發佈時間：15:54 2025-06-18
阮浩棕於《人生美食地圖》最新一集中，演藝圈打拼超過12年的他談到自己過去經歷的高低起跌時，就表示自己最感激的人是親哥哥，由於他的爸爸在他年紀很小的時候，已經長期不在香港，哥哥在他的心目中就如同爸爸的角色，當媽媽鬧他之時，哥哥會出來為他護航。阮浩棕感性地講兄弟情，講到流下男兒淚，他即時引起觀眾們的共鳴和關注，阮浩棕的名字即成為熱搜。
阮浩棕哥哥身兼父職 付出「無條件的愛」
阮浩棕從小由哥哥「身兼父職」照顧，從小到大都給予弟弟無限支持及愛護，於今年阮浩棕摘下人生第一個演藝獎項勇奪「飛躍進步男藝員」時，阮浩棕哥哥就馬上給返家的弟弟送上溫暖的擁抱，阮浩棕坦言非常感動和温暖：「我記得我返到屋企第一眼見到阿哥嘅時候，佢衝埋嚟攬住我、拍咗我一下，我覺得呢一下代表晒所有嘢。」
阮浩棕想藉着節目親口感謝哥哥「無條件的愛」：「之前喺內地最難捱嘅時候，自己一個喺出邊生活，其實係我會問哥哥借錢，所以當我開始搵返一嚿錢返嚟嘅時候，我話我還番俾佢，但阿哥會話『得啦！袋住先』，某程度我覺得係好愧疚。」
阮浩棕放棄做金融才俊 父親係電視製作人
阮浩棕本為經濟系高材生，畢業後大可以在銀行界闖出一片天，或許可以成為金融才俊，但他選擇投身演藝界。阮浩棕曾經接受《東周刊》訪問時，就講過：「我好想有一日，聽到爸爸真係讚賞，同我講：『You've done a good job.」。」
阮浩棕的父親是阮惠源，他是一名資歷深厚的電視製作人，先後效力無綫、麗的及亞視，見證香港電視風雲，曾擔任編導、導演、監製及製作人，作品括《風塵三俠》、《浴血太平山》、《天靈》、《四大名捕重出江湖》、《生命有明天》等，早年他被力邀參與內地劇集製作，作品包括林峯主演的《大漢賢後衛子夫》等。
爸爸無心狠批：「戲屎！」返房爆喊
由於阮浩棕的爸爸是資深製作人，其評價當然專業及實用，阮浩棕說初入行時，未有全盤接受外，爸爸有次無心的狠批：「戲屎！」，令他陷入崩潰，心如刀割，直至今日說起，也是隱隱作痛，不禁爆淚。
阮浩棕說 :「初入行時，訓練班嘅成績唔錯，又覺得自己嘅表現ok，但爸爸會以幕後嘅角度去睇，會批評我演技例如唔使咁用力，當時我會覺得：『咩呀？你又唔係做演員，你做幕後之嘛，你邊度識啫！』。之後開始明白佢嘅說話，係我以前嘅層次未去到佢嘅位，所以完全聽唔明，如果我初時識得聽，可能條路會順暢好多。」
「媽媽曾經同人講電話時，我喺隔離講咗句佢唔係好啱聽嘅說話，佢收線之後話我，我有少少駁嘴，爸爸護妻深切衝過嚟，鬧得我好緊要，期間佢衝口而出話我嘅戲屎，我忍唔住返房喊！雖然知佢無心，但係好痛。我唔係怪爸爸，嗰刻係我衰，鬧我係應該，只係我冇諗過，佢咁講，我係會咁傷。」
「爸爸係個好成功嘅製作人，佢對我嘅評價好重要，甚至我想得到佢嘅讚賞，係迫使我進步好大嘅動力。但佢呢句說話，我承受唔到，嗰刻我先知道爸爸喺我心入面嘅地位有幾高，我真係好想佢衷心讚我一句。好似舊年有幾部作品出街，我成日望住爸爸睇我作品時嘅表情，佢話：『開始有啲嘢睇嘞！』或『ok啦！』我係好想有一日，佢真係讚賞咁話：『You've done a good job.』」
