發佈時間：04:10 2024-01-15
18歲樂壇小天后炎明熹（Gigi），在周日（14日）於澳門出席《萬千星輝頒獎典禮2023》，在紅地氈環節現身時的造型備受非議，白色長恤衫配紅色Ruffle短裙及紅色絲襪，被網民狠批是「時裝災難」，直斥造型師「大整蠱」，令Gigi慘烈地紅鶴上身，更指連月來的造型完全「九唔搭八」，例如以黑色蝴蝶結遮胸裝出席新城頒獎禮。
東周Ladies邀得著名時裝設計師鄧達智、何國鉦及星級形象指導郭慶彬，評價Gigi引起「時裝災難」的主因，然而三位名師均不約而同的，盛讚Gigi的五官獨特及身形佳，在造型設計上是非常容易，再加上Gigi天生有把靚聲，聲色俱全，認為其幕後形象設計團隊應多加工夫。
鄧達智：垃圾堆填區
著名時裝設計師鄧達智（William）說之前曾見過Gigi，感覺對方有禮、青春及清純，更盛讚對方才華洋溢，但見其造型連番失手，感到十分可惜，希望她有優秀團隊為她打造形象。
William說：「有關Gigi打扮上負面嘅聲音，近排我聽到好多，直至依家細心睇清楚佢嘅相，問題真係好大。其實好多香港人對佢好大期望，我好欣賞器重佢，因為佢喺新一代歌手入面，有晒所有條件並去到好高嘅位置。唔好話邊套衫好與唔好，如果呢個唔係Gigi，係其他人嘅話，我會覺得係垃圾堆填區。」
「Gigi係無綫重點栽培嘅種子，一定要有團隊幫佢，係唔可能將佢搞成咁。形象好唔統一，又唔係妖女、又唔係貴婦，一陣又Cheap版麥當娜。其實Gigi係好好做（打造形象），樣靚夠高、歌又唱得咁好，想睇一個令大家睇得舒服嘅形象，係非常非常之容易。」
William說Gigi如要重組形象，首先要由髮型及化妝開始入手，要有個人風格：「個妝唔啱佢，佢需要有『自己樣』嘅妝，髮型同化妝要畀人認得，一眼就知係佢，佢係靚女，五官又特別。」至於服裝方面，William認為Gigi可以走青春、優雅的路線，不能操之過急的玩成熟性感。「無論係麥當娜或梅艷芳，佢哋都一定要經歷一啲嘢，先可以展現到箇中嘅味道。Gigi暫時絕對唔適合用性感包裝，佢呢個時候係清純青春，個樣好乖，就算要型，都可以有好多種，唔一定要好loud好sexy，好似Alexander McQueen嗰類young得嚟低調都ok。」
何國鉦：唔應該被擺佈！
身為著名時裝設計師的何國鉦（Dorian），去年成立「亞洲新一代創意設計協會」扶植新生代，對於Gigi在台慶頒獎禮的「炒車」造型，以及之前多個造型出事，他深感新一代造型設計師仍需努力，更指造型暴露了她兩大缺點，非常替她不值，感到可惜，但覺得外間應給予時間及空間，讓她努力去進步及摸索。
Dorian說：「以前我哋會做徒弟、跟師傅做助理，一步一步去做，依家好多年輕人入行係好事，仲會幫好多歌手做形象，但斤両有幾多？一定要知個artist着啲乜先至好睇！」
「其實Gigi可塑性好高，可以carry唔同style，但可惜咁多次出事，因為暴露咗佢兩個比較蝕底嘅地方：上圍唔豐滿，同埋坐圍大、大腿粗。平時都未必會留意到，但呢個造型（台慶）就完全放大晒。裙太短，露晒大腿；雖然着咗件衫，個bra若隱若現，但都會見到係咪豐滿。」
「試新嘢唔係唔好，但係咪要露到咁？大家睇到嘩嘩聲，但全部係唔好嘅『嘩』，只會畀人覺得係刻意暴露。好似之前新城嗰個蝴蝶結裝，如果唔露個肚位，反而仲好啲。理大嗰個look自暴其短，露最粗嗰Part畀人睇，反而叱咤頒獎禮佢着嗰條Ruffle裙，比較着得好睇。」
Dorian說見過Gigi，覺得她有禮清純，更知道她在理大攻讀時裝設計，認為她有自己的fashion sense，可以在造型上有自己的意見，估計她太聽話而出事。「我知道佢係好乖嘅女仔，但唔係人哋叫你着乜就着乜，唔應該被擺佈，尤其佢係讀時裝，外間對佢嘅期望自然更高。」
Ricky Kwok：好驚呀！
星級形象指導郭慶彬（Ricky Kwok）指Gigi在台慶紅地氈的紅白黑三色造型，以「好驚」來形容。「呢個造型極度唔掂，好驚呀！咁大型頒獎禮，紅白黑呢個配搭，撞埋一齊，效果好騎呢、好唔靚！長恤衫配bra top已經古怪，條ruffle裙好似跳Tango嘅裙咁，再加埋個髮型，同埋最出事係紅色絲襪，直情攞晒膽，好驚嚇。以佢嘅年紀，好多衫可以着得好靚，佢figure又高又靚，呢套衫係嘥咗佢，扣哂分！
「佢有把靚聲，figure又好，但着咗呢套衫，係好失望。個stylist好似整蠱佢咁，佢應該分到邊啲係靚衫、邊啲唔靚啩？」Ricky Kwok說。
至於出席新城頒獎禮的黑蝴蝶結遮胸裝，Ricky Kwok稱Gigi不應太暴露：「咁後生得十幾歲，唔應該着得咁成熟露太多，個look好似cosplay，令佢畀人覺得好肥好大舊，下身襯貼身皮褲，或者個頭紮起會好啲。」Ricky Kwok更指Gigi在理大音樂會中的全黑貼身短裙是自暴其短：「搞到佢好肥，自暴其短，裙太貼，唔需要太暴露，有把靚聲已好靚。如果要着長boots，着短褲會好啲。反而齋睇上半身係OK，係靚，但下身唔得，有啲失敗。」
Ricky Kwok說近期Gigi其中一個造型令人眼一亮的，是早前出席叱咤頒獎禮時穿的ruffle裙。「有叮一聲感覺，幾靚，好討好！好有Edwardian（愛德華風格）、宮廷嘅感覺，雖然條裙好複雜好多ruffle，但佢carry到。唯一一個位，係手套唔帶更好，因太Tone on tone！」
