為實現收支平衡，OpenAI宣布引入廣告業務，初期將向免費版同低級別ChatGPT用戶顯示廣告。
去年多款人工智能模型一夜爆紅， 從Google Gemini、OpenAI ChatGPT、x AIGrok到DeepSeek等相繼登場，圖文影片一鍵生成，徹底改寫創作同生產成本。各研究機構和投行紛紛出報告，其中IDC指二○二四年全球AI總投資規模已突破三千億美元，並有望於二○二八年倍增至六千多億美元。多間AI相關公司收入以破紀錄增速成長，但「燒錢」速度同樣驚人，主要消耗於購置晶片同大量運算資源，故多間公司推出會員制同廣告投入等吸金業務，務求提高變現能力。
以行業龍頭之一OpenAI為例，公司上月公布營運數據，去年ARR（Annualized Recurring Revenue，年率化計算財政收入）逾二百億美元，按年增長二點三倍；每周活躍用戶（WAU）和日活躍用戶（DAU）均創歷史新高。不過增長背後運算成本極高，公司行政總裁曾表示未來八年將投資一點四萬億美元，用於建設及升級數據中心。
為實現收支平衡，Open AI上月宣布引入廣告業務，初期將向免費版同低級別ChatGPT用戶顯示廣告，而Premiere Pro同企業訂閱用戶則將維持無廣告體驗。公司強調廣告唔影響ChatGPT回答，用戶資料同對話內容亦絕不出售予廣告商。《金融時報》引述消息人士稱，公司預計今年將從廣告業務獲得十數億美元收入，並有望逐年增加。
事實上， 演算法廣告並非新鮮事， 平日喺Facebook、Instagram、Google所睇到嘅廣告，大部分都建基於用戶嘅瀏覽紀錄，譬如只要你搜尋過「北海道」，就會瘋狂彈出滑雪、酒店、旅行團等廣告。呢種做法確實有助對準目標受眾，但對用戶嚟講可能會出現廣告疲勞，不斷被類近廣告轟炸。
對比之下，OpenAI嘅廣告或更勝一籌，除咗利用演算法，仲會透過你同ChatGPT嘅即時對話內容，進行深度情境化廣告投放。例如當你問AI失眠有咩解決方法，佢會好似以往咁分析，另會進一步提供解決失眠嘅產品，但同時有標示區分廣告內容，保持回答獨立性。呢種建基於對話情境嘅廣告更個人化，相對無咁h a r dsell。對比身邊另一半，AI可能更識得去猜度你嘅心思。
高嵌入對話嘅廣告機制亦引發私隱爭議。雖然OpenAI承諾唔會出售對話紀錄，但當AI同時扮演「助手」與「推銷員」雙重角色時，用戶能否理性區分建議同廣告？另外，若對話內容涉及心理健康、財務、賭博等話題，插入廣告又是否適合？針對AI潛在風險，歐盟已全面實施《人工智能法案》，美國亦推出相關AI法案，對數據運用設有框架，提高使用安全性。而作為用戶，亦應保持理性同自主判斷，切勿盲從AI意見。
同時，AI生成廣告內容大量湧現，包括像真度極高嘅影片，好似最近有AI陸叔視頻出現，講說話聲音同口形做到同步，唯一「破綻」係結尾叫人加入群組，所以緊記見到有疑點就諗一諗先，最好fact check埋，唔好喺假冒廣告催促下倉卒行動。
