年度盛事渣打香港馬拉松，今年吸引約七萬四千人參賽。
年度盛事渣打香港馬拉松早前圓滿結束，今年吸引約七萬四千人參賽。我身邊都有唔少朋友參加，好似公司兩位秘書今年都跑半馬，跑過逾百馬嘅老友水哥張樹槐（Walter）就繼續全馬。佢哋經常同我分享跑步「入坑」嘅心路歷程，以及點樣一步步越跑越遠。
水哥更加由跑步愛好者，進一步鑽研相關議題，並早於十年前已提出「馬拉松經濟」。事實上，今年海外跑手約二萬五千人，跑手習慣最少停留三、四晚，住宿、觀光、購物、餐飲等消費都好可觀，跑「馬」經濟逐步成形。
國際品牌估值研究機構Brand Finance去年四月公布關於全球馬拉松嘅品牌報告《M a r a t h o n s 5 02025》，大中華區中，香港馬拉松品牌強度列全球四十四位，另估計為本地經濟貢獻逾二點二億港元。
裝備方面，兩位同事經常交換戰衣和跑鞋心得，各有所好，但跑褲佢哋一致揀本地品牌AKIV。半年前我訪問過品牌創辦人關詠同（Queendy），聽佢講解跑褲設計由來。品牌跑褲最大特色係腰帶網面有防水內層間隔位，可以收納手機、水袋、能量啫喱等，方便跑手，亦唔怕出汗整濕手機。曾挑戰半馬嘅發哥今年率領明星隊跑十公里，全隊着住嘅「發」字戰衣，原來都係AKIV出品，仲專門幫佢設計logo，相信會成為「發記跑步團」隊衣。
今年報名人數創新高，達到十二萬，好多人望「馬」興嘆。為把握體育經濟機遇，社會陸續有聲音提出分日舉行、延長賽期、增加賽道等方法，以增加參賽名額，吸納更多高消費客群，提高賽事吸金力。
渣馬自二〇一六年起獲國際田聯升格為金級道路賽事，具一定代表性，歷屆均吸引國際級馬拉松好手參與。同屬金標嘅新加坡馬拉松，去年起已改為兩天舉行，分拆半馬同全馬賽事，一來容納更多參賽者，二來避免賽道過於擠擁。另波士頓田徑協會更為進取，將單一馬拉松賽事擴展成一系列活動，包括春季馬拉松接力挑戰賽，以及秋季環城跑錦標賽，尚有其他不同名目路跑，均值得香港借鏡。
海外跑手嘅吸金力實在不容小覷，以東京馬拉松為例，去年約三萬八千人參賽，國際跑手佔三成，按照東京都觀光局數據， 賽事去年帶動全國經濟效益約五百二十六億日圓，相當於約二十六億港元。
而正如水哥所講，即使係本地參賽者，比賽時總會有一兩位親友到場打氣，賽事結束後一般會去食餐飯，最少可以帶旺附近食肆。完賽後可能集中喺終點附近食飯，但本地跑手賽前練跑會喺唔同地方，因此大會推出「助小店、撐跑手」計劃，今年參加小店增加到七百間，覆蓋範圍擴展至全港，仲有小店設「打卡應援牆」，延長並炒熱盛事氣氛。
