生意識計數，追夢嘅『投資』目前唔係首要，有錢都要擺喺有回報項目上，但我係有計劃出歌。」
暫時他仍然享受和太太過二人世界，「生BB未有實質計劃，我哋由拍拖到結婚太快，二人世界時間唔多，加上生咗小朋友就要負責，又係另一個層次，要部署好先可以實行。」
訪問尾段，伍富橋致電太太，分享過去三年的婚姻生活，Shirley風趣地說：「三年過後，婚姻係預期中婚姻，冇乜大起大跌，冇殺人亦冇斬人。我唔驚7年之癢，希望7年會激啲，佢可以做單大嘢，轟烈啲，哈哈！」
一段婚姻要保鮮，除了要有「麵包」打底，有時也要加點情趣去調味，才能歷久常鮮！
延伸內容：「億萬駙馬」伍富橋晒肌騷健身成果 被老婆梁兆楹笑爆禁止 結婚3年不時幸福放閃
延伸內容：「鐵面陳」升呢「億元駙馬」︱ 細數圈中迎娶有米太太型男 億元駙馬最強只有25歲
