更新時間：09:00 2025-08-27
發佈時間：09:00 2025-08-27
發佈時間：09:00 2025-08-27
有冇試過喺東京車站、新宿車站蕩失路，兜來兜去都搵唔到想去嘅出口？新片《8號出口》將結界玩到出神入化，場景得一個空間，講述日本國民男團「嵐」成員二宮和也，被困喺車站地下通道入面，無限輪迴搵8號出口，搵到懷疑人生，一拍就拍足95分鐘。齋聽故仔，已經覺得匪夷所思，究竟玩乜花臣可以拍咁長，威到有本事殺入今屆康城影展？二宮又點解獲讚係日本嘅德斯汀荷夫曼（Dustin Hoffman）？
電影改編同名恐怖生存逃脫電玩
《8號出口》靈感來自前年上架嘅一款同名恐怖生存逃脫電玩，導演川村元氣攞咗遊戲背景做框框，然後邊拍邊度故仔。「第一日開工，我就同劇組講唔使擔心，因為我都唔知拍出嚟會點。二宮本身好鍾意打機，所以我哋每次拍完都會開會討論，修改再拍，好似試玩遊戲咁無限loop。」
電影登場人物寥寥可數，除咗二宮同攞住公事包嘅路人大叔，仲有原本遊戲中冇出現嘅細路、白衣女、短髮女等。
為咗逃出生天，二宮要一眼關七，好似玩photo hunt咁，記熟通道上所有嘢，例如路人大叔嘅表情、海報內容、閉路電視嘅數量等。如果發現有地方同原先唔同，要立即掉頭走，否則錯咗，就要由0號出口重新開始，慢慢搵到8號。
二宮和也拍攝時每日來回通道30次
拍攝時，二宮閒閒地每日要喺通道來來回回行30次，少啲腳骨力都唔掂。「最初睇劇本時，我覺得恐怖氛圍唔夠勁，最好加一啲無形嘅壓力元素落去，所以我提議不如安排主角患哮喘啦，咁觀眾就會多一重擔心，睇得更肉緊。」
話晒二宮係日本奧斯卡影帝，要佢七情上面，演繹置身空無一物通道嗰種焦慮，當然冇難度。有趣嘅係，遊戲生產商呢頭推出完《8號出口》，嗰頭再出續作《8號月台》，要玩家留意永不停駛嘅鐵路電車有乜怪異之處。玩落去，唔知仲有冇《8號旅客服務中心》、《8號洗手間》之類呢？
《東周網》訪談系列節目《星桄伴我心》8月重磅嘉賓：
即睇：譚輝智親解拉姑寵愛之謎 爆喊陪最愛開刀「望住手術室盞燈，我真係好驚！」
即睇：楊思琦破天荒講跳水前度吳帥：「好多人話我貪慕虛榮！」 親揭神秘老公底細 收$1200傾偈5分鐘解謎 與13歲女兒獨家真情對話
即睇：譚俊彥大爆與李佳芯電話傾心事內容│太太放棄演藝事業下嫁│親解爸爸狄龍與姜大衛不和謎團
最Hit
