快將踏入第四季，適逢傳統消費旺季，品牌普遍都會趁機谷宣傳，務求大節前作最後衝刺。香港廣告客戶協會（HK2A）今月初發布《二○二五廣告預算調查》，隨經濟不確定性增加，四成二受訪廣告客戶計劃減少整體廣告開支，僅有一成九表示將擴大預算。整體廣告預算縮減，精準營銷更顯重要，調查提到，客戶對內容合作（Content Collaboration）投放逐漸增加，務求令廣告喺最短時間得到最大共鳴。
古老板在Instagram分享廣告，三天便有逾十七萬觀看次數（圖為保濟丸網站截圖）。
一個引人入勝嘅廣告故事，能令觀眾產生共鳴同連結。藥品保健係近年廣告常客，以保濟丸為例，最近品牌請咗古天樂做代言，扮演返古老板，配以大熱電影《九龍城寨之圍城》場景，古老板和胡子彤大耍功夫，十足電影裏面龍捲風同十二少咁打得，成功引起網民回響。廣告融入電影和功夫元素，由名導演侯仲賢執導，造型、美術、布景、燈光等都達到電影級水準。
廣告宣傳一撕即開嘅新包裝，強調傳統產品同新包裝設計嘅結合。廣告一方面致敬電影，亦表達出保濟丸同城寨一樣，都係傳承落嚟嘅經典事物，但因應現代人需要而喺包裝上作出改良。廣告為保濟丸加入電影文化意義，喺傳統產品個餡之上加上年輕人喜愛嘅個性，令品牌更後生。過去兩三年，品牌母公司健倍苗苗（2161）出咗唔少突破傳統嘅廣告，如搵張敬軒代言何濟公，林峯代言飛鷹活絡油等，配合吸睛廣告橋段，將一系列老牌良藥年輕化，推廣至更闊年齡層。
除咗借助明星效應，廣告故事性亦係成功關鍵。泰國廣告以賺人熱淚或無厘頭幽默風格見稱，去年更以八部廣告橫掃康城國際創意節九個獎項。當中大多以一至兩分鐘微電影形式拍攝，由素人主演，劇情貼近基層生活，並以出人意表嘅反轉結局牽動觀眾情緒。據《曼谷郵報》統計，泰國本土廣告採用素人演出比例高達八成五，以低成本觸動人心。
日本係全球第三大廣告市場，主打細膩情感、創新視覺風格。日本鐵路公司前年推出催淚廣告《爸爸與女兒的風景》，喺短短兩分半鐘，以一鏡到底拍攝父女十二年通勤日常，主角達五十人，呈現不同時期嘅父女模樣，由女兒幼年、到青春期、叛逆期、再到長大成人，父親亦由壯年逐漸變成白髮蒼蒼。一鏡之下，五十位演員每個走位同表情都毫釐不差；同時動員超過二百位工作人員搭景、運鏡，充分體現日本職人對細節嘅追求。
國際廣告代理公司電通集團六月發表報告，預計今年全球廣告費用增長率為百分之四點九，達九千九百二十億美元，其中最捨得花錢落廣告嘅行業係通訊、化妝品與個人護理等。隨社交媒體崛起，不論亞太或歐美地區，數碼廣告逐漸主導市場，佔比將擴大至六成八。不過傳統廣告能夠短時間內達到廣泛觸及率，故唔少具財力嘅品牌都雙線出擊以達宣傳效果。
