北都各項基建工程陸續上馬，為加快項目進度，發展局訂立《北部都會區發展條例草案》，例如將申請改變土地用途或放寬發展參數所需時間由至少九個月縮短至兩個月，並為河套跨境要素流動提供便利及規管等，條例最快明年第一季生效。到二○三○年，北都熟地產出量預計達九百公頃，區內大型基建同商住落成量將持續增加，伴隨而來嘅清潔、保安、機電工程，以至環保管理需求相信會有增無減。
豐盛生活服務（0331）係呢股需求浪潮中嘅先頭部隊，集團執行副主席兼首席執行官林煒瀚（Patrick）早前分享，截至今年六月底，集團未完成合約金額接近一百五十億元（港元，下同），創歷史新高，以每年約八十億元營業額計算，相當於約兩年收入儲備。另已中標北都二十三億元機電工程項目，覆蓋上水、粉嶺、古洞、洪水橋等地；預期未來十八個月，政府尚有約一百六十一億元合約等待招標，集團「米缸」有望繼續擴大。
豐盛生活服務，執行副主席兼首席執行官林煒瀚（右）。
豐盛生活服務早前公布全年業績，收入錄得七十九點三四億元，微跌百分之二點八；股東應佔溢利回落約百分之七點七至四點一八億元。Patrick解釋，跌幅源於機電工程板塊收入貢獻按年減少一成二，個別工程因地基問題延誤而拖慢入帳，同時香港整體建築工程減少，競爭較以往激烈，雙重夾擊下拖低表現。
市場逆風之下，集團應對之道回歸基本步，維持強健現金流。集團加強內部監控，尤其收款環節，密切注視交易對手風險，務求確保款項收回。事實上，豐盛多年維持淨現金狀態，年內貸款僅三點五億元，淨現金約四點八億元，一直奉行嘅財務紀律成為集團發展底氣。
為提升工程效率，豐盛近年積極採用預製件，組件分別在港和內地預先生產，再運至地盤安裝，省時省錢兼環保，客戶及政府均受落。由於建築業容易受經濟周期影響，集團亦持續拓展工程以外業務，去年取得全國保險代理牌照，已於北京、上海、廣州設立辦公室，未來將加強大灣區布局。Patrick強調，保險代理嘅價值不限於「做單」，而係以顧問形式為客戶設計合適方案，喺保障與保費之間取得平衡。
人力資源方面，集團員工超過兩萬人，請人貴且難，政府推出嘅補充勞工計劃雖有幫助，但名額有限，目前僅輸入約一百人。Patrick指內地輸入勞工表現良好，集團亦提供培訓協助適應。至於人工智能，佢認為重點在於幫客慳錢，而非盲目削減人手，並以物業管理為例，凌晨時段可透過智能系統代替部分人手，但並非所有客戶接受，須視乎實際情況。
公司宣派末期股息每股十七點六港仙，派息比率維持四成。至於往後會否加碼，Patrick認為要考慮公司現金流和併購儲備，為未來業績提供一定防禦網，方能持續向股東作出回饋。
