見到一個好肥的朋友，明顯瘦咗。
我問佢：「你做咗啲咩？」
佢答：「全日食沙甸魚。」
吓？
就這樣，我認識了最近網上很流行的「沙甸魚減肥法」。
原來外國早就流行了一段時間，近年甚至興起「sardinemaxxing」，沙甸魚由平民罐頭變成潮物，高級進口貨有人搶，靚罐頭賣到十幾鎊，連沙甸魚都有奢侈版。
這種食法由美國醫生Annette Bosworth（Dr. Boz）推廣，她叫人做72小時：主要食橄欖油浸沙甸魚，餓就食，多喝水，亦可以飲齋啡。
就這麼簡單。
上星期飛太原工作四日，我心諗：不如試下。
於是帶住一堆沙甸魚罐頭一齊飛。
第一日食了三罐半，竟然一點都不餓。沒有頭暈腳軟，晚上甚至覺得比平時睡得好。
第二日先係真正考驗。
早餐一罐，覺得仲想食，再開一罐。到場館開工，枱面全部都是零食，四點半自助晚餐開始，身邊的人又食餅、又食薯片、又食甜品。
我望住自己的沙甸魚，不停同自己講：唔餓，就唔好搞咁多嘢。
第三朝起身，開始有變化。
沒有磅，但鏡子很誠實：水腫退了，面尖了，肚腩明顯細了一截。
第四日，褲都鬆了。
真的瘦了。
當然，幾日之內突然瘦，不可能全部都是脂肪。低碳之後，身體亦會先排走一部分水分。
但我終於明白這個方法為甚麼吸引。
對不想研究低碳、生酮，又不想日日計蛋白質、脂肪、碳水的人來說，它把減肥變得很簡單。
餓，就食沙甸魚。
更重要的是，很快見到一點成績。
減肥最折磨人的，不是忍口，而是已經忍了一星期，條褲一樣緊，塊面一樣腫，個磅仲好似同你有仇。
人最怕的，不是辛苦，是辛苦完都看不到希望。
一見到肚腩細了一點，褲鬆了一點，動力自然就回來。
沙甸魚本身亦含Omega-3，研究顯示有助調節身體發炎反應。
人生有些事，不是做給別人看，是為自己。
年輕時跑一星期，條褲可能即刻着得番；再大一點，沒那麼容易，就要開始找方法。
望下自己個衣櫃，有幾多件買咗又着唔番的衫。
如果唔想送人，就努力一兩星期啦，老友。
叫我戒甜不難，但你叫我成世唔食雪糕，我應該會殺人。哈哈。
所以減一陣，又放自己假。
條褲再緊番？
咪再食三日沙甸魚囉。
大家會唔會試？
