發佈時間：12:00 2025-07-01
資深演員艾威的太太陳美玲（Lisa），因為家族遺傳性多囊肝及多囊腎，今年初病情惡化，並受細菌感染，最終等不及做換肝手術，於上月18日離世，終年61歲。
喪偶個多月，與太太經歷過離離合合的艾威，接受《東周刊》獨家訪問時談及亡妻，縱使努力撫平情緒，但仍忍不住掉下男兒淚：「𠵱家情緒好飄忽。」此外，他選擇相信對方從未遠離：「佢會喺我心入面同我講嘢，會俾意見我⋯⋯」
至愛離世 艾威心緒難平
今年66歲的艾威和陳美玲（Lisa）結婚23年，夫妻情重，Lisa曾經歷過3次大手術，多年來他不惜耗盡積蓄，甚至借錢救妻。不過，5年前曾出現婚姻危機，艾威不滿體弱多病的老婆，經常通宵打麻雀，罔顧健康，故提出結束18年的婚姻。兩年後，兩人因參加內地的綜藝節目《再見愛人2》，重新認識對方，而破鏡重圓。
身邊少了最愛的人，艾威眼泛淚光坦承心緒難平：「Lisa走咗之後，初時唔知點樣去面對，以為時間能沖淡一切，原來係唔會嘅，情緒會突然間湧現。」他舉例當天在老婆的靈堂上，本來尚可控制好情緒，直到湖南衛視《再見愛人2》的團隊，將節目中兩人互寫的日記送來陪葬，他那刻悲傷得決堤爆喊：「真係忍唔住，𠵱家情緒好飄忽。」
艾威坦言這份錐心之痛，深知不會輕易消逝，幸而現已稍為能夠掌握應付的方法：「真心愛一個人越會覺得生活悲痛，嗰種悲痛唔好覺得係會過咗去。」而他選擇轉化這份沉重：「知道將來走嘅路，唔可以只係一直處於懷念，係要將所有嘅悲傷、傷感、思念轉變為能量，唔可以有負能量。」並且相信Lisa從未遠離：「我仍然會覺得佢喺度，好似電影所講嘅，暫時佢依然喺你身邊，直至有一日轉化去另一個空間，咁樣諗會舒服好多。」
艾威甚至能「聽」到Lisa的意見：「好似今朝早咗起身，掙扎去飲茶定留喺屋企食麥皮，於是聽吓喺心入面嘅Lisa意見，知道佢一定會叫我揀食麥皮，佢會喺我心入面同我講嘢，會俾意見我⋯⋯」因此，他在靈堂上特別呼籲來賓：「希望來賓唔好傷痛，要記住訊息：做老公嘅要更加錫老婆；做老婆嘅要更加錫老公；做仔女嘅要更加錫父母；做父母嘅更加要錫仔女。要將記憶轉化成能量，提醒自己要俾身邊人多啲愛，更加要愛自己，將件事逆轉成正面，咁就唔會令自己情緒走下坡。」
太太遺願 堅持守護心愛鐘錶店
面對獨居生活，艾威直說：「太太離世，我又唔怕孤獨，因為當年兩公婆分開時，初時會有少少孤獨及落寞，後來已適應。今次最大不同，係多咗一份心痛。」至於日常生活變化不大，因為太太生前工作也忙：「𠵱家枕邊少咗個人，但多咗隻狗，家中兩歲嘅拉布拉多狗仔，仍然懷念着已故女主人嘅氣味，已霸佔咗另一半床位。」
談及太太的遺願，Lisa經營了3年的鐘錶店是她的心血，艾威堅持守護：「我問同事仲有冇得做？可能一段時間都要倒貼嘅，收支暫時係唔平衡，吃力都冇辦法啦。」他堅定的說：「因為係佢嘅心血，有得做點都會做落去，keep到就keep住先啦，希望8月上番軌道唔使蝕本，慶幸的是太太的醫藥費都清還晒，我嘅生活OK嘅，絕對相信希望在明天。」
Lisa後期因肝臟無法分解毒素，神志不清，未能留下遺言：「佢最單純嘅願望係，放佢出去廁所，同老公及哥哥出去食早餐，唔好綁手綁腳瞓喺病床上。」不過，當她的偶像周潤發前來探病時，她卻奇蹟般地認出對方，艾威憶述發哥的鼓勵：「發哥同佢講：『你好番之後出去，請我食菠蘿油呀！』」他對發哥心存感激：「當日上午，先請苗僑偉幫忙轉達訊息，同日下午發哥已趕到醫院。」另外，超過20位熱心市民響應捐肝呼籲，其中一位更是曾合作過的年輕化妝師，這份善意讓艾威深受感動，他也非常感謝醫護人員，於太太留院3個月期間的悉心照料。
事業未能達到太太期望感遺憾
說到遺憾事，艾威坦言事業未能達到太太的期望：「佢對我都有幾大期望，但我事業唔係好達到佢嘅目標，喺佢心目中仲爭啲。」Lisa最喜歡他在《荃家福祿壽》中扮演石堅，「有時喺屋企我會用石堅腔同佢講嘢，所以佢留低深刻嘅印象。」他又回憶兩人透過湖南衛視真人騷《再見愛人2》復合的經歷，而這件事更是最感動的救贖：「其實冇諗過復合問題，只係覺得節目係一個難得嘅機會，想睇吓個天點安排。」
艾威清晰記得關鍵一幕：「好記得當時設計有個爬山活動，佢因為腹水脹大扣唔到安全繩索，但佢為我不顧一切冒險。」當晚，Lisa出現高山症兼發高燒：「當時，我諗：『如果我話唔離婚佢應該會好番！』」艾威於是向病榻上的Lisa保證：「唔使擔心，唔會離婚。」結果神奇地，Lisa果然好快退燒：「睇得出唔係劇情，嗰集好多人睇到喊，4季之中最感人嘅場面！」他慶幸的說：「如果唔復合，病情惡化，身邊冇人幫佢，遭遇就唔太好，好彩有我喺佢身邊。」
另一遺憾是兩人真正無憂的甜蜜時光並不多，因Lisa常忙於工作：「最開心嘅日子，係早年拍拖時去拉斯維加斯旅行3星期。當時我先到埗，安排咗一架長橋車接佢，佢開心的問我：『係咪贏咗好多錢呀？』」艾威回憶時帶着笑意：「嗰段甜蜜日子完全唔理日和夜，瞓醒起身就喺游泳池旁食生蠔、飲香檳，嗰段日子最開心！」之後，最長的旅行也不過一周。這段難忘旅程甚至成為他創作小說的靈感來源，書名為《情聖賭神之終極一注》。然而，小說情節卻有驚人巧合：「故事講男主角好深愛女朋友，但死咗，所以每個章節係寫俾已故女朋友嘅。」艾威苦笑搖頭：「真係大吉利是！但我都唔知點解會寫小說中嘅女主角會離世。」未曾想到小說情節竟成預言。
延伸內容：艾威太太Lisa最後錄音曝光 深情多謝老公陪伴走過患病旅程 稱當日離婚有原因
延伸內容：艾威發文悼念太太：美玲美玲，知道妳已非常疲累，請好好休息
艾威陪伴愛妻 將來選擇海葬
兩人緣起於沙田一間酒店泳池：「我係會員，所以經常拎埋舞台劇嘅劇本去睇，剛巧佢屋企裝修，所以搬進酒店。」艾威笑言是對Lisa一見鍾情：「見到佢時仲係着住泳衣，選港姐都要睇泳裝啦，見到ok呀，有樣、有身材！傾落又ok！」於是，「趁得閒日日去『睇劇本』捕住佢。反而佢記得清楚正式傾偈嘅日子，係5月22日端午節。」他描述當日情景：「有好多泳客，咁啱我行開咗，佢就拎開咗我櫈上物品，我就乘機過去同佢講嘢，都算有緣，又算係人為啦。」今年的端午節，失去Lisa的他心情低落：「人哋留言『端午節也快樂』都冇回應。」
喪偶後，艾威留在家中看書、看戲、做運動，也會整理Lisa的遺物，他將太太的相片放在床頭：「一起身就見到佢。」並留下了幾隻Lisa的公仔，有些物品則轉送給她的家人。遺憾的是兩人的結婚戒指早年已遺失；另外，他希望能找回Lisa生前常戴的手錶。未來，Lisa將進行海葬：「因為我住喺岸邊又成日跑沙灘方便『溝通』。」艾威自己將來也會選擇海葬，他笑說：「而且我哋係游水認識。」這將是另一種形式的相伴。
