![](https://ew-plus-static.hkhl.hk/prod/image/2024/7/1ae87d935d8f4b2bb41212f3b675a76c.png?x-oss-process=image/resize,w_720,m_lfit)
那是少年十五二十時的美好回憶。
當放學的鐘聲響起,三五同學仔便會聯袂到士多或文具店門口,蹲下來一起柴娃娃抽Yes!卡。
震宇渴求抽到周慧敏的性感宮廷裝;喜華望着城城的型仔照,早已心心眼;飛哥不惜工本,誓要抽到玉女偶像楊采妮的Yes!卡,才肯離場回家。
有些同學仔滿載而歸,珍而重之,放在銀包裏,朝夕相對,滿足幻想。有些則不是味兒,只因抽到一些沒擦出火花的明星Yes!卡,敗興而回。
Yes!卡可算是一個時代的見證,風靡80至90年代的年輕一族,牽動追星浪潮,誰能登上Yes!卡,便是人氣走紅指標。高峰期每月可售出500萬張,「四大天王」時期郭富城的「雪花閃卡」,曾由一蚊炒高至$400一張,有價有市。
雖然Yes!卡除了普通卡外,先後推出過閃金簽名卡、夜光卡、透明卡和閃底卡等等,可惜還是不敵時代洪流,早已式微,但那些青春印記,還是深烙腦海。
估不到今年書展的最大亮點,引起全城熱話,正正落在一張Yes!卡身上——登登登櫈!有「瘦身教主」美譽的唐安麒,今年除了推出《唐安麒宇宙飲食Angel Diet》修訂版新書外,更應Yes集團邀請,出了一套珍藏版個人Yes!卡,任由大家在書展攤位,以一蚊抽一張卡,唐安麒更有三款不同造型,迎合不同口味。
因為大馬性感女神Miko Wong成為唐安麒旗下的代言人,一起宣揚健康瘦身,這兩位不同年代的靚女,就在今年書展拍住上推出Yes!卡,惹來不少人爭相去抽。有網友一心想抽中Miko,誰知卻抽中了唐安麒,就此引發了熱話。
「當出版社話要推出Miko 同我嘅Yes!卡,我當時聽到,真係笑到肚痛,Miko嘅Yes!卡就話有人鍾意啫,我嘅卡點會有人要喎!」唐安麒也估不到自己會引來咁大迴響。其實小朋友先做選擇,Why not Both ?
有不少網友抽中極罕的唐安麒Yes!卡,知道抽到筍嘢,馬上放上炒賣平台,叫價過百元亦能成功交易,可算升價百倍,掀起炒賣風。
「唐安麒經常在社交平台發布正能量文章,鼓勵女性自強,又真心愛香港,我反而好想抽中佢張Yes!卡,放喺銀包,時刻自勉,當護身符都好吖!」百貨應百客,亦有女粉絲專程入書展,就是為了得到唐安麒的Yes!卡。
每個年代,都有可貴的潮流產物。今年唐安麒就化身Yes!卡女郎,認真有計識玩,「Yes!卡係我哋呢一代嘅集體回憶,能夠有幸成為其中一員,等大家得啖笑,娛樂一下香港人,幾好玩吖!」