發佈時間：15:01 2025-02-19
相隔超過十年，鄭伊健再以古裝亮相，一身「聶風」造型，長髮披肩，驚喜現身香港舞蹈團「港漫武俠舞劇《風雲》慈善場」演唱《一對對》，全場觀眾尖叫。在電影中飾演「文丑丑」的鄭丹瑞（旦哥），擔任舞劇的說書人，一開場的讀白加上神來之筆，用手指在眉心畫了一道白色，再配以「文丑丑」招牌笑聲，帶觀眾一秒進入《風雲》故事世界。
鄭伊健 鄭丹瑞齊現身
「聶風」鄭伊健和「文丑丑」鄭丹瑞，以及電影配樂、主題曲《風雲》和插曲《一對對》的作曲人陳光榮，還有漫畫《風雲》靈魂人物馬榮成出席當日活動。完場時，他們與一眾舞者出場謝幕，全場熱烈掌聲和歡呼。大合照時，觀眾亮起手機燈，呼應《一對對》歌詞中螢火蟲效果，非常美麗。
謝幕致詞時，旦哥說：「我願意嚟做呢件事，因為識於微時嘅馬榮成叫到，另一個原因，『香港舞蹈團』係我哋香港嘅驕傲，我能夠有機會踏上呢個舞台同香港舞蹈團一齊，雖然我冇跳過一步，但我已經覺得好爽！」然後他轉身向舞蹈團員們說：「多謝你哋！」伊健非常同意，他說：「我好榮幸可以同香港舞蹈團一齊合作，仲有馬榮成，由《風雲》電影我有份演出，到依家我都有份參與！」然後他說：「大家情人節快樂！」台下觀眾冧爆尖叫。
陳光榮說：「我都好榮幸能夠成為《風雲》嘅一份子，有份寫歌，多謝晒大家！」《風雲》的主腦馬榮成說：「我想多謝香港舞蹈團，我寫漫畫，冇諗過可以喺舞蹈展現我嘅作品，好多謝佢哋咁大嘅創作力！」
伊健8年前睇過《風雲》舞劇
之後伊健和旦哥接受訪問，旦哥對伊健笑言：「今日我哋為咗《風雲》舞劇而嚟，我表演跳舞，你就做返老本行唱歌，哈哈！《風雲》35年嘅經典，用我嘅聲音去講畀大家聽，我覺得好值得做。我曾經同好多團體合作過，就係未同過『香港舞蹈團』合作。」伊健說：「我都未合作過，但8年前睇過佢哋《風雲》舞劇。」旦哥說：「我有睇過你演呢部電影。」伊健風趣回應：「我都有睇你做呢部戲！」
伊健說：「呢個係香港嘅產業，咁多年之後仲有，既然佢哋邀請我哋，一定會出現。」旦哥說：「香港舞蹈團Crossover港漫，好值得我哋參與嘅事，好多謝佢哋邀請我哋，希望下一次邀請我真係跳舞啦！」
相關內容 : 鄭丹瑞鄭伊健亮相《風雲》舞劇慈善場 紀念漫畫35周年兼籌款
《東周網》訪談系列節目《星桄伴我心》2月重磅嘉賓：
即睇：七仙羽被鬧神棍 爆喊剖白被欺凌 : 個個都笑我騎呢！
即睇：林盛斌Bob曾當選「我最討厭藝人」冠軍，被踩是垃圾 正能量反省：我做錯咗咩嘢？
