全球覆銅面板龍頭建滔系上周公布中期業績；上半年建滔集團（148）和建滔層積板（1888）純利均錄雙位數增長，前者多賺七成一至二十五點八億元（港元，下同）；後者純利九點三億元，按年升兩成八。
建滔集團主席張國榮（左二），以及張家成（左一）和張祖兒（右一）。
電子業進入上升周期，覆銅面板和印刷線路板需求急速擴大，集團八月時公布每張覆銅面板加價十元人民幣，客戶接受程度理想。建滔係行業龍頭，在市場有產品定價能力，加上需求強健，銷售額有保證，二十年全球銷量第一並非浪得虛名。不過，早前建滔集團主席張國榮（Paul）同大家講解業績時，竟然話自己雖然做咗幾十年覆銅面板，但一樣要跟年輕一代學習點樣做板！
原因係近年人工智能（AI）出現爆發式增長，見到建滔因應AI行業、5G、6G及電動車行業所需，研發出低介電（Low-Dk）玻纖紗同玻纖布，另外開發超低傳輸損耗銅箔，建立起AI應用嘅上游材料一站式方案，準備強攻AI板市場。Paul解釋，今日產品得以「出爐」，係六年來不斷研發嘅成果，而二○一九年之所以毅然投入AI相關研發，就係建滔年輕管理層提出兼說服董事會，今日嘅高端產品好快就會捲入紅海，陷入減價戰，因此必須不斷創新研發，超前市場需求儲備技術。
AI產品線由執行董事張家成（Eric）和全球市場及研發部總監張祖兒（Jason）兩兄弟領軍，喺今年五月取得突破性發展，成功由Low-Dk玻纖紗窯爐抽出第一根紗，然後織成Low-Dk玻纖布。Eric講起過程確實有汗有淚，因為Low-Dk紗超幼兼極脆易斷，好難成功，佢哋要不停改良技術反覆試驗，到最後關鍵兩星期，負責同事直情搬咗去成四、五十度嘅爐旁瞓，以便監控過程直至Low-Dk玻纖紗正式出爐。Jason就多謝董事會信任，支持投入研發。Paul講笑話建滔從未試過咁多研發人員，建滔積層板下面有一萬員工，其中兩千人做研發，因此呢條AI上游產品線確實得來不易。
我認同年輕一代有創意，但同時覺得佢哋嘅理念，要結合建滔積累幾十年嘅工業經驗和工藝，至能夠得出可以量產嘅新產品。努力和投資換來產品價值提升，例如一代Low-Dk玻纖紗售價係常規電子紗八倍，二代更加係二十四倍；一代Low-Dk玻纖布係常規布價格六倍，二代係二十倍，石英電子布係六十五倍。雖然好賺，但現時全球只有四間廠有能力做到Low-Dk玻纖布，中國佔三間，建滔係其中之一。
Prismark預計今年AI相關印刷線路板市場規模會達到五十六億美元，明年將超過一百億美元，作為上游嘅建滔未來幾年成績可期。而我個人最贊同Paul嘅結語，今日AI係全世界湧入去投資嘅藍海，AI伺服器供不應求，主要係上游產品未達到規模，但幾年後當AI伺服器滲透率達到百分之十五，市場就會開啟價格戰，因此建滔要不斷超前研發，到聽日人哋降價時集團跳上更高端領域，維持盈利能力。
