當我聽到Eason決定連開26場，唔係演唱會，而係重錄近30年的經典唱片，仲邀請歌迷入場睇住佢錄音的消息時，個腦只有「大癲！」兩個字！
又創「臣蹟」、唔到你唔「臣服」！
陳奕迅打陳奕迅！向當年登峰造極的自己下戰書！
佢同我講，對今次重錄計劃真係好興奮！
唱咗咁多年，終於搵到個勁敵，梗係興奮啦！
曾經他在香港演藝學院贏得新秀歌唱大賽冠軍。
相隔31年，他竟然重返這個夢想開始的地方。
當年贏人，今日挑戰自己。
今次呢個創舉，我真心佩服。跟別人比賽不難，最難的是挑戰當年最好的自己。那個年紀、那把聲音、那一刻的感情，過了就過了。如今重新唱，會更好，還是失去當年的味道？
我問自己：如果只能揀一張唱片入場，我最想睇佢錄邊張？
腦海立即回到2001年。
那年我在日本工作，先到橫濱、東京，見證劉德華拍攝《瘦身男女》外景，之後轉到王菲拍攝日本電視劇的工作，第一次入住東京Park Hyatt酒店。
上機前，我買剛出的《Shall We Dance? Shall We Talk!》CD。
那三星期，這張唱片幾乎陪住我每一日。日間忙工作，回到酒店，就是陳奕迅歌聲。
那是我記憶中，非常幸福的三星期。
25年後，只要〈失戀太少〉的前奏響起，我還記得東京酒店房間裏那杯咖啡、窗外的光線，甚至當時空氣的感覺。
奇怪嗎？我忘記了當年處理過多少工作，卻記得當時的陽光、空氣。
另一張，我一定揀2011年的《Stranger Under My Skin》。
因為裏面有〈苦瓜〉。
那年我轉到陳家瑛公司工作。新環境、新挑戰，很多事情要重新適應。不少晚上，整間公司的人都走了，只剩我一個人對住電腦繼續做。
陪住我的，就是不停重播的〈苦瓜〉。
當時未必覺得自己有幾苦，只知道事情未做完，就要繼續做。如今再聽，才明白黃偉文寫的苦瓜，不只是食物，而是人生。
有些滋味，年輕時不懂欣賞，要經歷過，才慢慢嚐到回甘。
原來一張唱片，真係可以收藏一段人生。
我欣賞陳奕迅的勇氣。30年前唱得好，不代表今天可以唱得更好。何況那些經典，早已住進無數歌迷的記憶裏，要超越的又豈止當年的自己？
我最期待的，不是他能否贏過30年前的陳奕迅。
而是當他重新唱起那些歌，我們又會遇見哪一年、哪一個自己。
原來音樂最厲害的地方，不是令時間停下來，而是時間走了那麼遠，仍然可以把我們帶回去。
陳奕迅，謝謝你。
